- 1
- I aua ra ka whakatakotoria mai he tikanga e Hiha Akuhata, kia tuhituhia te ao katoa.
- 2
- No mua o te kawanatanga o Hairinia i Hiria i meatia ai tenei tuhituhinga.
- 3
- A ka haere nga tāngata katoa kia tuhituhia, ia tangata ia tangata ki tona pa ake ano.
- 4
- A i haere atu ano a Hohepa i Kariri, i te pa o Nahareta, ki Huria, ki te pa o Rawiri, ko Peterehema te ingoa; (no te mea no te whare ia no te kawei o Rawiri:)
- 5
- Kia tuhituhia ai raua ko Meri tana wahine taumau, ko ia ano hoki e hapū ana.
- 6
- A, i a raua i reira, ka rite nga ra e whanau ai ia.
- 7
- Na, ka whanau tana tamaiti matamua, a takaia ana e ia ki nga kakahu, ka whakatakotoria ki te takotoranga kai ma nga kararehe; no te mea kahore he wahi mo ratou i te whare.
- 8
- A i taua wahi etahi hepara e noho koraha ana, e tiaki ana i ta ratou kahui i te po.
- 9
- Na, ko te putanga mai o tetahi anahera a te Ariki ki a ratou, a whiti mai ana te kororia o te Ariki ki a ratou, a tawhio noa: a nui whakaharahara to ratou wehi.
- 10
- Na, ka mea mai te anahera ki a ratou, Kaua e mataku: ta te mea he kai kauwhau tenei ahau ki a koutou mo te hari nui, meake puta mai ki te iwi katoa.
- 11
- No naianei hoki i whanau ai he Kai whakaora mo koutou i te pa o Rawiri, ara, a te Karaiti te Ariki.
- 12
- A ko te tohu tenei ki a koutou; E kite koutou i te tamaiti ka oti te takai ki te kakahu, e takoto ana i te takotoranga kai ma nga kararehe.
- 13
- A kihai i aha ko te tini noa iho o te ope o te rangi e noho tahi ana me taua anahera, e whakamoemiti ana ki te Atua, e mea ana,
- 14
- Kia whai kororia te Atua i runga rawa, kia mau te rongo ki runga ki te whenua, me te whakaaro pai ki nga tāngata.
- 15
- A ka mawehe atu nga anahera i a ratou ki te rangi, ka mea nga hepara tetahi ki tetahi, Tatou ka haere ki Pete-rehema kia kite i tenei mea kua puta mai nei, kua whakapuakina mai nei e te Ariki ki a tatou.
- 16
- Na, ka hohoro ratou te haere atu, a ka kite i a Meri, i a Hohepa, i te tamaiti ano hoki e takoto ana i te takotoranga kai ma nga kararehe.
- 17
- Ano ka kite, ka whakapuakina te mea i korerotia ki a ratou mo tenei tamaiti.
- 18
- A miharo ana nga kai whakarongo katoa ki enei mea, i korerotia nei ki a ratou e nga hepara.
- 19
- Ko Meri ia i ata rongoa i enei mea katoa, whakaaroaro ai i roto i tona ngakau.
- 20
- Na, ka hoki nga hepara, me te whakakororia me te whakamoemiti ki te Atua mo nga mea katoa i rongo nei i kite nei ratou, i rite nei ki nga mea i korerotia mai ki a ratou.
- 21
- Ano ka rite nga ra e waru e kotia ai te tamaiti, ka huaina tona ingoa ko IHU, ko ta te anahera i hua ai i te mea kahore ano i hapū tona whaea.
- 22
- A ka rite nga ra e purea ai te whaea, e whakaritea ai te ture a Mohi, ka kawea ia e ratou ki Hiruharama, kia tapaea atu ki te Ariki;
- 23
- (Kia peratia me te mea i tuhituhia ki te ture a te Ariki, Ko nga tāne katoa e oroko puta mai i te kopū, e karangatia e tapu ana ki te Ariki;)
- 24
- Kia hoatu ano hoki he patunga tapu, te mea i korerotia i roto i te ture a te Ariki, Kia rua kukupa, kia rua ranei pi kukupa.
- 25
- Na, i Hiruharama tetahi tangata ko Himiona te ingoa; he tangata tika, he tangata whakaaro, e tatari ana ki te whakaharinga o Iharaira: a kei runga te Wairua Tapu i a ia.
- 26
- Na, kua whakamaharatia mai ia e te Wairua Tapu, e kore ia e kite te mate, kia kite ra ano ia i ta te Ariki Karaiti.
- 27
- Na, ka haere mai ia ki te temepara, he meatanga na te Wairua: a i nga mātua e mau mai ana i te tamaiti i a Ihu, kia meatia ai e raua ki a ia, ta te ture i whakarite ai,
- 28
- Ka tango hoki ia i a ia ki ona ringaringa, a ka whakapai atu ki te Atua, ka mea,
- 29
- Katahi, e te Ariki, ka tukua to pononga kia haere i runga i te rangimarie, ka pera me tau i korero ai:
- 30
- Ka kite nei hoki oku kanohi i tau whakaoranga.
- 31
- Ka whakatakotoria nei e koe ki te aroaro o nga iwi katoa;
- 32
- Hei whakamārama e kite ai nga tauiwi, hei kororia hoki mo tou iwi mo Iharaira.
- 33
- A miharo tonu a Hohepa raua ko tona whaea ki nga kupu i korerotia mona.
- 34
- Na, ka manaaki a Himiona i a raua, a ka mea ki a Meri ki tona whaea, Nana, ka waiho tenei tamaiti hei takanga, hei aranga, mo te tini o te tangata i roto i a Iharaira; hei tohu hoki e korerotia kinotia;
- 35
- (Ae ra, ka tika atu ano te hoari, a puta noa i tou ake wairua,) e hurahia ai nga whakaaro o nga ngakau maha.
- 36
- Me Ana hoki, he poropiti, he tamahine na Panuera, no te iwi o Ahera: kua maha haere ona ra, e whitu nga tau o tona wahinatanga ake i noho ai ia ki te tāne;
- 37
- He pouaru, tata pu ki te waru tekau ma wha ona tau; heoi kihai i mahue i a ia te temepara; he karakia tonu tāna, he noho puku, he inoi, i te po i te ao.
- 38
- Na, ka tae mai ia i taua haora ano, ka whakawhetai ki te Ariki, a korerotia ana ia e ia ki te hunga katoa o Hiruharama e tatari ana ki te whakaoranga.
- 39
- Ano ka oti nga mea katoa e rite ana ki ta te ture a te Ariki, ka hoki atu ratou ki Kariri, ki to ratou pa ki Nahareta.
- 40
- Na, ka tupu te tamaiti, a ka kaha haere tona wairua, ka kī i nga whakaaro nui i a ia ano hoki to te Atua aroha noa.
- 41
- A i haere ona mātua i ia tau i ia tau ki Hiruharama ki te hakari o te Kapenga.
- 42
- A ka tekau ma rua ona tau, ka haere atu ratou ki Hiruharama i runga i nga ritenga o te hākari:
- 43
- A ka rite nga ra, i a raua e hoki ana, ka noho te tamaiti a Ihu ki Hiruharama; kihai hoki a Hohepa raua ko tona whaea i mohio.
- 44
- I mea hoki raua kei roto ia i te tira, na, ka haere, kotahi te ra ki te ara; a ka rapu raua i a ia i roto i nga whanaunga, i ā raua tāngata hoki i mohio ai.
- 45
- A, tē kitea ia, hoki ana ki Hiruharama, ki te rapu i a ia.
- 46
- A, muri iho i nga ra e toru ka kitea ia i roto i te temepara e noho ana, i waenganui o nga kai whakaako, e whakarongo ana ki a ratou, e ui atu ana ki a ratou.
- 47
- A miharo katoa ki tona matauranga, ki ana korero, te hunga i rongo ki a ia.
- 48
- Ano ka kite raua i a ia, ka tino miharo: a ka mea tona whaea ki a ia, E tama, he aha koe i penei mai ai ki a maua? na, pouri noa iho maua ko to pāpā, i a maua i rapu nei i a koe.
- 49
- Ka mea mai ia ki a raua, He aha korua i rapu ai i a au? kihai korua mahara, me mea ahau i nga mea a toku Matua?
- 50
- Heoi kihai raua i mātau ki te kupu i korerotia e ia ki a raua.
- 51
- Na, ka haere tahi atu ia me raua, ka tae ki Nahareta, a ka ngohengohe ki a raua; ko tona whaea ia i rongoa i enei kupu katoa, i roto i tona ngakau.
- 52
- Na, ka kake haere a Ihu te whakaaro nui, te kaumatua, ka paingia ano hoki e te Atua e te tangata.
Address: 
Phone: 
Email: