- 1
- Kahore nei i ngaro nga wa i a te Kaha rawa, a he aha te hunga e matau ana ki a ia tē kite ai i ona ra?
- 2
- He whakaneke atu ta etahi i nga rohe, e kahakina ana e ratou nga kahui, kainga iho e ratou.
- 3
- E arahina atu ana e ratou te kaihe a nga pani, e tangohia ana hei taunaha te kau a te pouaru.
- 4
- Whakariroia ketia ana e ratou nga rawa-kore i te ara: huihui atu ana nga ware o te whenua ki te piri.
- 5
- Nana, rite tonu ratou ki te kaihe mohoao i te koraha, haere atu ana ki ta ratou mahi: moata tonu ratou ki te pahua: hei kai te koraha ma ratou, ma a ratou tamariki.
- 6
- E kotia ana e ratou tana witi, tana witi, i te mara, no te he ano hoki nga waina e kohia ana e ratou.
- 7
- Te hunga kakahu-kore e meinga ana e ratou kia moe tahanga; kahore hoki he hipoki i te maeke.
- 8
- Maku iho ratou i te awha o nga maunga, a ka kore nei he rerenga, awhi ana ratou i te kamaka.
- 9
- E tangohia mai ana e ratou te pani i te u, e tango ana ano i ta te rawa-kore taunaha.
- 10
- E mea ana ratou i te kakahu-kore kia kopikopiko tahanga, e tangohia ana e ratou te paihere kai a te hunga mate hia-kai,
- 11
- E hanga nei i te hinu i roto i o ratou taiepa, e takahi nei i a ratou poka waina, a he mate-wai ano to ratou.
- 12
- E aue ana nga tangata i roto i te pa, e karanga ana hoki te wairua o te hunga i patua, kahore ano ia ā te Atua whakakuare ki a ratou.
- 13
- No te hunga ratou e whakakeke ana ki te māramatanga; kahore o ratou mohiotanga ki ona ara, e kore ano ratou e noho ki ona huarahi.
- 14
- E maranga ana te kai kohuru i te mea ka mārama, patua iho e ia te ware me te rawa-kore; i te po ano ka ahua tahae ia.
- 15
- E tatari ana te kanohi o te tangata puremu kia nehunehu iho; e mea ana, E kore te kanohi e kite i a au: e huna ana ia i tona mata.
- 16
- E keria ana e ratou i te pouri nga whare i whaitohungia e ratou i te awatea ma ratou: kahore ratou e mohio ki te māramatanga.
- 17
- Ki ta ratou hoki e rite ana te ata ki te atarangi o te mate: ki te mohiotia mai ratou, he wehi no te atarangi o te mate to ratou.
- 18
- Tere tonu ia, ano he wai, he mea kanga ta ratou wahi i runga i te whenua: e kore ia e anga mai ki te ara ki nga mara waina.
- 19
- Ka riro nga wai o te hukarere i te wai-kore, i te mahana, te hunga hara ano hoki i te rua tupapaku.
- 20
- Ka wareware te kopu ki a ia, he kai reka ia ma te iro; e kore ia e maharatia i muri iho; ka whati ano hoki te kino ano he rakau.
- 21
- E tukinotia ana e ia te pakoko kihai nei i whanau; kahore hoki ana mahi pai ki te pouaru.
- 22
- E kumea mai ana nga marohirohi e ia, he kaha hoki nona; tona whakatikanga ake, kahore he tangata e u ki te ora.
- 23
- I homai ano ki a ia kia u te noho, whakawhirinaki ai ia ki reira; otiia kei runga i o ratou huarahi ona kanohi.
- 24
- E whakanekehia ake ana ratou he wahi iti nei; heoi kua kahore noa iho ratou, memeha atu ratou; e kohia mai ana ratou, e peratia ana me era atu katoa; ano ko nga hua witi ratou e tapahia ana.
- 25
- Ki te mea he teka ano tenei, ko wai hei whakateka ki a au, hei whakakahore noa iho i taku korero?
Address: 
Phone: 
Email: