- 1
- Na, kua u a Horomona tama a Rawiri ki tona rangatiratanga; i a ia ano hoki a Ihowa tona Atua, whakanuia rawatia ake ana ia e ia.
- 2
- Katahi a Horomona ka korero ki a Iharaira katoa, ki nga rangatira o nga mano, o nga rau, ki nga kai whakarite whakawa, ki nga kawana katoa ano hoki o Iharaira katoa, ki nga mea nui o nga mātua.
- 3
- Na, haere ana a Horomona, ratou ko te whakaminenga katoa ki te wahi tiketike i Kipeono; i reira hoki te tapenakara o te whakaminenga o te Atua, i hangā nei e Mohi, e te pononga a te Atua, ki te koraha.
- 4
- Ko te aaka ia a te Atua, i kawea mai tera e Rawiri i Kiriata-tearimi ki te wahi i whakapaia e Rawiri: i whakaturia hoki e ia he teneti mo taua aaka ki Hiruharama.
- 5
- Na, te aata parahi i hangā e Petareere tama a Uri, tama a Huru, whakaturia ana tera e ia ki mua i te tapenakara o Ihowa: a, rapua ana he tikanga i reira e Horomona ratou ko te whakaminenga.
- 6
- Na, haere ana a Horomona ki reira ki te aata parahi i te aroaro o Ihowa, ki tera i te tapenakara o te whakaminenga, a, whakaekea ana e ia ki reira kotahi mano nga tahunga tinana.
- 7
- I taua po ka puta mai te Atua ki a Horomona, a ka mea ki a ia, Inoi mai ki a au ko te aha kia hoatu e ahau ki a koe.
- 8
- Na, ko te meatanga atu a Horomona ki te Atua, Nui atu te aroha i whakaputaina e koe ki toku pāpā ki a Rawiri; a, meinga ana ahau e koe hei kingi i muri i a ia.
- 9
- Na, e Ihowa, e te Atua, whakamanā to kupu ki toku pāpā, ki a Rawiri; kua meinga nei hoki ahau e koe hei kingi mo te iwi e rite ana ki te onepu o te whenua te tini.
- 10
- Na, homai ki a au he ngakau mahara, he mohiotanga, mo taku haere atu, haere mai i te aroaro o tenei iwi: ko wai hoki hei whakarite whakawa mo tenei iwi nui ou?
- 11
- Ano ra ko te Atua ki a Horomona, Na, ko ta tou ngakau tenei, kihai hoki koe i tono ki te taonga mou, ki te rawa, ki te kororia, ki ou hoa riri ranei kia whakamatea, kihai hoki koe i tono kia maha ou rangi; heoi tau i tono ai, he ngakau mahara, he mohiotanga, kia whakarite whakawa ai koe mo toku iwi, kua oti na koe te mea e ahau hei kingi mo ratou.
- 12
- Tenei ka hoatu nei ki a koe he ngakau mahara, he mohiotanga. Ka hoatu ano e ahau ki a koe he taonga, he rawa, he kororia; kahore i rite to nga kingi i mua i a koe, e kore ano hoki e rite i muri i a koe.
- 13
- Katahi ka haere mai a Horomona i te wahi tiketike i Kipeono ki Hiruharama, i mua i te tapenakara o te whakaminenga, a kingi ana ki Hiruharama.
- 14
- Na, ka huihuia mai he hariata e Horomona, me etahi kai eke hoiho; kotahi mano e wha rau ona hariata, kotahi tekau ma rua mano ona kai eke hoiho, waiho iho e ia ki nga pa hariata, ki te kingi ano hoki ki Hiruharama.
- 15
- Na, ka meinga e te kingi te hiriwa me te koura o Hiruharama kia rite ki nga kohatu; i meinga ano e ia nga hita kia rite ki nga hikamora i te raorao te tini.
- 16
- A i kawea mai ano he hoiho mo Horomona i Ihipa, he miro ano hoki: rite tonu te utu i riro mai ai te miro i nga kai hoko a te kingi.
- 17
- Na, e ono rau nga hekere hiriwa i riro mai ai te hariata, i puta mai ai i Ihipa, a, o te hoiho, kotahi rau e rima tekau. Ko ratou ano hoki hei kawe hoiho mai mo nga kingi katoa o nga Hiti, mo nga kingi ano hoki o Hiria.
Address: 
Phone: 
Email: