- 1
- No te whitu o nga tau o Iehu i kingi ai a Iehoaha, a, e wha tekau ona tau i kingi ai ia ki Hiruharama. Na, te ingoa o tona whaea, ko Tipia o Peere-hepa.
- 2
- A, tika tonu nga mahi a Iehoaha ki te titiro a Ihowa i ona ra katoa i tohutohungia ai ia e Iehoiara tohunga.
- 3
- Ko nga wahi tiketike ia kihai i whakakahoretia: i patu whakahere ano hoki te iwi, i tahu whakakakara ki runga ki nga wahi tiketike.
- 4
- Na, i mea a Iehoaha ki nga tohunga, Te moni katoa o nga mea e whakatapua ana, e kawea ana ki roto ki te whare o Ihowa, te moni o nga tangata e haere atu ana i te tauanga, te moni e whakaritea ai tenei tangata, tenei tangata, nga moni katoa e puta ake i roto i te ngakau o tetahi tangata kia kawea ki roto ki te whare o Ihowa.
- 5
- Me tango mai e nga tohunga i tana tangata i mohio ai, i tana tangata i mohio ai, a, ma ratou e hanga nga wahi pakaru o te whare i nga wahi katoa e kitea ai he pakaru.
- 6
- Heoi i te rua tekau ma toru o nga tau o Kingi Iehoaha kahore ano i hangā nga wahi pakaru o te whare e nga tohunga.
- 7
- Na, ko te karangatanga atu a Kingi Iehoaha ki a Iehoiara tohunga, ratou ko nga tohunga, te meatanga atu ki a ratou, He aha koutou tē hanga ai i nga wahi pakaru o te whare? Na, kati to koutou tango hiriwa i a koutou tangata i mohio ai; engari me homai mo nga wahi pakaru o te whare.
- 8
- Na, whakaae mai ana nga tohunga kia kaua ratou e tango moni i te iwi, kia kaua hoki e hangā e ratou nga wahi pakaru o te whare.
- 9
- Na, ka mau a Iehoiara ki tetahi pouaka, a, pokaia ana e ia he kohao ki tona taupoki, whakatakotoria ana ki te taha o te aata, ki te taha ki matau, i te mea ka haere tetahi tangata ki roto ki te whare o Ihowa, a, tukua iho ki roto ki taua mea e nga tohunga tiaki o te tatau nga moni katoa i kawea mai ki te whare o Ihowa.
- 10
- A ka kitea kua nui te moni i roto i te pouaka, na, ka haere mai te kai tuhituhi a te kingi raua ko te tino tohunga, a takaia ana e raua taua ana te moni i kitea i roto i te whare o Ihowa.
- 11
- Na, hoatu ana e ratou te moni i paunatia ra ki nga ringa o nga kai mahi i te mahi, o nga kai tohutohu i te whare o Ihowa: a na ratou i wahi atu ki nga kamura ki nga kai hanga i mahia ai te whare o Ihowa,
- 12
- Ki nga kai mahi kohatu, ki nga kai tarai kohatu; hei hoko ano hoki i nga rakau, i nga kohatu tarai, hei hanga mo nga wahi pakaru o te whare o Ihowa, hei utu ano hoki mo nga mea katoa i riro hei hanga mo te whare.
- 13
- Heoi kihai i hangā he kapa hiriwa mo te whare o Ihowa, he kuku, peihana, tētere, oko koura, oko hiriwa, ki te moni i kawea mai ki te whare o Ihowa.
- 14
- Engari i hoatu e ratou ki nga kai mahi i te mahi, hei hanga mo te whare o Ihowa.
- 15
- Kihai hoki i uiuia e ratou nga meatanga a aua tangata i hoatu nei e ratou te moni ki o ratou ringa kia hoatu ki nga kai mahi i te mahi; he pono hoki to ratou mahi.
- 16
- Te moni mo te he, me te moni mo te hara, kihai i kawea e ratou ki te whare o Ihowa: i nga tohunga tena.
- 17
- Na, kua haere mai a Hataere kingi o Hiria, whawhai ana ki Kata; horo ana i a ia. Katahi ka anga te kanohi o Hataere, ka mea ki te haere ki runga ki Hiruharama.
- 18
- Na, ka mau a Iehoaha kingi o Hura ki nga mea tapu katoa i whakatapua nei e ona mātua, e Iehohapata, e Iehorama, e Ahatia, e nga kingi o Hura, ki ana mea tapu ano hoki, me te koura katoa i kitea i roto i nga toa taonga o te whare o Ihowa, o te whare ano hoki o te kingi, a, tonoa ana e ia kia kawea ki a Hataere kingi o Hiria. Na, haere atu ana ia i Hiruharama.
- 19
- Na, era atu meatanga a Ioaha, me ana mahi katoa, kahore ianei i tuhituhia ki te pukapuka o nga meatanga o nga ra o nga kingi o Hura?
- 20
- Na, ka whakatika ana tangata, a, whakatupuria ana e ratou he hē mona. Na, patua iho e ratou a Ioaha ki te whare o Miro i te heketanga iho ki Hira.
- 21
- Na āna tangata hoki, na Iotaka tama a Himeata, raua ko Iehotapara tama a Homere ia i patu, a mate iho. Na, tanumia iho ia e ratou ki ona mātua ki te pa o Rawiri, a, ko Amatia ko tana tama hei kingi i muri i a ia.
Address: 
Phone: 
Email: