- 1
- No te tekau ma rua o nga tau o Ahata kingi o Hura i kingi ai a Hohea tama a Eraha ki Hamaria ki a Iharaira: e iwa nga tau.
- 2
- I kino ano tana mahi ki te titiro a Ihowa; otiia kihai i rite ki ta nga kingi o Iharaira i mua i a ia.
- 3
- I whakaekea mai ia e Harama-nehere kingi o Ahiria: na, kua meinga a Hohea hei pononga māna; a, hoatu ana e ia he hakari ki a ia.
- 4
- Na, ka mau i te kingi o Ahiria te he e whakatupuria ana e Hohea, i tana ngarenga i etahi tangata ki a Ho kingi o Ihipa, kihai ano hoki i kawea atu e ia ki te kingi o Ahiria te hakari i kawea e ia i era atu tau. Na, tutakina atu ana ia e te kingi o Ahiria, hereherea ana ki roto ki te whare herehere.
- 5
- Katahi ka whakaekea mai te whenua katoa e te kingi o Ahiria, whakaekea ana Hamaria e ia, whakapaea ana, e toru nga tau.
- 6
- I te iwa o nga tau o Hohea ka horo Hamaria i te kingi o Ahiria; whakahekea atu ana e ia a Iharaira ki Ahiria, whakanohoia ana ki Hara, ki Haporo i te taha o Awa Kotana, ki nga pa ano hoki o nga Meri.
- 7
- He mea hoki kua hara nga tamariki a Iharaira ki a Ihowa, ki to ratou Atua, nāna nei ratou i kawe mai i te whenua o Ihipa i raro i te ringa o Parao kingi o Ihipa, kua wehi ano hoki i nga atua ke;
- 8
- A, haere ana i runga i nga tikanga o nga iwi i peia nei e Ihowa i mua i nga tamariki a Iharaira, o nga kingi ano hoki o Iharaira i whakakingitia nei e ratou.
- 9
- Meatia pukutia ana hoki e nga tamariki a Iharaira nga mea kihai i tika ki a Ihowa, ki to ratou Atua; i hangā hoki e ratou etahi wahi tiketike ma ratou ki o ratou pa katoa, ki te taumaihi a nga kai tutei, ki te pa whai taiepa.
- 10
- I whakaturia ano hoki e ratou nga whakapakoko, me nga nehenehe ki runga ki nga pukepuke tiketike katoa, ki raro ano hoki i nga rakau kouru nui katoa.
- 11
- Tahuna ana e ratou he whakakakara ki reira, ki runga ki nga wahi tiketike katoa, pera ana ratou me nga iwi i whakahekea atu nei e Ihowa i mua i a ratou; meatia ana e ratou nga mea kino hei whakapataritari i a Ihowa.
- 12
- Mahi ana ratou ki nga whakapakoko i korerotia ra e Ihowa ki a ratou, Kaua tenei mea e meatia e koutou.
- 13
- Heoi whakaaturia ana ano e Ihowa te he o Iharaira, o Hura, he mea korero na nga poropiti katoa, na nga matakite katoa; i ki ia, Hoki mai i o koutou ara he, puritia aku whakahaunga me aku tikanga; kia rite ki te ture katoa i whakahaua e ahau ki o koutou mātua, ki taku ano hoki i unga atu ai ki a koutou, he mea korero na aku pononga, na nga poropiti.
- 14
- Heoi kihai ratou i whakarongo; whakapakeke ana ratou i o ratou kaki, kia pera me nga kaki o o ratou mātua, kihai nei i whakapono ki a Ihowa, ki to ratou Atua.
- 15
- Whākorekore ana ratou ki ana tikanga ki tana kawenata i whakaritea e ia ki o ratou mātua, ki ana whakaaturanga ano hoki i whakaaturia e ia mo o ratou he, a, haere ana ki te whai i nga mea tekateka noa, a, teka noa iho ratou; arumia ana e ratou nga iwi i tetahi taha o ratou, i tetahi taha, era i ako mai ra a Ihowa ki a ratou, kia kaua e rite te mahi ki ta ratou.
- 16
- I whakarerea hoki e ratou nga whakahaunga katoa a Ihowa a to ratou Atua, a, hangā ana e ratou nga whakapakoko whakarewa ma ratou, nga kuao kau e rua: i meatia ano hoki e ratou tetahi nehenehe, a, koropiko ana ki te ope katoa o te rangi; i mahi ano ratou ki a Paara.
- 17
- I meinga ano hoki e ratou a ratou tamariki me a ratou tamahine kia tika na waenganui i te ahi; i whakaaro ki nga tohu, ki nga karakia maori; i hoko atu ano hoki i a ratou hei mahi i te kino ki te titiro a Ihowa, hei whakapataritari i a ia.
- 18
- No reira nui atu te riri o Ihowa ki a Iharaira, a, nekehia atu ana ratou e ia i tona aroaro, kihai hoki tetahi i mahue, ko te iwi anake o Hura.
- 19
- Me Hura ano hoki, kihai ratou i pupuri i nga whakahaunga a Ihowa, a to ratou Atua, heoi haere ana i runga i nga tikanga i whakatakotoria e Iharaira.
- 20
- Na, whakakorekore ana a Ihowa ki nga uri katoa o Iharaira, whakawhuia ana ratou e ia, hoatu ana ki nga ringa o nga kai pahua, a, makā noatia atu ratou i tona aroaro.
- 21
- I titorehia atu hoki a Iharaira e ia i roto i te whare o Rawiri, a, meinga ana e ratou a Ieropoama tama a Nepata hei kingi. Na, turakina atu ana a Iharaira e Ieropoama kia kaua e whai i a Ihowa, a, nui atu te hara i meatia ai ratou e ia kia hara.
- 22
- Na, haere ana nga tamariki a Iharaira i runga i nga hara katoa i hara ai a Ieropoama: kihai i mahue i a ratou.
- 23
- A nekehia noatia atu ra ano a Iharaira e Ihowa i tona aroaro: ko tana hoki tena i ki ai, he mea korero mai na ana pononga katoa, na nga poropiti, Na, ka whakahekea atu a Iharaira i runga i to ratou whenua ki Ahiria, a mohoa noa nei.
- 24
- Na, ka kawea mai he tangata e te kingi o Ahiria i Papurona, i Kutu, i Awa, i Hamata, i Heparawaima, a, whakanohoia ana e ia ki nga pa o Hamaria, ki nga wahi o nga tamariki a Iharaira. Na, kua riro mai a Hamaria i a ratou, a, nohoia ana e ratou nga pa o reira.
- 25
- Na, i te timatanga o ta ratou noho ki reira, kihai ratou i wehi i a Ihowa. Katahi ka ungā e Ihowa etahi raiona ki roto ki a ratou, a, whakamatea iho etahi o ratou.
- 26
- Na, ka korero etahi ki te kingi o Ahiria; i ki atu ratou, Nga iwi i whakahekea atu na e koe, i whakanohoia ra ki nga pa o Hamaria, kahore e matau ki nga whakaritenga a te Atua o te whenua, a, ungā ana e ia he raiona ki a ratou. Na, ka whakamatea mai nei ratou, mo ratou kahore e matau ki nga whakaritenga a te Atua o te whenua.
- 27
- Katahi ka whakahau te kingi o Ahiria, ka mea, Kawea ki reira tetahi o nga tohunga i whakahekea mai nei e koutou i reira; a, ma ratou e haere atu ki reira noho ai, mana hoki ratou e whakaako ki nga whakaritenga a te Atua o te whenua.
- 28
- Katahi ka haere atu tetahi o nga tohunga i whakahekea atu e ratou i Hamaria, a, noho ana ki Pete-ere; ko ia hoki hei kai whakaako i a ratou ki te tikanga mo to ratou wehi i a Ihowa.
- 29
- Otiia i hangā ano toua atua ake e tenei iwi, e tenei iwi, a, whakanohoia ana ki nga whare o nga wahi tiketike i hangā nei e nga Hamari e tenei iwi, e tenei iwi, ki o ratou pa i noho ai ratou.
- 30
- Na nga tangata ano hoki o Papurona i hangā Hukoto-penoto; na nga tangata o Kutu i hangā Nerekara; na nga tangata ano hoki o Hamata i hangā Ahima,
- 31
- Na nga Awi i hangā Nipihata, raua ko Tarataka. I tahuna ano hoki e nga Heparawaimi a ratou tamariki ki te ahi, hei mea ki a Ataramereke raua ko Anamereke atua o Heparawaima.
- 32
- Heoi wehi ana ratou i a Ihowa; me te whakatohunga ano ratou i nga ware hei tohunga ma ratou mo nga wahi tiketike. Ko era hei kaimahi ma ratou mo nga mea tapu i nga whare wahi tiketike.
- 33
- Wehi ana ratou i a Ihowa, me te mahi ano ki o ratou atua: pera ano me nga iwi i whakahekea atu nei e ratou i reira.
- 34
- Rite tonu ki o mua ritenga a ratou mahi, a taea noatia tenei ra; kahore o ratou wehi i a Ihowa, kahore hoki a ratou mahi e rite ki a ratou tikanga, ki a ratou whakariteritenga, ki ta ratou ture, ki te whakahaunga i whakahau ai a Ihowa i nga tamariki a Hakopa, a te tangata i karangatia nei e ia tona ingoa ko Iharaira.
- 35
- I whakaritea na hoki e Ihowa he kawenata ki a ratou, i whakahau hoki ia i a ratou, i mea, Kei wehi koutou i nga atua ke; kaua ano hoki e koropiko ki a ratou, kaua e mahi ki a ratou, kaua e patu whakahere ki a ratou.
- 36
- Engari a Ihowa nāna nei koutou i kawe mai i te whenua o Ihipa i runga i te kaha nui, i te ringa ano hoki kua oti te whakamaro, ko ia ta koutou e wehi ai, ko ia ta koutou e koropiko atu ai; me patu whakahere ano hoki koutou ki a ia.
- 37
- Na, nga tikanga, me nga whakaritenga, me te ture, me te whakahaunga kua oti na te tuhituhi e ia mo koutou, me pupuri e koutou, me mahi i nga ra katoa; kaua hoki e wehi i nga atua ke.
- 38
- Kei wareware hoki i a koutou te kawenata i whakaritea e ahau ki a koutou; kaua ano hoki e wehi ki nga atua ke.
- 39
- Engari ko Ihowa ko ta koutou Atua ta koutou e wehi ai, a, mana koutou e whakaora i roto i te ringa o o koutou hoa riri katoa.
- 40
- Otiia kihai ratou i whakarongo atu; na, rite tonu ki nga ritenga o mua ta ratou i mea ai.
- 41
- Heoi wehi ana aua iwi i a Ihowa, me te mahi ano ki a ratou whakapakoko: ko a ratou tamariki me nga tamariki ano hoki a ā ratou tamariki, rite tonu ta ratou i mea ai ki ta o ratou matua, a taea noatia tenei ra.
Address: 
Phone: 
Email: