- 1
- Na, nga mea i tuhituhi mai ra koutou ki a au: he mea pai ano mo te tangata kia kaua e pa atu ki te wahine.
- 2
- Otiia me whakaaro kei puremu, a kia rite ma te tāne ko tana wahine ake, ma te wahine ano hoki ko tana tāne ake.
- 3
- Kia puta ta te tāne whakaaro pai ki te wahine, hei te mea e tika ana: ta te wahine ana hoki ki te tāne.
- 4
- Ehara te wahine i te rangatira o tona tinana ano, engari ko te tāne: me te tāne ano hoki, ehara ia i te rangatira o tona ake tinana, engari ko te wahine.
- 5
- Kaua e kaiponuhia ta tetahi ta tetahi, ki te kore e rite te whakaae a tetahi a tetahi, mo tetahi wa, kia atea ai korua ki te noho puku ki te inoi; ka hoki mai ai ano ki a korua, kei ai to korua hiahia taikaha hei whakawainga ma Hatana i a korua.
- 6
- Otira he mea whakaae noa tenei korero aku, ehara i te tikanga whakatakoto.
- 7
- Taku hoki i pai ai, kia penei nga tāngata katoa me ahau nei. Otira e hoatu ana e te Atua ki ia tangata ki ia tangata te mea mona ake, ki tetahi ko tenei ki tetahi ko tera.
- 8
- Na, ko taku kupu tenei ki nga takakau, ratou ko nga wāhine pouaru, He mea pai ano mo ratou kia kāti tonu me au nei.
- 9
- Otira ki te kore e taea te whakamanawanui, me marena: he pai hoki te marena, he kino ia te ka o te ngakau.
- 10
- Ko taku whakahau ia tenei ki te hunga whai hoa, ehara i ahau, engari na to Ariki, Aua te wahine e mawehe atu i tana tāne:
- 11
- A, ki te mawehe atu ia, me noho hoa-kore, me hohou ranei te rongo ki tana tāne: kaua ano hoki te tāne e whakarere i tana wahine.
- 12
- Na, ki era atu naku tenei kupu, ehara i te Ariki: Ki te mea he wahine whakapono kore ta tetahi o nga teina, a ka whakaae taua wahine kia noho tahi raua, kaua ia e whakarerea.
- 13
- Ki te mea hoki he tāne whakapono kore ta tetahi wahine, a ka whakaae kia noho tahi raua, kaua ia e whakarerea.
- 14
- No te mea e whakatapua ana te tāne whakapono kore e te wahine, e whakatapua ana hoki te wahine whakapono kore e te tāne: me he kahore, kua poke a korua tamariki; tena ko tenei e tapu ana.
- 15
- Ki te mawehe atu ia te whakapono kore, māna e mawehe atu. E kore tetahi teina, tuahine ranei, e mau i nga mea penei: otira kua karangatia tatou e te Atua ki te rangimarie.
- 16
- I mohiotia hoki e koe ki te aha, e tai, e kore e ora i a koe tou tāne? i mohiotia hoki e koe ki te aha, e te tāne, e kore e ora i a koe tou wahine?
- 17
- Heoi kia rite te haere ki ta te Atua i tuwha ai ki tetahi ki tetahi, ki ta te Ariki karangatanga i tetahi i tetahi. Ko taku hoki tenei e whakatakoto nei i roto i nga hahi katoa.
- 18
- He mea kokoti tetahi i tona karangatanga ai? kaua e whakakahoretia tona kotinga. He mea kokoti kore tetahi i tona karangatanga ai? kaua ia e kotia.
- 19
- He mea kore noa iho te kotinga, he mea kore noa iho ano te kotinga kore, engari te pupuri i a te Atua ture.
- 20
- Te mahi a tetahi a tetahi i tona karangatanga ai, kia mau tonu ia ki tenei.
- 21
- He pononga koe i tou karangatanga ai? kaua e manukanuka: otira ki te watea he haerenga noatanga atu mou, tena ra.
- 22
- He pononga tetahi i tona karangatanga ai i roto i te Ariki, he tangata tuku noa ia na te Ariki: a ki te mea ehara i te pononga i tona karangatanga ai, he pononga ano ia na te Karaiti.
- 23
- Kua oti koutou te hoko ki te utu; aua koutou e meinga hei pononga ma te tangata.
- 24
- E aku teina, te mahi a tenei a tenei i tona karangatanga ai kia mau ia ki tena, me te whakaaro ano ki te Atua.
- 25
- Na, nga wahina, kahore a te Ariki tikanga ki a au; tenei ia taku whakaaro, ara ta te tangata i a ia nei ta te Ariki atawhai, i pono ai.
- 26
- Ki taku whakaaro hoki he mea pai ano tenei mo te whakararu o tenei wa, ara, e pai ana kia pena tonu te tangata.
- 27
- Kua herea koe ki te wahine? kaua e whai kia wetekia. Ka oti koe te wewete mai i te wahine? kaua e whaia he wahine.
- 28
- Otiia ki te marena ano koe, kahore ou hara; ki te marena ano hoki te wahina, kahore ona hara. Otiia e pa mai te whakararu i te kikokiko ki taua hunga pena: heoi me ata hanga ahau ki a koutou.
- 29
- Tenei ia taku korero, e aku teina, e tutata ana te wa: heoi inaianei kia rite te hunga whai wahine ki te hunga kahore nei a ratou;
- 30
- Me te hunga e tangi ana, ki te hunga kahore nei e tangi; me te hunga e hari ana, ki te hunga kahore nei e hari; me te hunga e hoko ana, ki te hunga rawakore;
- 31
- Me te hunga i a ratou tenei ao, ki te hunga kahore nei e maumauria e ratou te ao: e memeha haere ana hoki te ahua o tenei ao.
- 32
- Na, e mea ana tenei au kia kaua koutou e manukanuka. Ta te takakau e manukanuka ai ko nga mea a te Ariki, me pehea tana whakamanawareka ki te Ariki:
- 33
- He tangata whai hoa, ko nga mea o te ao tana e manukanuka ai, me pehea tana whakamanawareka ki tana wahine.
- 34
- Takoto ke ana ta te wahine whai hoa, takoto ke ana ta te wahina. He wahine takakau, tana e manukanuka ai ko nga mea a te Ariki, kia tapu ai te tinana te wairua: he wahine whai hoa, tana e manukanuka ai ko nga mea o te ao, me pehea tana whakamanawareka ki tana tāne.
- 35
- Tenei korero aku he mea kia hua ai he pai mo koutou ake; ehara i te mea kia mahangatia ai koutou e ahau, engari kia ahua pai ai te mahi, kia u ai koutou ki te Ariki, kia kaua e kumea ketia.
- 36
- Na, ki te mea tetahi e hē ana tana tikanga ki tana wahina, ki te pahika ke i tona kaumatuatanga, a kei tena te tikanga māna e mea tana e pai ai, kahore ona hara: kia marenatia raua.
- 37
- Ki te u tonu ia te ngakau o tetahi, a kahore he mea hei turaki i tana, a kei a ia ake ano te tikanga mo tana a pai ai, kua oti ano hoki tenei te whakatakoto e tona ngakau kia waiho tana hei wahina, e pai ana ano tana mahi.
- 38
- Na, e pai ana te mahi a te tangata e tuku ana kia marenatia; pai ake ia te mahi a te tangata kahore e tuku kia marenatia.
- 39
- E mau ana te wahine i te ture i te oranga o tana tāne; ki te mate ia tana tāne, kua atea; e marenatia ano ia ki tana e pai ai; otira i roto i te Ariki.
- 40
- Ki taku whakaaro ia, nui atu tona koa ki te kāti tonu ia: na, ki taku ki kei a au ano hoki te Wairua o te Atua.
Address: 
Phone: 
Email: