- 1
- Na, i te iwa o nga tau o tona kingitanga, i te tekau o nga marama, i te tekau o nga ra o te marama, ka tae mai a Nepukaneha kingi o Papurona, a ia me tana ope katoa ki Hiruharama. Na, nohoia mai ana a reira e ia, a hangā ana e ratou etahi taumaihi ki tetahi taha, ki tetahi taha, hei whawhaitanga ki reira.
- 2
- Na, ka whakapaea te pa, a tae noa ki te tekau ma tahi o nga tau o Kingi Terekia.
- 3
- I te iwa o nga ra o te wha o nga marama ka nui te mate-kai o te pa; kahore hoki he taro ma nga tangata o te whenua.
- 4
- Na, kua pakaru te pa, rere ana nga tangata whawhai katoa i te po na te ara o te kuwaha i waenganui o nga taiepa e rua, na tera i te kāri a te kingi; (i tetahi taha ano hoki nga Karari o te pa, i tetahi taha;) ko te kingi i haere na te ara o te mānia.
- 5
- Katahi te kingi ka whaia e te ope o nga Karari, a, hopukia ana e ratou ki nga mānia i Heriko, i marara noa atu hoki tana ope katoa i tona taha.
- 6
- Ka mau nei te kingi i a ratou, kawea ana ia e ratou ki te kingi o Papurona ki Ripira; a, korerotia ana e ratou te whakawakanga mona.
- 7
- Na, nga tamariki a Terekia, patua iho e ratou ki tana tirohanga iho, nga kanohi e rua hoki o Terekia whakamatapotia ana e ratou: herea ana ia ki nga mekameka parahi, a, kawea atu ana ki Papurona.
- 8
- I te rima o nga marama, i te whitu o nga ra o te marama, ko te tekau ma iwa hoki ia o nga tau o Kingi Nepukaneha kingi o Papurona, ka haere mai a Neputara-arana rangatira o nga kai tiaki, he tangata na te kingi o Papurona, ki Hiruharama.
- 9
- Na, tahuna ake e ia te whare o Ihowa, te whare o te kingi, nga whare katoa o Hiruharama: nga whare katoa o te hunga nunui tahuna ana e ia ki te ahi.
- 10
- Wahia iho ano hoki te taiepa o Hiruharama, a whawhe noa, e te ope katoa o Karari, e ta te rangatira a nga kai tiaki.
- 11
- Na, era atu o te iwi i mahue i te pa, me te hunga i papahoro atu, i taka atu ra ki te kingi o Papurona, me era atu a taua huihuinga tangata, whakahekea atu ana ratou e Neputara-arana rangatira o nga kai tiaki.
- 12
- I mahue ia i te rangatira a nga kai tiaki etahi o nga rawa-kore o te whenua hei kai mahi waina, hei kai mahi whenua.
- 13
- Na, nga pou parahi i te whare o Ihowa, me nga turanga, me te moana parahi i te whare o Ihowa, wawahia ana e nga Karari, a, maua atu ana e ratou te parahi o aua mea ki Papurona.
- 14
- Me nga pāta, me nga koko pungarehu, me nga kuku, me nga koko, me nga oko parahi katoa mo a ratou mahi tapu, tangohia ake e ratou.
- 15
- Nga takotoranga ahi ano hoki, nga peihana, nga aha aha koura, me nga aha aha hiriwa, tangohia ake e te rangatira o nga kai tiaki.
- 16
- Nga pou e rua, kotahi moana, me nga turanga i hangā e Horomona mo te whare o Ihowa. Kahore he paunatanga o te parahi o enei oko katoa.
- 17
- Kotahi tekau ma waru whatianga te roa o tetahi pou, he parahi te whakapaipai o runga, a, e toru nga whatianga te roa o te whakapaipai: he parahi katoa ano hoki te mea i whiria, me nga pamekaranete i tetahi taha o te whakapaipai, i tetahi taha; rite tonu hoki ki enei to te rua a nga pou; he mea whiri ano hoki tona.
- 18
- Tangohia ana hoki e te rangatira o nga kai tiaki a Heraia te tino tohunga, ratou ko te tohunga tuarua ko Tepania, ko nga kai tiaki tokotoru o te kuwaha.
- 19
- I tangohia ano hoki e ia i roto i te pa tetahi unaka, te rangatira o nga tangata whawhai, tokorima ano hoki no te aroaro pu ake o te kingi, he hunga i rokohanga ki roto ki te pa, me te kai tuhituhi a te rangatira ope, te kai huihui i nga tangata o te whenua, e ono tekau ano hoki nga tangata o te iwi o te whenua, he hunga i rokohanga e ia ki roto ki te pa.
- 20
- Na, ka mau a Neputara-arana rangatira o nga kai tiaki ki a ratou, kawea ana ratou ki te kingi o Papurona ki Ripira.
- 21
- Na, patua iho ratou e te kingi o Papurona, whakamatea iho ki Ripira ki te whenua o Hamata. Heoi whakahekea atu ana a Hura i tona oneone.
- 22
- Na, te hunga i mahue ki te whenua o Hura, nga mea i mahue i a Nepukaneha kingi o Papurona, meinga ana e ia ko Keraria tama a Ahikama tama a Hapana, hei kawana mo ratou.
- 23
- A, te rongonga o nga rangatira ope katoa, ratou ko a ratou tangata, kua meinga a Keraria hei kawana e te kingi o Papurona, na, haere mai ana ratou ki a Keraria ki Mitika, ara, a Ihimaera tama a Natania, a Iohanana tama a Karea, a Heraia tama a Tanahumete Netopati, a Iaatania tama a tetahi Maakati, ratou ko a ratou tangata.
- 24
- Katahi a Keraria ka oati ki a ratou, ki ā ratou tangata hoki, ka mea ki a ratou, Kaua e wehi, engari hei pononga koutou ma nga Karari, a, me noho koutou ki te whenua, me mahi ki te kingi o Papurona, a ka whai pai koutou.
- 25
- Na, i te whitu o nga marama ka haere mai a Ihimaera tama a Netania tama a Erihama, he momo kingi, ratou ko ona hoa, kotahi tekau nga tangata, a, patua iho e ratou a Keraria, Whakamatea iho ratou ko ona hoa, ko nga Hurai, ko nga Karari, i Mitipa.
- 26
- Katahi ka whakatika te iwi katoa, te iti, te rahi, ratou ko nga rangatira ope, a, haere ana ki Ihipa. I wehi hoki ratou i nga Karari.
- 27
- Na, i te toru tekau ma whitu o nga tau o te whakahekenga atu o Iehoiakini kingi o Hura, i te tekau ma rua o nga marama i te rua tekau ma whitu o nga ra o te marama, ka whakaarahia e Ewiri-meroraka kingi o Papurona, i te tau i kingi ai ia, te mātenga o Iehoiakini kingi o Hura i roto i te whare herehere.
- 28
- A, he pai ana korero ki a ia, nekehia ake ana e ia tona torona ki runga ake i te torona o nga kingi i tona taha i Papurona.
- 29
- Nga kakahu o tona hereherenga whakariroia ketia ake e ia; a, kai taro tonu ana ia i tona aroaro i nga ra katoa i ora ai ia,
- 30
- He mea tuari tonu ano hoki tana kai, he mea homai e te kingi ki a ia i tenei ra, i tenei ra, i nga ra katoa i ora ai ia.
Address: 
Phone: 
Email: