- 1
- Na, kua koroheketia a Rawiri, kua rite ona tau, a, meinga ana e ia tana tamaiti a Horomona hei kingi mo Iharaira.
- 2
- I huihuia mai ano hoki e ia nga rangatira katoa o Iharaira, ratou ko nga tohunga, ko nga Riwaiti.
- 3
- Na, ka taua nga Riwaiti, nga mea e toru tekau, he maha atu ranei, o ratou tau. Na, to ratou tokomahatanga, he mea tatau a tangata tonu, e toru tekau ma waru nga mano.
- 4
- O enei, e rua tekau ma wha nga mano hei whakahohoro i te mahinga o te whare o Ihowa; na, nga rangatira, nga kai whakarite tikanga, e ono nga mano.
- 5
- Na, e wha nga mano hei kai tiaki kuwaha, a, e wha nga mano hei whakamoemiti ki a Ihowa i runga i nga mea whakatangi i hangā, e ai ta Rawiri, e ahau hei mea whakamoemiti.
- 6
- A, wehea atu ana ratou e Rawiri, tenei wehenga, tenei wehenga, ki roto ki nga tamariki a Riwai, ki a Kerehona, ki a Kohata, ki a Merari.
- 7
- O nga Kerehoni, ko Raarana, ko Himei.
- 8
- Nga tamariki a Raarana; te upoko ko Tehiere, ko Tetama, ko Hoere, tokotoru.
- 9
- Nga tamariki a Himei; ko Heromiti, ko Hatiere, ko Harana, tokotoru. Ko nga upoko enei o nga mātua o Raarana.
- 10
- Na, nga tamariki a Himei; ko Iahata, ko Tina, ko Ieuhu, ko Peria. Enei tokowha he tamariki na Himei.
- 11
- Ko Iahata te upoko, ko Tita te tuarua: na, kihai i tokomaha nga tama a Ieuhu raua ko Peria, a, hei whare matua raua, kotahi ano tauanga.
- 12
- Nga tamariki a Kohata; ko Amarama, ko Itihara, ko Heperona, ko Utiere, tokowha.
- 13
- Nga tamariki a Amarama; ko Arona raua ko Mohi. Na, i motuhia atu a Arona hei whakatapu i nga mea tapu rawa, a ia me ana tamariki, ake ake ake, hei tahu whakakakara ki te aroaro o Ihowa, hei minita ki a ia, hei manaaki ano hoki i runga i tona ingoa, a, ake ake ake.
- 14
- Na, a Mohi te tangata a te Atua, no te iwi o Riwai te karangatanga a ana tama.
- 15
- Nga tamariki a Mohi; ko Kerehoma, ko Erietere.
- 16
- O nga tamariki a Kerehoma, ko Hepuere te upoko.
- 17
- Na, nga tamariki a Erietere; ko Rehapia te upoko. A kahore atu he tama a Erietere. He tokomaha rawa ia nga tama a Rehapia.
- 18
- O nga tamariki a Itihara; ko Heromiti te upoko.
- 19
- O nga tamariki a Heperona; ko Teria te upoko, ko Amaria te tuarua, ko Tahatiere te tuatoru, ko Tekameama, te tuawha.
- 20
- O nga tamariki a Utiere; ko Mika te upoko, ko Ihiia te tuarua.
- 21
- Nga tamariki a Merari; ko Mahari, ko Muhi. Nga tamariki a Mahari; ko Ereatara, ko Kihi.
- 22
- Na ka mate a Ereatara; kahore ana tama; engari he tamahine: a, riro ana ratou i o ratou tungane, i nga tama a Kihi.
- 23
- Nga tama a Muhi; ko Mahari, ko Erere, ko Teremoto, tokotoru.
- 24
- Ko nga tamariki enei a Riwai puta noa i nga whare o o ratou mātua; ara, nga upoko o nga mātua, i te mea e taua ana o ratou ingoa, tenei tangata, tenei tangata i mahia ai nga mahi, ara, nga meatanga ki te whare o Ihowa, te hunga, e rua tekau, he maha atu hoki o ratou tau.
- 25
- I mea hoki a Rawiri, Kua meinga nei e Ihowa Atua o Iharaira tona iwi kia okioki, a ka noho tonu ratou ki Hiruharama:
- 26
- Me nga Riwaiti hoki, heoi ano ta ratou amohanga i te tapenakara, me ona mea katoa mo nga mahi ki reira.
- 27
- Na nga kupu whakamutunga hoki a Rawiri i taua ai nga Riwaiti e rua nei tekau, he maha atu hoki, o ratou tau.
- 28
- Te turanga hoki mo ratou, kei te taha o nga tama a Arona, mo nga mahi o te whare o Ihowa i nga marae, i nga ruma, i te purenga o nga mea tapu katoa, i te meatanga o te mahi o te whare o te Atua;
- 29
- Ara, o te taro aroaro, o te paraoa mo te whakahere toto-kore, o nga keke rewena-kore, o te mea i tunua ki te paraharaha, o te mea ano hoki i paraipanatia, o nga mea katoa ano hoki e mehuatia ana, e ruritia ana;
- 30
- Hei tu i tenei ata, i tenei eta, ki te whakawhetai, ki te whakamoemiti ki a Ihowa; kia pera ano hoki i te ahiahi;
- 31
- Hei whakaeke mo nga tahunga tinana katoa ma Ihowa i nga hapati, i nga marama hou, i nga hakari i whakaritea; he mea tatau tonu ratou, rite tonu ki te tikanga i whakaritea ki a ratou, i te aroaro tonu o Ihowa.
- 32
- Ko ratou ano hei tiaki i nga mea o te tapenakara o te whakaminenga, hei tiaki ano i te wahi tapu, hei tiaki ano hoki i nga mea o o ratou tuakana o nga tamariki a Arona, i te mea e mahi ana i nga mea o te whare o Ihowa.
Address: 
Phone: 
Email: