- 1
- Na, ka tu ake a Hatana hei hoa riri mo Iharaira, a ka whakahihiri ia i a Rawiri ki te tatau i a Iharaira.
- 2
- Na, ko te kianga atu a Rawiri ki a Ioapa ratou ko nga rangatira o te iwi, Tikina taua a Iharaira, o Peere-hepa atu ano a tae noa ki Rana, ka kawe mai ai i to ratou tokomahatanga ki a au, kia mohio ai ahau.
- 3
- Ano ra ko Ioapa, Ma Ihowa e tapiri mai a muri o tona iwi ki nga rau e rite ana ki a ratou e noho nei, otiia e toku ariki, e te kingi, ehara ianei ratou katoa i te pononga na toku ariki? He aha ra tenei i whaia ai e toku ariki? he aha i waiho ai hei take he mo Iharaira?
- 4
- Heoi kaha tonu ta te kingi kupu i ta Ioapa. Na, ka turia atu e Ioapa, haereerea ana e ia a Iharaira katoa; kua tae ki Hiruharama.
- 5
- Na, ka homai e Ioapa te tokomahatanga o te iwi i taua ki a Rawiri. Na, a Iharaira katoa, he mano nga mano me nga mano kotahi rau, he hunga unu hoari; na, a Hura, e wha rau e whitu tekau mano nga tangata unu hoari.
- 6
- Ko Riwai ia raua ko Peniamine, kihai i taua e ia i roto i a ratou; he mea whakarihariha hoki ki a Ioapa te kupu a te kingi.
- 7
- Na, ka riri te Atua ki tenei mea, a patua ana a Iharaira e ia.
- 8
- Na, ka mea a Rawiri ki a Ihowa, Nui atu toku hara i a au i mea i tenei mea: na, tena, kia whakarerea noatia iho te he a to pononga, nui whakaharahara hoki toku kuaretanga.
- 9
- Katahi ka puta mai te kupu a Ihowa ki ta Rawiri matakite, ki a Kara; i ki ia,
- 10
- Haere, ki atu ki a Rawiri, mea atu, Ko te kupu tenei a Ihowa, E toru enei mea ka whakaaria atu nei e ahau ki a koe, whiriwhiria tetahi o enei mau, a ka meatia e ahau ki a koe.
- 11
- Na, te taenga mai o Kara ki a Rawiri, ka mea ki a ia, Ko te kupu tenei a Ihowa, Whiriwhiria mau,
- 12
- Kia toru ranei nga tau mate-kai; kia toru ranei nga marama e whakangaromia ai koe i te aroaro o ou hoa riri, kia mau ano hoki koe i te hoari a ou hoa whawhai; ko te hoari ranei o Ihowa, kia toru nga ra, ara, te mate uruta ki te whenua, me te anahera ano a Ihowa e whakangaro ana, puta noa i nga rohe katoa o Iharaira. Na, whakaaroa e koe te kupu e whakahokia atu e ahau ki toku kai tono mai.
- 13
- Ano ra ko Rawiri ki a Kara, Hē noa iho aku whakaaro; na, kia taka ahau ki roto ki te ringa o Ihowa, he nui hoki ana mahi aroha; kaua hoki ahau e taka ki roto ki te ringa tangata.
- 14
- Na, whakapangia atu ana e Ihowa he mate uruta ki a Iharaira: a, hinga iho o Iharaira e whitu tekau mano tangata.
- 15
- A, i tonoa ano e te Atua he anahera ki Hiruharama whakangaro ai; a, i a ia e whakangaro ana, ka titiro mai a Ihowa, na, ka puta ke ta Ihowa whakaaro mo te kino, a ka mea ki te anahera e whakangaro ana, Kua nui: kati tou ringa. Na, tu ana te anahera a Ihowa i te patunga witi a Oronana Iepuhi.
- 16
- Na, te marangatanga ake o nga kanohi o Rawiri, ka kite i te anahera a Ihowa e tu ana i te takiwa o te whenua, o te rangi, me tana hoari, unu rawa, i tona ringa; e totoro mai ana ki runga i Hiruharama. Na, takoto tapapa ana a Rawiri ratou ko nga kaumatua, he mea hipoki ki te kakahu taratara.
- 17
- Na, ko te meatanga atu a Rawiri ki te Atua, He teka ianei naku i ki kia taua te iwi? Ko au tenei te mea i hara, i mahi nei i te he; ko enei hipi ia i aha ratou? E Ihowa, e toku Atua, kia pa ra tou ringa ki a au, ki te whare ano hoki o toku pāpā; kauaka ia ki tou iwi, hei whiu mo ratou.
- 18
- Na, ka korero mai te anahera a Ihowa ki a Kara kia mea atu ia ki a Rawiri, kia haere a Rawiri ki runga, ki te whakaara i tetahi aata ki a Ihowa ki te patunga witi a Oronana Iepuhi.
- 19
- Na, haere ana a Rawiri ki runga i te korerotanga mai a Kara i korerotia mai nei e ia i runga i te ingoa o Ihowa.
- 20
- Na, te tahuritanga ake o Oronana, ka kite i te anahera. Na, piri ana ia, ratou ko ana tama tokowha. Na, i te patu witi a Oronana.
- 21
- Na, ka haere mai a Rawiri ki a Oronana, a, te tirohanga atu a Oronana, ka kite i a Rawiri. Na, puta mai ana ia i roto i te patunga witi, piko ana ia ki a Rawiri, tapapa ana ki te whenua.
- 22
- Na, ko te meatanga a Rawiri ki a Oronana, Homai ki a au te wahi i tenei patunga witi, kia hangā ai e ahau he aata ki a Ihowa; kia tino rite te utu ka homai ai e koe ki a au, kia mutu ai te whiunga o te iwi.
- 23
- Katahi a Oronana ka mea ki a Rawiri, Me tango mau, a ma toku ariki ma te kingi e mea te mea e pai ana ki tana titiro iho; Nana, me hoatu e ahau ki a koe nga kau hei tahunga tinana, me nga patu witi hei wahie, me te witi ano hei whakahere toto-kore; me hoatu katoa e ahau.
- 24
- Na, ko te meatanga a Kingi Rawiri ki a Oronona, Kahore, engari me hoko e ahau kia rite ano nga utu; e kore hoki tau e tangohia e ahau ma Ihowa, e kore ano hoki e whakaekea nga mea kihai i utua hei tahunga tinana.
- 25
- Na, e ono rau nga hekere koura, he mea pauna, i hoatu e Rawiri ki a Oronana mo taua wahi.
- 26
- A, hangā ana e Rawiri he aata ki reira ma Ihowa, whakaekea ana e ia etahi tahunga tinana, me etahi whakamarietanga, a karanga ana ki a Ihowa. Na, ka whakahokia mai tana i te rangi, he ahi ki runga ki te aata tahunga tinana.
- 27
- Na, ka korero a Ihowa ki te anahera, a whakahokia ana e ia tana hoari ki tona takotoranga.
- 28
- I taua wa ano, i te kitenga o Rawiri kua whakarongo mai a Ihowa ki a ia i te patunga witi a Oronana Iepuhi, ka mea patunga tapu ia ki reira.
- 29
- Na, te tapenakara o Ihowa i hangā nei e Mohi ki te koraha, me te aata tahunga tinana, kei te wahi tiketike i Kipeono era i taua wa.
- 30
- Kihai ia a Rawiri i ahei te haere ki mua o taua aata ki te rapu i ta te Atua; i wehi hoki ia i te hoari a te anahera a Ihowa.
Address: 
Phone: 
Email: