- 1
- I korerotia e Rawiri ki a Ihowa nga kupu o tenei waiata i te ra i whakaorangia ai ia e Ihowa i te ringa o ona hoa riri katoa, i te ringa ano hoki o Haora.
- 2
- I mea ano ia, ko Ihowa toku teko, taku pourewa, me toku kai whakaora;
- 3
- Te Atua o taku kamaka, ka whakawhirinaki atu ahau ki a ia; taku whakangungu rakau, me te haona o toku whakaoranga, toku pa tiketike, toku rerenga atu, toku kai whakaora; whakaorangia ana ahau e koe i te tutu.
- 4
- Ka karanga ahau ki a Ihowa e tika nei kia whakamoemititia, a ka ora i oku hoa riri.
- 5
- I toku karapotinga mai e nga ngaru o te mate, ka whakawehia mai ahau e nga waipuke o te kino.
- 6
- I karapotia mai ahau e nga whakawiringa a te reinga: haukotia ana ahau e nga mahanga a te mate.
- 7
- I karanga atu ahau ki a Ihowa i toku paweratanga, i karanga atu ki toku Atua: i whakarongo mai ano ia ki toku reo i roto i tona temepara, i tae hoki taku hamamatanga ki ona taringa.
- 8
- Na, ka ngaueue te whenua, ka ru: wiri ana nga putake o nga rangi, ngaueue ana: no te mea e riri ana ia.
- 9
- I kake atu he paowa i ona pongaponga: a ka kai te kapura o roto o tona mangai, ngiha noa nga waro.
- 10
- I whakapingoretia e ia nga rangi, a ka heke iho: a, i raro te pouri i ona waewae.
- 11
- Na, ka eke ia ki te kerupa, a, rere ana: Ina, i kitea ia i runga i nga parirau o te hau.
- 12
- I meinga ano hoki e ia te pouri hei teneti i tetahi taha ona, i tetahi taha: nga wai pouri, nga kapua matotoru o te rangi.
- 13
- Ngiha ana nga waro i te wherikotanga o tona aroaro.
- 14
- Papā ana te whatitiri a Ihowa i nga rangi; puaki ana te reo o te Runga rawa.
- 15
- Kokiritia mai ana e ia nga pere, a, marara ana ratou; he uira, a ka whati ratou.
- 16
- Katahi ka kitea nga whakatakere o te moana, ka takoto kau nga putake o te ao, i te whakatupehupehunga a Ihowa, i te whengunga o te manawa o ona pongaponga.
- 17
- I tono karere mai ia i runga, mau ki a au; toia ake ana ahau e ia i roto i nga wai maha.
- 18
- Nana ahau i whakaora i taku hoa riri kaha, i te hunga ano hoki e kino ana ki a au: no te mea he kaha rawa ratou i a au.
- 19
- Huakina tatatia mai ana ahau e ratou i te ra o toku matenga: ko Ihowa ia toku whakawhirinakitanga.
- 20
- A, whakaputaina ana ahau e ia ki te wahi whanui: i whakaorangia ahau e ia, no te mea i whakaahuareka mai ia ki a au.
- 21
- Rite tonu ki taku mahi tika ta Ihowa utu ki a au; rite tonu ki te ma o oku ringa tana i whakahoki mai ai ki a au.
- 22
- Moku i pupuri i nga ara o Ihowa; a, kihai i he, i whakarere i toku Atua.
- 23
- Kei mua tonu hoki i a au ana whakariteritenga katoa; ana tikanga ano hoki, kihai era i whakamataratia atu i a au.
- 24
- I tu tika ano hoki ahau ki tona aroaro: a, i tiaki ano i a au kei kino.
- 25
- Na, ka homai e Ihowa he utu ki a au; he mea rite tonu ki toku tika; ki toku ma i tana titiro iho.
- 26
- He tangata atawhai, ka atawhai ano koe; he tangata tika, ka tika ano koe.
- 27
- He tangata ma, ka ma ano hoki koe; he tangata whakakeke, he whakakeke hoki tau mahi.
- 28
- E whakaorangia hoki e koe te iwi e whakamatea ana: kei runga ia ou kanohi i te hunga whakakake, a ka whakahokia iho ki raro.
- 29
- Ko koe hoki taku rama, e Ihowa; ma Ihowa ano hoki e whakamārama toku pouritanga.
- 30
- Nau hoki ahau i rere ai na waenga atu i te ropu: na toku Atua i pekea ai e ahau te taiepa.
- 31
- Te Atua, tika tonu tana ara; e para-kore ana te kupu a Ihowa; he whakangungu rakau ia ki te hunga katoa e whakawhirinaki ana ki a ia.
- 32
- Ko wai oti te Atua, ki te kahore a Ihowa? ko wai hoki te kamaka, ki te kahore to tatou Atua.
- 33
- Ko te Atua toku kaha, me toku pakaritanga; ko ia hei mea kia tino tika toku ara.
- 34
- Ko ia nei hei mea i oku waewae kia rite ki o te hāta: mana hoki ahau e whakatu ki runga ki oku wahi tiketike.
- 35
- Ko ia hei whakaako i oku ringa ki te whawhai; hei mea i oku ringa kia rite ki te kopere parahi.
- 36
- Kua homai ano hoki e koe ki a au te whakangungu rakau o tau whakaoranga; whakanuia ana ahau e to whakaaro mahaki.
- 37
- I whakanuia e koe oku takahanga i raro i a au, tē paheke oku waewae.
- 38
- I arumia e ahau oku hoa riri, a hunā iho ratou e au: kihai ano hoki ahau i tahuri mai, a, moti noa ratou.
- 39
- Moti iho ratou i a au, mongamonga noa ratou; tē ahei te whakatika: ina, hinga ana ratou ki raro i oku waewae.
- 40
- Nau hoki ahau i whitiki ki te kaha mo te whawhai: piko ana i a koe ki raro i a au te hunga i whakatika mai ki a au.
- 41
- I homai ano hoki e koe ki a au nga kaki o oku hoa riri: na, hunā iho e ahau te hunga e kino mai ana ki a au.
- 42
- I tirotiro ratou, heoi kahore he kai whakaora: ki a Ihowa, otira kihai ia i whakao mai ki a ratou.
- 43
- Na, tukia ana ratou e ahau, a, rite noa ki te puehu o te whenua: mohungahunga noa ratou i a au, me te mea he paru ratou no te huarahi; titaria atu ana ratou e ahau.
- 44
- Nau hoki ahau i ora ai i nga ngangautanga a toku iwi, tiakina ana ahau e koe hei upoko mo nga tauiwi. Hei apa moku te iwi kahore nei i matauria e ahau.
- 45
- Hei apa moku nga tangata iwi ke: kia rongo kau te taringa, kakama tonu mai ratou ki a au.
- 46
- Ka memeha haere nga tangata iwi ke: ka puta wehi mai hoki i roto i o ratou kuhunga.
- 47
- E ora ana a Ihowa, a, kia whakapaingia toku kamaka: kia whakanuia ano hoki te Atua o te kamaka o toku whakaoranga.
- 48
- Ko te Atua toku kai rapu utu; mana e pehi te iwi ki raro i a au.
- 49
- Ko ia hei kai whakaputa moku i roto i oku hoa riri; ae ra, mau ahau e mea kia teitei ake i te hunga e whakatika mai ana ki a au: whakaorangia ana ahau e koe i te tangata tutu.
- 50
- Mo konei ka whakawhetai atu ahau ki a koe, e Ihowa, i roto i nga tauiwi, ka himene atu ano hoki ki tou ingoa.
- 51
- Hei pourewa whakaora ia ki tona kingi; e whakaputa aroha ana ki tana tangata i whakawahi ai, ki a Rawiri ratou ko ona uri ake ake ake.
Address: 
Phone: 
Email: