- 1
- Na, kua huihui tera nga Pirihitini i a ratou ope ki te whawhai, a ka whakaminea ki Hokoho o Hura, noho ana i te takiwa o Hokoho o Ateka i Epehe-ramime.
- 2
- I huihui ano a Haora ratou ko nga tangata o Iharaira, a, noho ana i Raorao Eraha; i whakatakoto hoki ratou i a ratou ngohi mo te whawhai ki nga Pirihitini.
- 3
- A i runga nga Pirihitini i te maunga i tenei taha e tu ana, i runga hoki a Iharaira i te maunga i tera taha e tu ana: he wharua hoki i te takiwa o ratou.
- 4
- Na, ko te haerenga mai o tetahi tangata, he papatu, i roto i te puni o nga Pirihitini, tona ingoa, ko Koriata no Kata, e ono nga whatianga kotahi hoki whanganga a te ringa tona roa.
- 5
- A he parahi te potae i runga i tona mātenga, he pukupuku unahi ano hoki tona kakahu, te taimaha o te pukupuku, e rima mano hekere parahi.
- 6
- He whakapuru-tao parahi kei ona waewae, a i ona pokohiwi he timata parahi.
- 7
- A, rite tonu ki te rakau a te kai whatu te kakau o tana taoroa; na, te taimaha o te tete o tana taoroa e ono rau hekere rino: i mua ano hoki i a ia e haere ana te kai mau o te whakangungu rakau.
- 8
- Na, ka tu ia, a ka karanga atu ki nga ngohi a Iharaira, ka mea ki a ratou, Na te aha koutou i puta mai ai ki te whakatakoto i a koutou ngohi? ehara ianei ahau i te Pirihitini, a ko koutou nga pononga o Haora? whiriwhiria he tangata ma koutou, a kia heke iho ia ki a au.
- 9
- Ki te kaha ia ki te whawhai ki a au, a ka patu i a au, na, ko matou hei pononga ma koutou: a ki te kaha ahau i a ia, ka patu i a ia, na, hei pononga koutou ma matou, a me mahi koutou ki a matou.
- 10
- I mea ano taua Pirihitini, Tenei taku whakatara inaianei mo nga ngohi o Iharaira; Homai he tangata ki a au kia whawhai maua.
- 11
- A, te rongonga o Haora, ratou ko Iharaira katoa, ki enei kupu a te Pirihitini, na, hopī noa iho ratou, nui whakaharahara te wehi.
- 12
- Na, he tama a Rawiri na taua Eparati o Pete-rehema-Hura, ko Hehe nei tona ingoa, tokowaru hoki ana tamariki: a i nga ra o Haora kua koroheketia taua tangata i roto i nga tangata.
- 13
- Na, tokotoru nga tamariki a Hehe, ko nga kaumatua, i haere, i aru i a Haora ki te pakanga: ko nga ingoa enei o ana tama tokotoru i haere nei ki te pakanga, ko Eriapa te matamua, no muri i a ia ko Apinarapa, a ko Hamaha te tuatoru.
- 14
- Ko Rawiri hoki to muri rawa: heoi aru ana nga mea kaumatua tokotoru, i a Haora.
- 15
- Na, ka haere a Rawiri, ka hoki mai i a Haora ki te tiaki i nga hipi a tona pāpā i Pete-rehema.
- 16
- Na, i te ata, i te ahiahi, ka whakatata mai taua Pirihitini, ka tu mai, a e wha tekau nga ra.
- 17
- Na, ko te meatanga a Hehe ki tana tama ki a Rawiri, Tena, maua atu tetahi wahi o tenei witi pahūhū, kia kotahi epa, ma o tuakana, me enei taro kotahi tekau, rere atu ki te puni ki ou tuakana.
- 18
- Maua atu hoki enei waiu-maro kotahi tekau ki to ratou rangatira mano, tirohia iho ano hoki ou tuakana, ka tango mai ai i ta ratou tohu.
- 19
- Na, i Raorao Eraha a Haora, a ratou, me nga tangata katoa ano o Iharaira e whawhai ana ki nga Pirihitini.
- 20
- Heoi ka maranga wawe a Rawiri i te ata, tukua atu ana e ia nga hipi ki te kai tiaki, a mauria atu ana aua mea e ia, haere ana; pera ana ano ia me ta Hehe i whakahau ai ki a ia. A, tona taenga mai ki te parepare, na, e haere atu ana te ope ki te whakatakotoranga ngohi, e hamama ana, e mea ana ki te whawhai.
- 21
- Kua oti hoki i a Iharaira ratou ko nga Pirihitini nga ngohi te whakatakoto, tenei ngohi hei whawhai ki tera ngohi.
- 22
- Na, tukua ana e Rawiri tana pikaunga ki te ringa o te kai tiaki o nga mea, a, rere ana ki te taua, ki te ui ki ona tuakana ki to ratou ora.
- 23
- I a ia ano e korero ana ki a ratou, na, ko taua papatu, te Pirihitini o Kata, ko Koriata tona ingoa, e haere mai ana i roto i nga ngohi a nga Pirihitini, a ka korero i aua korero ra ano, me te whakarongo ano a Rawiri.
- 24
- A, te kitenga o nga tangata katoa o Iharaira i taua tangata, na, rere ana ratou i tona aroaro, a, nui whakaharahara to ratou wehi.
- 25
- Na, ko te meatanga ake a nga tangata o Iharaira, I kite ranei koutou i taua tangata i haere mai nei? He pono he whakatara mo Iharaira i haere mai ai ia: na, te tangata e patua ai ia, nui atu nga taonga e homai e te kingi ki a ia, ka homai ano hoki e ia tana tamahine ki a ia, ka whakarangatiratia ano te whare o tona pāpā i roto i a Iharaira.
- 26
- Katahi ka korero a Rawiri ki nga tangata e tu ana i tona taha, ka mea, Ka peheatia te tangata e patua ai tenei Pirihitini, e mutu ai te tawainga o Iharaira? ko wai hoki tenei Pirihitini kokoti-kore i whakatara ai ia ki nga ngohi a te Atua ora?
- 27
- Na, ka korerotia mai ano e te iwi ko aua kupu ano ki a ia, ka mea ratou, He pera ano te hanga ki te tangata e patua ai ia.
- 28
- A, te rongonga o Eriapa o tona tuakana kaumatua i a ia e korero ana ki aua tangata, te tino muranga o te riri o Eriapa ki a Rawiri; na, ka mea ia, Na te aha koe i haere mai ai? i tukua e koe ki a wai aua hipi torutoru ra i te koraha? e mohio ana ahau ki tou whakapehapeha, ki te kino ano hoki o tou ngakau, he matakitaki hoki i te whawhai i haere mai ai koe ki raro nei.
- 29
- Na, ko te meatanga mai a Rawiri, I aha koia ahau? Kahore ranei he take?
- 30
- Na, ka tahuri atu ia i a ia ki tetahi atu, a ka korero atu ko aua kupu ano; a, rite tonu ki te kupu tuatahi te kupu i whakahokia mai e te iwi ki a ia.
- 31
- Heoi ka rangona nga kupu i korerotia e Rawiri, na, ka korerotia ki a Haora: a, tikina ana ia e ia.
- 32
- Katahi a Rawiri ka mea ki a Haora, Kei hoki iho te ngakau o tetahi tangata i taua koroke: ma to pononga e haere ki te whawhai ki tenei Pirihitini.
- 33
- Na, ko te meatanga mai a Haora ki a Rawiri, E kore e taea e koe te haere ki tenei Pirihitini whawhai ai: he tamariki nei hoki koe, he tangata hapai patu ano hoki ia no tona tamarikitanga ake.
- 34
- Na, ka mea a Rawiri ki a Haora, I te tiaki to pononga i nga hipi a tona pāpā; na ko te haerenga mai o tetahi raiona, o tetahi pea, kahakina atu ana he reme i roto i te kahui.
- 35
- Na, ka puta atu ahau ki te whai i a ia, a, patua ana ia e ahau: i tangohia mai ano hoki te reme i roto i tona waha; a, tona whakatikanga mai ki a au, na, hopukia ana tona kumikumi e ahau, patua iho kia mate.
- 36
- I patua ruruatia te raiona me te pea e to pononga; a ka rite tenei Pirihitini kokoti-kore ki tetahi o raua; mona i whakatara ki nga ngohi a te Atua ora.
- 37
- I mea mai ano a Rawiri, Ma Ihowa nāna nei ahau i whakaora i te kaha o te raiona, i te kaha o te pea, mana ahau e whakaora i te ringa o tenei Pirihitini. Katahi a Haora ka mea ki a Rawiri, Haere, a kia tata a Ihowa ki a koe.
- 38
- Katahi ka whakakakahuria a Rawiri e Haora ki ona kakahu, potaea ana tona mātenga e ia ki te potae parahi: i meatia ano hoki e ia he pukupuku ki a ia.
- 39
- Heoi whitikiria ana e Rawiri tana hoari ki waho ake o ona kakahu; ka anga ka haere; kihai hoki i whakamatauria e ia. Na, ko te meatanga ake a Rawiri ki a Haora, E kore e tika taku haere i enei, kahore hoki i whakamatauria e ahau. Na, whakarerea atu ana e Rawiri aua mea.
- 40
- Na, ka maua atu e ia ko tona tokotoko i tona ringa; i whiriwhiria ano hoki etahi kohatu maenene mana i roto i te awa, a, whaowhina ana ki roto ki tana pēke hepara, ara ki te putea; i tona ringa ano hoki tana kotaha. Na, ko tana whakatatanga atu ki te Pirihitini.
- 41
- Na, ka haere mai, ka neke tata mai te Pirihitini ki a Rawiri, me te kai mau ano hoki o tana whakangungu rakau i mua i a ia.
- 42
- Na, te tirohanga mai a te Pirihitini, ka kite i a Rawiri, whakahawea ana ki a ia; he taitamariki hoki ia, he kiri whewhero, he ahua ataahua ano hoki.
- 43
- Na, ko te meatanga a te Pirihitini ki a Rawiri, He kuri ahau i haere mai ai koe me nga tokotoko ki a au? Na, kangā iho a Rawiri e te Pirihitini ki ona atua.
- 44
- I mea ano hoki te Pirihitini ki a Rawiri, Haere mai nei ki a au, a ka hoatu e ahau ou kikokiko ma nga manu o te rangi, ma nga kararehe ano hoki o te parae.
- 45
- Katahi ka mea a Rawiri ki te Pirihitini, I haere mai koe ki a au me te hoari, me te taoroa, me te timata: ko au ia ka haere atu nei ki a koe i runga i te ingoa o Ihowa o nga mano, o te Atua o nga taua a Iharaira, o tau i whakatara ake na.
- 46
- Ko aianei koe tukua mai ai e Ihowa ki toku ringa, a ka patua koe e ahau, ka tangohia ano tou upoko, ka hoatu ano hoki e ahau aianei nga tinana o te ope o nga Pirihitini ma nga manu o te rangi, ma nga kirehe hoki o te whenua, a ka mohio te whenua katoa he Atua ano to Iharaira.
- 47
- Ka mohio ano hoki tenei whakaminenga katoa, ehara te hoari, te taoroa ranei, i ta Ihowa mea hei whakaora: na Ihowa hoki te whawhai, mana koutou e homai ki o matou ringa.
- 48
- Na, te whakatikanga o te Pirihitini, tona haerenga mai, ka whakatata mai ki te whakatau i a Rawiri, na, ka hohoro a Rawiri, a, rere ana ki te taua ki te whakatau i te Pirihitini.
- 49
- Na, kua totoro iho te ringa o Rawiri ki roto ki te pēke, kei te tango i tetahi kohatu i roto, piua atu ana e ia, kua tu te rae o te Pirihitini, toremi atu te kohatu ki roto ki tona rae. Na, hinga tapapa ana ia ki te whenua.
- 50
- Na, he kotaha, he kohatu ta Rawiri, a, riro ana i a ia te Pirihitini: heoi patua ana e ia te Pirihitini, mate rawa. Otiia kahore he hoari i te ringa o Rawiri.
- 51
- Na, ka rere mai a Rawiri, a, tu ana i runga i te Pirihitini; na, ka mau ia ki tana hoari, unuhia mai ana e ia i roto i tona takotoranga. Na, whakamatea ana ia, tapahia atu ana tona upoko ki taua hoari. A, te kitenga o nga Pirihitini kua mate to ratou toa, na, whati ana ratou.
- 52
- Katahi ka whakatika nga tangata o Iharaira ratou ko Hura, hamama ana, na, whaia ana e ratou nga Pirihitini, a, tae noa koe ki te raorao, ki nga kuwaha ano hoki o Ekerono. Na, hinga ana nga mea i patua o nga Pirihitini i te ara ki Haaraimi, a, tae noa ki Kata, ki Ekerono.
- 53
- Na, ka hoki mai nga tamariki a Iharaira i te whai i nga Pirihitini, a, pahuatia ana e ratou to ratou puni.
- 54
- Na, ka mau a Rawiri ki te upoko o te Pirihitini, a, kawea ana ki Hiruharama: ko ana mea ia mo te patu i waiho e ia i tona teneti.
- 55
- Na, te kitenga o Haora i a Rawiri e haere atu ana ki te whakatau i te Pirihitini, ka mea ia ki a Apanere, ki te rangatira ope, E Apanere, he tama na wai tena tamaiti? na, ka mea a Apanere, E ora ana tou wairua, e te kingi, kahore ahau e mohio.
- 56
- Katahi te kingi ka mea, Ui atu he tama na wai taua tamaiti.
- 57
- Na, i te hokinga mai o Rawiri i te patu i te Pirihitini, ka mau a Apanere ki a ia, a, kawea ana ki te aroaro o Haora, me te pane ano hoki o te Pirihitini i tona ringa.
- 58
- Na, ko te meatanga mai a Haora ki a ia, E tama, na wai koe tamaiti? Ano ra ko Rawiri, He tamaiti ahau na to pononga na Hehe o Pete-rehema.
Address: 
Phone: 
Email: