- 1
- I muri iho i enei mea, i te mea ka ata takoto, ka haere mai a Henakeripi kingi o Ahiria, tae tonu mai ki Hura, whakapaea ana e ia nga pa taiepa; i mea hoki ia kia wahia atu ki a ia.
- 2
- A, te kitenga o Hetekia kua tae mai a Henakeripi, a, e anga mai ana ki te whawhai ki Hiruharama,
- 3
- Na, ka whakatakoto whakaaro ratou ko ana rangatira, ko ana tangata marohirohi, kia purua nga wai o nga puna i waho o te pa; a, ko ratou hei hoa mahi mona.
- 4
- Na, nui atu te iwi i huihui mai, a, purua ana e ratou nga puna katoa, me te awa e rere ana i waenganui o te whenua; i ki hoki ratou, Kia haere mai koia nga kingi o Ahiria, a kia nui te wai e kitea e ratou?
- 5
- I whakanuia ano hoki e ia tona kaha, a, hangā ana e ia te taiepa katoa i pakaru, a, eke noa ki nga pourewa; me tetahi atu taiepa ano i waho, whakakahangia ana ano e ia a Miro i te pa o Rawiri: he tini ano hoki nga pere me nga whakangungu rakau i hangā e ia.
- 6
- I whakaritea ano e ia he rangatira whawhai mo te iwi; a, huihuia mai ana ratou ki a ia ki te huarahi o te kuwaha o te pa. Na, ka korero whakamarie atu ki a ratou, ka mea,
- 7
- Kia kaha, kia maia, kaua e wehi, kaua e pawera ki te kingi o Ahiria, ki tana ope katoa: hira ake hoki ta tatou i tana.
- 8
- Tana, he ringa kikokiko; ta tatou ia, ko Ihowa ko to tatou Atua hei awhina mai mo tatou, hei whawhai i ta tatou whawhai. Na, okioki tonu atu te iwi ki nga kupu a Hetekia kingi o Hura.
- 9
- I muri i tenei ka ungā mai āna tangata e Henakeripi kingi o Ahiria ki Hiruharama: (ko ia ano i te whakapae i Rakihi, a, ko tona kingitanga katoa hei hoa mona;) hei mea ki a Hetekia kingi o Hura, ki a Hura katoa ano hoki i Hiruharama.
- 10
- Ko te kupu tenei a Henakeripi kingi o Ahiria, E whakawhirinaki atu ana koutou ki te aha, i a koutou ka noho i roto i te wahi taiepa i Hiruharama?
- 11
- He teka ianei he whakapati ta Hetekia i a koutou, he mea kia tukua atu ai koutou ki te mate i te kore kai i te kore wai, i a ia e ki ra, Tera tatou e whakaorangia e Ihowa e to tatou Atua i te ringa o te kingi o Ahiria?
- 12
- He teka ianei na taua Hetekia nei i whakakore ona wahi tiketike, me ona aata, a ki ana ia ki a Hura raua ko Hiruharama, mea ana, Hei mua i te aata kotahi koutou koropiko ai, ki runga ano i tenei koutou tahu ai i te whakakakara.
- 13
- Kahore ranei koutou e mohio ki nga mea i mea ai ahau me oku mātua ano hoki, ki nga iwi katoa o nga whenua nei? i taea ranei e nga atua o nga iwi o aua whenua te whakaora to ratou whenua i toku ringa?
- 14
- Ko wai o nga atua o enei iwi i hunā nei e oku mātua i kaha ki te whakaora i tona iwi i roto i toku ringa, e kaha ai to koutou Atua ki te whakaora i a koutou i roto i toku ringa?
- 15
- Na, kei tinihangatia koutou e Hetekia, kei whakapati hoki ia i a koutou, kei pera me tana na; kaua hoki e whakapono atu ki a ia; no te mea kihai i kaha tetahi atua o nga iwi o nga kingitanga katoa ki te whakaora i tona iwi i roto i toku ringa, i te ringa ano hoki o oku mātua; e kore rawa ano hoki to koutou Atua e whakaora i a koutou i roto i toku ringa.
- 16
- Tera atu ano hoki ta ana tangata i korero kino ai mo te Atua, mo Ihowa, mo tana tangata ano, mo Hetekia.
- 17
- I tuhituhia mai ano e ia etahi pukapuka hei whakorekore mo Ihowa Atua o Iharaira, hei korero kino mona; i ki ia, Kihai nei nga atua o nga iwi o nga whenua i kaha ki te whakaora i o ratou iwi i roto i toku ringa, e kore ano hoki te Atua o Hetekia e whakaora i tona iwi i roto i toku ringa.
- 18
- Na, nui atu ta ratou karanga i te reo Hurai ki te iwi o Hiruharama i runga i te taiepa hei whakawehi i a ratou, hei whakararuraru i a ratou, he mea kia riro mai ai i a ratou te pa.
- 19
- Na, ta ratou korero mo te Atua o Hiruharama, rite tonu ki ta ratou mo nga atua o nga iwi o te whenua, he mahi nei hoki enei na nga ringa o te tangata.
- 20
- Na, kei te inoi, kei te karanga ki te rangi a Kingi Hetekia raua ko te poropiti ko Ihaia tama a Amoho, he meatanga hoki na raua ki tenei.
- 21
- Na, ko te tukunga mai a Ihowa i te anahera, hautopea atu ana e ia nga toa marohirohi katoa, ratou ko nga rangatira, ko nga tangata nunui, i roto i te puni o te kingi o Ahiria. Na, hoki ana ia ki tona whenua; whakama ana tona mata. Haere mai ana ia ki te whare o tona atua, na, patua iho ia i reira ki te hoari e te hunga i puta mai i roto i ona whekau.
- 22
- Heoi whakaorangia ake a Hetekia ratou ko nga tangata o Hiruharama e Ihowa i te ringa o Henakeripi kingi o Ahiria, i te ringa ano hoki o era atu katoa, arahina ana ratou e ia i tetahi taha, i tetahi taha.
- 23
- He tokomaha ano hoki ki te kawe mai i te hakari ki a Ihowa ki Hiruharama, i nga mea utu nui ano hoki ki a Hetekia kingi o Hura; na, kake tonu ake ia i reira i te tirohanga mai a nga iwi katoa.
- 24
- I aua rangi ka mate a Hetekia, whano marere. Na, ko tana inoinga ki a Ihowa, a ka korero mai tera ki a ia, ka homai ano i te tohu ki a ia.
- 25
- Otiia kihai i rite ki te atawhainga ki a ia ta Hetekia i utu atu ai: i whakakake hoki tona ngakau; na, kua takoto mai he riri mona, mo Hura, mo Hiruharama.
- 26
- Otiia i whakaiti ano a Hetekia i a ia, mo tona ngakau i whakakake ra, a ia, me nga tangata ano o Hiruharama, a kihai te riri a Ihowa i puta mai ki a ratou i nga ra o Hetekia.
- 27
- Na, nui whakaharahara te taonga me te kororia i a Hetekia: a, hangā ana e ia nga toa taonga mo te hiriwa, mo te koura, mo nga kohatu utu nui, mo nga mea kakara, mo nga whakangungu rakau, mo nga mea katoa ano hoki e matenuitia ana,
- 28
- Me nga toa mo nga hua o te witi, o te waina, o te hinu, me nga taiepa mo ia kararehe, mo ia kararehe, me nga taiepa ano mo nga kahui hipi.
- 29
- I hangā ano e ia etahi pa mona, he tini ano hoki nga kahui o nga hipi, o nga kau; he nui whakaharahara hoki te taonga i homai e te Atua ki a ia.
- 30
- Na taua Hetekia ano hoki i puru to runga putanga mai o te wai o Kihona; whakatikaia tonutia mai e ia ki te taha ki te hauauru o te pa o Rawiri. Oti pai ana hoki i a Hetekia ana mahi katoa.
- 31
- I te meatanga ia ki nga karere a nga rangatira o Papurona i ungā mai nei ki a ia ki te ui ki te merekara i puta ki te whenua, i mahue atu ia i te Atua, kia whakamatauria ai ia, kia mohiotia ai nga mea katoa i roto i tona ngakau.
- 32
- Na, era atu meatanga a Hetekia, me ana mahi atawhai, nana, kua oti te tuhituhi ki te whakakitenga ki a Ihaia poropiti tama a Amoho, ki te pukapuka ano hoki o nga kingi o Hura raua ko Iharaira.
- 33
- Na, kua moe a Hetekia ki ona mātua, a, tanumia iho ki to runga rawa o nga urupa o nga tamariki a Rawiri: a, i tona matenga ka whakakororiatia ia e Hura katoa, ratou ko nga tangata o Hiruharama; a, ko tana tama ko Manahe te kingi i muri i a ia.
Address: 
Phone: 
Email: