- 1
- I te toru tekau ma ono o nga tau o te kingitanga o Aha ka haere mai a Paaha kingi o Iharaira, ki Hura, a, hangā ana a Rama e ia, kia kaua ai tetahi e tukua kia haere atu ranei, kia haere mai ranei ki a Aha kingi o Hura.
- 2
- Na, tangohia katoatia ana e Aha te hiriwa me te koura i roto i nga taonga o te whare o Ihowa, o te whare ano hoki o te kingi, a hoatu ana e ia kia kawea ki a Pene-harara kingi o Hiria, i Ramahiku hoki ia e noho ana; i mea ia,
- 3
- He kawenata ta taua, he pera ano me ta toku pāpā raua ko to pāpā: nana, te hiriwa, te koura i hoatu na e ahau kia kawea ki a koe. Haere, whakatakā to kawenata ki a Paaha kingi o Iharaira, kia haere atu ai ia i toku taha.
- 4
- Na, rongo tonu a Pene-harara ki a Kingi Aha, a, tonoa ana e ia nga rangatira o ana ope ki nga pa o Iharaira; patua iho e ratou a Iiono, a Rana, a Apere-maima, me nga pa taonga katoa o Napatari.
- 5
- A ka rongo a Paaha, na, mutu ake tana hanga i Rama, heoi ano tana mahinga.
- 6
- Katahi a Kingi Aha ka tiki i a Hura katoa, a, taria atu ana e ratou nga kohatu o Rama, me nga rakau o reira i hangā nei e Paaha, a hangā ana ki aua mea a Kepa raua ko Mitipa.
- 7
- I taua wa ano ka haere a Hanani te matakite ki a Aha kingi o Hura, a ka mea ki a ia, Kua okioki na koe ki te kingi o Hiria; kihai hoki koe i okioki ki a Ihowa ki tou Atua, mo reira ka mawhiti atu te ope o te kingi o Hiria i roto i tou ringa.
- 8
- Nga Etiopiana, nga Rupimi, he teka ianei he ope nui ratou, he maha noa atu ano hoki o ratou hariata, o ratou kai eke hoiho? heoi tou okiokinga atu ki a Ihowa, homai ana ratou e ia ki tou ringa.
- 9
- E kopikopiko ana hoki nga kanohi o Ihowa i te whenua katoa, a hei hoa kaha ia mo te hunga e tapatahi ana o ratou ngakau ki a ia. He mahi kuare tenei nau; na, ka whai pakanga koe i nga wa e takoto ake nei.
- 10
- Na, ka riri a Aha ki taua matakite, a, hoatu ana e ia ki te whare herehere; he riri hoki nona ki a ia mo tenei mea. I tukinotia ano hoki e Aha etahi o te iwi i taua wa.
- 11
- Na, nga meatanga a Aha, o te timatanga, o muri ano hoki, kua oti te tuhituhi ki te pukapuka o nga kingi o Hura, o Iharaira.
- 12
- Na, he mate to Aha i ona waewae i te toru tekau ma iwa o nga tau o tona kingitanga, a tino nui noa tona mate. I tona matenga ano hoki kihai ia i rapu i ta Ihowa, engari i ta nga rata.
- 13
- Na, kua moe a Aha ki ona mātua; i mate hoki i te wha tekau ma tahi o nga tau o tona kingitanga.
- 14
- A, tanumia iho ki nga urupa i keria e ia mona ki te pa o Rawiri,whakatakotoria iho ki tetahi takotoranga e ki tonu ana i nga mea kakara, i nga tini mea whakaranu, he mea hanga na te kai whakaranu. He nui whakaharahara ano hoki te tahunga i tahuna mona.
Address: 
Phone: 
Email: