- 1
- Na, hoki marie ana a Iehohapata ki tona whare ki Hiruharama.
- 2
- A ka puta mai te matakite, a Iehu tama a Hanani, ki te whakatau i a ia, ka mea ki a Kingi Iehohapata, Me awhina ianei e koe te tangata kino, me aroha ano ki te hunga e kino ana ki a Ihowa? Na, he riri tenei mou, he mea no te aroaro o Ihowa.
- 3
- Otiia kua kitea etahi mea pai au. I whakakahoretia atu hoki e koe nga ngahere i te whenua; i whakaanga ano hoki i tou ngakau ki te rapu i te Atua.
- 4
- Na, noho ana a Iehohapata ki Hiruharama, a ka haere atu ano ia puta noa i te iwi, i Peere-hepa atu ano, a tae noa ki Maunga Eperaima, ki te whakahoki mai i a ratou ki a Ihowa, ki te Atua o o ratou mātua.
- 5
- I whakaritea ano hoki e ia he kai whakarite whakawa mo te whenua ki nga pa taiepa katoa o Hura, ki tenei pa, ki tenei pa.
- 6
- I mea ano ia ki nga kai whakarite whakawa, Kia whai mahara koutou ki ta koutou e mea ai; ehara hoki ta koutou whakarite whakawa i te mea ki te tangata, engari ki a Ihowa; kei a koutou ano ia i te mea e whakarite whakawa ana.
- 7
- Na, kia tau te wehi o Ihowa ki runga i a koutou, kia mau hoki ki te mahi; kahore hoki o to tatou Atua, o Ihowa, whakahaere he, kahore he whakanui i te tangata, kahore he tango utu.
- 8
- I whakaritea ano hoki e Iehohapata ki Hiruharama etahi o nga Riwaiti, o nga tohunga, o nga upoko o nga mātua o Iharaira, mo ta Ihowa whakarite whakawa, mo nga tautohetohenga, i to ratou hokinga ki Hiruharama.
- 9
- I whakahau ano ia i a ratou, i mea, Meatia tenei e koutou i runga i te wehi o Ihowa, i te pono, i te ngakau tapatahi.
- 10
- Ki te tae mai tetahi tautohetohenga ki a koutou, he meatanga na o koutou teina e noho ana i o ratou pa, he toto aha ranei, he toto aha ranei, he ture ranei, he whakaritenga ranei, na he whakahaunga ranei, he tikanga ranei, ka whakatupato koutou i a ratou kia kaua ratou e hara ki a Ihowa, kei takoto he riri mo koutou, mo o koutou tuakana, teina. Meatia tenei, a, e kore koutou e whai hara.
- 11
- Nana, ko Amaria ko te tino tohunga hei upoko mo koutou i nga mea katoa a Ihowa; a, ko Teparia tama a Ihimaera, rangatira o te whare o Hura, mo nga mea katoa a te kingi: ko nga Riwaiti ano hoki hei rangatira i to koutou aroaro. Kia maia ki te mahi, a, ko Ihowa hei hoa mo te pai.
Address: 
Phone: 
Email: