- 1
- E rua tekau ma rima nga tau o Hetekia i tona kingitanga ai, a, e rua tekau ma iwa nga tau i kingi ai ia ki Hiruharama. Na, te ingoa o tona whaea ko Apia, he tamahine na Hakaraia.
- 2
- A, he tika tana mahi ki ta Ihowa titiro, i rite ki nga mea katoa i mea ai tona pāpā a Rawiri.
- 3
- I te tuatahi o nga tau o tona kingitanga ai, i te marama tuatahi, ka uakina e ia nga tatau o te whare o Ihowa, hangā ana e ia kia pai.
- 4
- I kawea mai ano e ia nga tohunga ratou ko nga Riwaiti, huihui rawa ratou ki te huarahi ki te rawhiti.
- 5
- Na, ko tana meatanga atu ki a ratou, Whakarongo mai, e nga Riwaiti, whakatapua koutou, whakatapua hoki te whare o Ihowa, o te Atua o o koutou mātua, maua mai hoki te mea poke i roto i te wahi tapu.
- 6
- I hē hoki o tatou mātua, i mahi i te kino ki te titiro mai a Ihowa a to tatou Atua. Whakarerea ake ia e ratou, tahuri ke atu ana o ratou aroaro i te tapenakara o Ihowa; hurihia ake e ratou ko o ratou tuara.
- 7
- Ko nga tatau ano hoki o te whakamahau, i tutakina e ratou; tineia iho e ratou nga rama, kihai hoki he whakakakara i tahuna e ratou; kahore ano hoki he tahunga tinana i whakaekea e ratou i roto i te wahi tapu ki te Atua o Iharaira.
- 8
- Koia te riri a Ihowa i anga mai ai ki a Hura raua ko Hiruharama, a, tukua atu ana ratou e ia ki te raruraru, hei mea e miharotia, e whakahīa mai, hei penei ano me ta o koutou kanohi e kite nei.
- 9
- Na, kua hinga nei o tatou mātua i te hoari; ko te mea ano tenei i whakarautia ai a tatou tamariki, a tatou tamahine, me a tatou wahine.
- 10
- Na, ko ta toku ngakau tenei, kia whakaritea he kawenata ki a Ihowa Atua o Iharaira, kia tahuri atu ai i a tatou tana riri e mura nei.
- 11
- E aku tamariki, kaua koutou e mangere, he mea whiriwhiri nei hoki koutou na Ihowa hei tu ki tona aroaro, hei mahi ki a ia, hei minita ki a ia, hei tahu whakakakara.
- 12
- Katahi ka whakatika nga Riwaiti, a Mahata tama a Amahai, a Hoere tama a Ataria, no nga tama a nga Kohati: a, o nga tama a Merari, ko Kihi tama a Apari, ko Ataria tama a Ieharereere: a, o nga Kerehoni, ko Ioaha tama a Tima, ko Erena tama a Ioaha:
- 13
- Na, o nga tama a Eritapana, ko Himiri, ko Teiere: a, o nga tama a Ahapa, ko Hakaraia, ko Matania;
- 14
- Na, o nga tama a Hemana, ko Tehiere, ko Himei: a, o nga tama a Ierutunu, ko Hemaia, ko Utiere.
- 15
- Na, huihuia ana e ratou o ratou tuakana, teina, kei te whakatapu ratou i a ratou, haere mai ana hei whakaritenga mo ta te kingi whakahau, mo ta Ihowa i ki ai, haere ana ratou ki te pure i te whare o Ihowa.
- 16
- Na, haere ana nga tohunga ki roto rawa i te whare o Ihowa ki te tahi i te poke, a whakaputaina mai ana e ratou ki waho nga mea poke katoa i kitea i roto i te temepara o Ihowa ki te marae o te whare o Ihowa. Na, tangohia atu ana e nga Riwaiti, kawea atu ana ki waho ki Awa Kitirono.
- 17
- No te ra tuatahi o te marama tutahi i timata ai ratou te whakatapu, a, no te waru o nga ra o te marama i tae ai ratou ki te whakamahau o Ihowa. Na, whakatapua ana e ratou te whare o Ihowa, e waru nga ra; a, no te tekau ma ono o nga ra o te marama tuatahi i oti ai.
- 18
- Na, haere mai ana ratou ki roto ki te kingi, ki a Hetekia, a ka mea, Kua tahia e matou te poke o te whare o Ihowa, te aata tahunga tinana, me ona mea katoa, te tepu taro aroaro, me ona mea katoa.
- 19
- Na, nga oko katoa i akiritia atu e Kingi Ahata i tona kingitanga, i tona heanga ra, kua oti i a matou te whakapai, te whakatapu. Nana, aua mea ra kei te aronga o te aata o Ihowa.
- 20
- Heoi kua maranga wawe a Kingi Hetekia i te ata, huihuia ana e ia nga rangatira o te pa, haere ana ia ki runga ki te whare o Ihowa.
- 21
- A ka kawea mai e ratou nga puru e whitu, nga hipi toa e whitu, nga reme e whitu, nga koati toa e whitu, hei whakahere hara mo te kingitanga, mo te wahi tapu, mo Hura, Na, kiia atu ana e ia nga tohunga nga tama a Arona kia whakaekea ki runga ki te aata o Ihowa.
- 22
- Na, patua ana e ratou nga kau, a ka riro mai nga toto i nga tohunga, tauhiuhia atu ana e ratou ki te aata. I patua ano e ratou nga hipi toa, tauhiuhia atu ana nga toto ki te aata. Patua ana ano e ratou nga reme, a, tauhiuhia ana nga toto ki te aata.
- 23
- Katahi ka kawea mai e ratou nga koati toa hei whakahere hara ki te aroaro o te kingi ratou ko te whakaminenga, pokia iho o ratou ringa ki runga ki a ratou.
- 24
- Katahi ka patua e nga tohunga, whakaherea ana o ratou toto mo nga hara ki runga ki te aata, hei whakamarietanga mo Iharaira katoa: na te kingi hoki i ki mo Iharaira katoa te tahunga tinana me te whakahere hara.
- 25
- I whakaturia ano hoki e ia nga Riwaiti ki te whare o Ihowa, he himipora ano ā ratou, he hatere, he hāpa; ko ta Rawiri hoki ia i whakahau ai, ratou ko Kara ko te matakite a te kingi, ko Natana poropiti ano hoki: na Ihowa hoki te whakahau, he mea whakapuaki mai na ana poropiti.
- 26
- Tu ana tera nga Riwaiti, kei a ratou ano hoki nga mea whakatangi a Rawiri, me nga tohunga ano, he hunga mau tētere.
- 27
- Katahi a Hetekia ka ki atu kia whakaekea te tahunga tinana ki runga ki te aata. Na, i te wa i timata ai te tahunga tinana, ka timataia ano te waiata a Ihowa, me nga tētere, me nga mea whakatangi ano a Rawiri kingi o Iharaira.
- 28
- Na, koropiko katoa ana te whakaminenga, waiata ana nga kai waiata, whakatangihia ana nga tētere: ko tenei katoa, a, mutu noa te whakaeke.
- 29
- A, te mutunga o te whakaeke, ka tuohu te kingi ratou ko ona hoa katoa i reira, a koropiko ana.
- 30
- I ki mai ano a Kingi Hetekia, ratou ko nga rangatira, ki nga Riwaiti kia whakamoemiti ki a Ihowa; hei nga kupu ano a Rawiri raua ko Ahapa matakite. Na, kei te whakamoemiti ratou; koa tonu; tuohu ana ratou, koropiko ana ano.
- 31
- Katahi a Hetekia ka oho mai, ka mea, Na, kua whakatapua nei koutou ki a Ihowa, neke mai, kawea mai nga patunga tapu, me nga whakawhetainga ki te whare o Ihowa. Na, kei te kawe mai te whakaminenga i nga patunga tapu, i nga whakawhetainga, a, he tahunga tinana ano ta nga ngakau hihiko katoa.
- 32
- Na, te maha o nga tahunga tinana, i kawea mai nei e te whakaminenga, e whitu tekau nga kau, kotahi rau nga hipi toa, e rua rau nga reme. Enei katoa hei tahunga tinana ki a Ihowa.
- 33
- Na, nga mea i whakatapua, e ono rau nga kau, e toru mano nga hipi.
- 34
- Otiia he torutoru nga tohunga, kihai hoki i kaha ki te tihore i nga tahunga tinana katoa. Na, ka pikitia mai ratou e o ratou teina, e nga Riwaiti, a oti noa te mahi, kia oti ra ano te whakatapu o etahi atu tohunga; engari hoki nga Riwaiti i nga tohunga, i tika o ratou ngakau ki te whakatapu i a ratou.
- 35
- He tini ano hoki nga tahunga tinana, me te ngako ano o nga marietanga, me nga ringihanga ano mo nga tahunga tinana. Na, kua oti te mahi o te whare o Ihowa te whakatika.
- 36
- Na, koa tonu a Hetekia ratou ko te iwi katoa, no te mea kua oti te iwi te whakaanga mai e te Atua; he mea oho tata hoki tenei.
Address: 
Phone: 
Email: