- 1
- Na, i te whitu o nga tau ka whakanuia e Iehoiara he kaha mona; i riro mai hoki i a ia nga rangatira rau, a Ataria tama a Ierohama, a Ihimaera tama a Iehohanana, a Ataria tama a Opere, a Maaheia tama a Araia, a Erihapata tama a Tikiri, hei hoa mona, mea rawa ki te kawenata.
- 2
- Na, haereerea ana e ratou a Hura, a taka noa, huihuia mai ana e ratou nga Riwaiti i roto i nga pa katoa o Hura, ratou ko nga upoko o nga mātua o Iharaira, a, haere mai ana ratou ki Hiruharama.
- 3
- Katahi te whakaminenga katoa ka whakarite kawenata i roto i te whare o te Atua ki te kingi. I mea ano ia ki a ratou, Nana, hei kingi ano te tamaiti a te kingi, hei pera ano me ta Ihowa i korero ai mo nga tama a Rawiri.
- 4
- Ko tenei ta koutou e mea ai, Ko te tuatoru o nga wehenga o koutou e haere mai ana i te hapati, ara, o nga tohunga, o nga Riwaiti, hei kai tiaki ratou mo nga kuwaha.
- 5
- Ko tetahi o nga wehenga e toru hei te whare o te kingi; a, ko tetahi o nga wehenga e toru hei te kuwaha o te turanga; ko te iwi katoa ano hoki hei nga marae o te whare o Ihowa.
- 6
- Kaua hoki tetahi e haere ki roto ki te whare o Ihowa, ko nga tohunga anake, ratou ko te hunga o nga Riwaiti e minita ana. Ko ratou e haere ki roto, no te mea e tapu ana ratou. Ko te iwi katoa ano hoki hei tiaki i nga mea a Ihowa.
- 7
- Na, me karapoti te kingi e nga Riwaiti i tetahi taha, i tetahi taha; hei tona ringa ano hoki te patu a tenei, a tenei; a, ki te haere tetahi ki roto ki te whare, me whakamate. Hei te taha ano hoki koutou o te kingi i tona haerenga atu, i tona haerenga mai.
- 8
- Na, ka meatia e nga Riwaiti ratou ko Hura katoa nga mea katoa i whakahaua e Iehoiara tohunga, a ka mau ratou ki ana tangata, ki ana tangata, ki nga mea e haere ana ki roto i te hapati, ki te hunga ano hoki e haere ana ki waho i te hapati; kihai hoki a Iehoiara te tohunga i tuku i nga wehenga kia haere.
- 9
- A, i homai ano e Iehoiara tohunga ki nga rangatira rau nga tao, nga pukupuku, me nga whakapuru tao a Kingi Rawiri; i roto hoki aua mea i te whare o te Atua.
- 10
- I whakaturia ano e ia te iwi katoa, me a ratou patu ano i te ringa o tenei, o tenei, i te koki ki matau o te whare, tae noa ki te koki ki maui o te whare, i nga taha o te aata, o te whare, hei karapoti mo te kingi.
- 11
- Katahi ka kawea mai e ratou te tama a te kingi, potaea iho ki a ia te karauna; a, homai ana te whakaaturanga ki a ia. Na, whakakingitia ana ia e ratou, i whakawahia ano ia e Iehoiara ratou ko ana tama, me ta ratou karanga ano, Kia ora te kingi.
- 12
- A, te rongonga o Ataria i te nge o te iwi e rere ana, e whakamoemiti ana ki te kingi, na ka haere mai ia ki te iwi ki te whare o Ihowa.
- 13
- Heoi tana tirohanga mai, na, ko te kingi e tu ana i te taha o tona pou i te tomokanga atu, ko nga rangatira ano me nga tētere i te taha o te kingi, me te iwi katoa ano hoki o te whenua e koa ana, e whakatangi ana i nga tētere, me nga kai waiata e mea ana i nga mea rangi waiata, me nga kai whakaako ki te whakamoemiti. Na, kei te haehae a Ataria i ona kakahu, ka karanga ake, he hē! he hē, te whakatakotoria nei.
- 14
- Katahi a Iehoiara tohunga ka kawe mai i nga rangatira rau, i nga kaitohu i te ope ki waho; a ka mea ki a ratou, Kawea atu ki waho i nga rarangi, a, te tangata e haere ana i muri i a ia, me whakamate ki te hoari: i ki hoki te tohunga, Kaua ia e whakamatea i roto i te whare o Ihowa.
- 15
- Na, ka pa o ratou ringa ki a ia, a, tona taenga atu ki te tomokanga atu o te kuwaha hoiho i te taha o te whare o te kingi, whakamatea iho ia ki reira e ratou.
- 16
- Katahi ka whakaritea e Iehoiara he kawenata, he mea nana, na te iwi katoa, ratou ko te kingi, kia meinga ratou hei iwi mo Ihowa.
- 17
- Na, haere ana te iwi katoa ki te whare o Paara, wahia iho e ratou; mongamonga noa i a ratou ana aata, ona ahua; patua iho hoki e ratou a Matana tohunga o Paara ki mua i nga aata.
- 18
- I whakarite kai tirotiro ano hoki a Iehoiara mo te whare o Ihowa, he mea tuku atu ki nga tohunga, ki nga Riwaiti, i wehea nei e Rawiri ki roto ki te whare o Ihowa hei whakaeke i nga tahunga tinana a Ihowa, ko te mea hoki ia i tuhituhia i roto i te ture a Mohi; me te koa ano ratou, me te waiata; ko ta Rawiri hoki ia i whakarite ai.
- 19
- I whakaturia ano e ia he kai tiaki kuwaha mo nga kuwaha o te whare o Ihowa, kei haere ki roto te tangata e poke ana i tetahi mea.
- 20
- I tikina ano hoki e ia nga rangatira rau, nga tangata nunui, ratou ko nga kawana o te iwi, ko te iwi katoa ano hoki o te whenua, a, kawea ana e ratou te kingi ki raro i te whare o Ihowa, haere mai ana na to runga kuwaha ki te whare o te kingi. Whakanohoia ana e ratou te kingi ki te torona o te kingitanga.
- 21
- Na, koa tonu te iwi katoa o te whenua, a, marire noa iho te pa, i a Ataria ka whakamatea nei e ratou ki te hoari.
Address: 
Phone: 
Email: