- 1
- Te otinga o tenei katoa, ka haere atu a Iharaira katoa i reira ki nga pa o Hura, a, pakarua ana e ratou nga pou karakiatanga, tuaina ana e ratou nga ngahere, whakahoroa ana e ratou nga wahi tiketike me nga aata puta noa i Hura, i Peniamine, i Eperaima, i Manahe, a poto noa. Na, hoki ana nga tamariki katoa a Iharaira ki tona kāinga, ki tona kāinga, ki o ratou pa.
- 2
- I whakaritea ano hoki e Hetekia nga wehenga o nga tohunga ratou ko nga Riwaiti, ara, o ratou wehenga ano, he mea rite tonu ki te mahi a tenei, a tenei, ko nga tohunga ratou ko nga Riwaiti ki nga tahunga tinana, ki nga whakamarietanga, hei minita, hei whakawhetai, hei whakamoemiti i roto i nga kuwaha o nga nohoanga o Ihowa.
- 3
- I whakaritea ano e ia ta te kingi wahi i roto i ona taonga mo nga tahunga tinana, ara, mo nga tahunga tinana o te ata, o te ahiahi, mo nga tahunga tinana mo nga hapati, mo nga kowhititanga marama, mo nga wa i whakaritea; he mea rite tonu ki te mea i tuhituhia ki te ture a Ihowa.
- 4
- I mea ano ia ki te iwi, ki nga tangata o Hiruharama, kia homai te wahi ma nga tohunga ratou ko nga Riwaiti, kia u ai ratou ki te ture a Ihowa.
- 5
- Puaki kau te kupu, ka kawea nuitia mai e nga tamariki a Iharaira nga matamua o te witi, o te waina, o te hinu, o te honi, me nga hua katoa ano hoki o te mara; tona nui ano hoki o te whakatekau o nga mea katoa i kawea mai e ratou.
- 6
- Na, nga tamariki a Iharaira, a Hura, e noho ana i nga pa o Hura, i kawea mai ano e ratou te whakatekau o nga kau, o nga hipi, me te whakatekau o nga mea tapu i whakatapua nei ma Ihowa ma to ratou Atua, homai ana e ratou tenei puranga, tenei puranga.
- 7
- No te toru o nga marama i timata ai ta ratou whakatu i nga puranga, no te whitu o nga marama i mutu ai.
- 8
- Katahi ka haere mai a Hetekia ratou ko nga rangatira kia kite i nga puranga, a, whakapai ana ratou i a Ihowa, i tona iwi ano hoki i a Iharaira.
- 9
- Katahi ka uia nga tohunga ratou ko nga Riwaiti e Hetekia mo nga puranga.
- 10
- Na, ka korero mai ki a ia a Ataria te tino tohunga, no te whare o Haroko, ka mea mai, No te timatanga o ta ratou kawe mai i nga whakahere ki te whare o Ihowa, ka kai matou, ka makona, nui atu hoki te toenga; e manaakitia ana hoki tona iwi e Ihowa. Na, te toenga, ko tenei haupuranga nui nei.
- 11
- Katahi a Hetekia ka ki kia whakapaia etahi ruma ki te whare o Ihowa. Na, whakapaia ana e ratou.
- 12
- A, kawea atu ana e ratou ki roto nga whakahere, nga whakatekau, nga mea i whakatapua; pono tonu ta ratou: te kai tiaki o aua mea, ko Konania Riwaiti; tona tuarua, ko tona teina ko Himei.
- 13
- Ko Tehiere ano hoki, ko Ataria, ko Nahata, ko Atahere, ko Terimoto, ko Iotapara, ko Eriere, ko Ihimakia, ko Mahata, ko Penaia hei kai tirotiro, i raro ano i a Konania raua ko tona teina ko Himei, he mea ki mai na Kingi Hetekia raua ko Ataria ko te rangatira o te whare o te Atua.
- 14
- Na, ko Kore tama a Imina Riwaiti kai tiaki o te kuwaha ki te rawhiti, hei kai tiaki mo nga mea homai noa o te Atua, hei tuwha i nga whakahere o Ihowa, i nga mea tapu rawa ano hoki.
- 15
- Na, i tona taha ko Erena, ko Miniamini, ko Hehua, ko Hemaia, ko Amaria, ko Hekania, i roto i nga pa o nga tohunga, ki ta ratou mahi tūturu ano, hei tuwha mai ma o ratou tuakana, teina, ma nga wehenga, ma te rahi, ma te iti.
- 16
- Huihuia atu ki to ratou pukapuka whakapapa ki to nga tane, ki to nga mea e toru, he maha atu ano hoki nga tau, ma te hunga katoa e haere ana ki roto ki te whare o Ihowa, te mea mo tenei ra, mo tenei ra, mo ta ratou mahi, puta noa i o ratou tiakanga, i o ratou wehenga;
- 17
- Ki o te pukapuka whakapapa o nga tohunga puta noa i nga whare o o ratou mātua, ratou ko nga Riwaiti, ki te hunga e rua tekau, e maha atu hoki nga tau, puta noa i o ratou tiakanga, i o ratou wehenga;
- 18
- Ki o te pukapuka whakapapa ano o a ratou kohungahunga katoa, o a ratou wahine, o a ratou tamariki, o a ratou tamahine, puta noa i te whakaminenga katoa; i runga hoki i te tapu ta ratou whakatapunga i a ratou ki ta ratou mahi tūturu:
- 19
- Ki nga tamariki ano hoki a Arona, ki nga tohunga i nga mara i waho ake o o ratou pa, o tenei pa, o tenei pa, a puta noa, ki nga tangata kua oti o ratou ingoa te whakahua, hei homai i ta ratou wahi ano ki nga tane katoa i roto i nga tohunga, ki te hunga katoa ano hoki i roto i nga Riwaiti kua oti te whakapapa.
- 20
- Ko ta Hetekia mahi tenei puta noa i a Hura; mahia ana e ia te pai, te tika, me te pono i te aroaro o Ihowa o tona Atua.
- 21
- I nga meatanga katoatanga, i a ia ka anga nei ki nga mahi o te whare o te Atua, ki te ture, ki nga whakahaunga, a ka rapu i tona Atua, i whakapaua atu tona ngakau ki te mahi, a oti pai ana tana.
Address: 
Phone: 
Email: