- 1
- Na, kua koroheketia a Kingi Rawiri, kua maha ona ra; a, hipokina ana ia e ratou ki nga kakahu; heoi kihai i mahana.
- 2
- Katahi ana tangata ka ki mai ki a ia, Kia rapua tetahi kotiro, tetahi wahina ma toku ariki, ma te kingi; a, me tu ia ki te aroaro o te kingi, mana hoki ia e atawahi, ka takoto hoki ki tou uma, a ka mahana toku ariki te kingi.
- 3
- Na, rapua ana e ratou tetahi kotiro ataahua puta noa i nga rohe katoa a Iharaira; a ka kitea a Apihaka Hunami, a, kawea mai ana ia ki te kingi.
- 4
- Na, ataahua tonu taua kotiro; a, ko ia hei kai atawhai mo te kingi, hei kai mahi ano hoki ki a ia: otiia kihai te kingi i mohio ki a ia.
- 5
- Na, ka whakanui a Aronia tama a Hakiti i a ia, ka mea, Ko ahau hei kingi, a, meatia ana e ia etahi hariata māna, me etahi tangata noho hoiho, e rima tekau ano hoki nga tangata hei rere i tona aroaro.
- 6
- Kihai ano hoki tona pāpā i whakapouri i tona ngakau o mua iho, kihai i mea, He aha koe i pena ai? ataahua noa iho ano ia, i whanau ano hoki i muri i a Apoharama.
- 7
- Na, ka korerorero ia ki a Ioapa tama a Teruia, ki a Apiatara ano hoki ki te tohunga; a, ko raua hei tuara whakakaha mai mo Aronia.
- 8
- Ko Haroko ia ko te tohunga, ratou ko Penaia tama a Iehoiara, ko Natana matakite, ko Himei, ko Rei, ko nga tangata nunui a Rawiri, kihai ratou i uru ki ta Aronia.
- 9
- Na, ka patua e Aronia he hipi, he kau, me nga mea momona, ki te kohatu ki Toherete ki tera i te taha o Ene-rokere, a, karangatia ana e ia ona teina katoa, nga tama a te kingi, ratou ko nga tangata katoa o Hura, nga pononga a te kingi.
- 10
- Ko Natana ia ko te matakite, ratou ko Penaia, ko nga tangata nunui me tona teina, me Horomona ano hoki kihai ratou i karangatia e ia.
- 11
- Na, ka korero a Natana ki a Pate-hepa whaea o Horomona, ka mea, Kahore ianei koe i rongo ko Aronia tama a Hakiti te kingi, kahore ano hoki kia mohiotia e to tatou ariki, e Rawiri?
- 12
- Na, haere mai, a, maku e whakaatu he whakaaro ki a koe e ora ai koe, e ora ai ano hoki to tamaiti a Horomona.
- 13
- Haere, a ka tae atu ki a Kingi Rawiri, ka mea ki a ia, Kihai ianei koe i oati mai, e toku ariki, e te kingi, ki to pononga i mea, Ko Horomona ko to tama hei kingi i muri i a au, ko ia hoki hei noho ki runga ki toku torona? Na, he aha i kingi ai a Aronia?
- 14
- Na, e korero ana ano koe i reira ki te kingi, ka tae atu ano hoki ahau i muri i a koe, a, maku e whakakoia atu ki o korero.
- 15
- Na, ko te haerenga atu o Pate-hepa ki te whare moenga ki te kingi, he koroheke rawa te kingi; ko Apihaka Hunami ano hoki te kai mea i nga mea a te kingi.
- 16
- Na, ka tuohu iho a Pate-hepa, ka piko iho ki te kingi, a ka mea te kingi, He aha tau?
- 17
- Na, ko ta tera meatanga ki a ia, E toku ariki, i oatitia mai a Ihowa tou Atua e koe ki to pononga, i mea mai koe, Ko Horomona ko to tamaiti hei kingi i muri i a au, ko ia ano hoki hei noho ki runga ki toku torona.
- 18
- Na, kua kingi nei a Aronia, a, kahore ano koe i mohio inaianei, e toku ariki, e te kingi.
- 19
- Patua iho hoki e ia te kau, te mea momona, te hipi, tona tini; kua karangatia ano hoki e ia nga tama katoa a te kingi, me Apiatara tohunga, me Ioapa ano te rangatira ope; ko Horomona ko to pononga, kihai i karangatia e ia.
- 20
- Na, ko koe, e toku ariki, e te kingi, e anga mai ana nga kanohi o Iharaira katoa ki a koe, kia whakaaturia ki a ratou ko wai e noho ki runga ki te torona o toku ariki o te kingi i muri i a ia.
- 21
- Na, tenei ake kei te moenga o toku ariki o te kingi ki ona matua, na, ko maua ko taku tamaiti ko Horomona ka kiia he hunga hara.
- 22
- I a ia ano e korero ana ki te kingi, na, ko Natana poropiti kua tae mai.
- 23
- A ka korerotia mai e ratou ki te kingi; ka mea ratou, Ko Natana poropiti tenei. Na, haere mai ana tera ki te aroaro o te kingi, a, piko tapapa ana ki te whenua ki te aroaro o te kingi.
- 24
- Na, ko te meatanga mai a Natana, E toku ariki, e te kingi, i mea ranei koe, Ko Aronia hei kingi i muri i a au, ko ia ano hoki hei noho ki runga ki toku torona?
- 25
- Kua riro hoki ia ki raro inaianei, a, kei te patu tera i te kau, i te mea momona, i te hipi, tona tini; kua karangatia ano hoki e ia nga tama katoa a te kingi ratou ko nga rangatira ope, ko Apiatara tohunga, kei te kai ano tera ratou, kei te inu i tona aroaro; e ki ana, Kia ora a Kingi Aronia.
- 26
- Na, ahau to pononga, kihai ahau i karangatia e ia, a Haroko tohunga, Penaia tama a Iehoiara, a Horomona to pononga.
- 27
- Na toku ariki ranei na te kingi tenei mea, a, kihai i whakaaturia e koe ki to pononga ko wai e noho ki runga ki te torona o toku ariki o te kingi i muri i a ia?
- 28
- Na, ka whakahokia mai e Kingi Rawiri, a ka mea, Karangatia atu a Pate-hepa ki a au. Na, haere mai ana ia ki te aroaro o te kingi, a, tu ana i te aroaro o te kingi.
- 29
- Na, ko te oatitanga a te kingi, ka mea, E ora ana a Ihowa i whakaora nei i a au i nga matenga katoa,
- 30
- Aku oatitanga i a Ihowa i te Atua o Iharaira ki a koe, i a au ra i mea, Ko Horomona ko to tama hei kingi i muri i a au, ko ia hoki hei noho ki runga ki toku torona i muri i a au, me pena ano e ahau i tenei ra.
- 31
- Na, tuohu ana a Pate-hepa, anga tonu tona mata ki te whenua, piko atu ana ki te aroaro o te kingi ka mea, Kia ora toku ariki a Kingi Rawiri, a, ake ake ake.
- 32
- Na, ko te meatanga ake a Kingi Rawiri, Karangatia atu a Haroko tohunga ki a au, me Natana poropiti ano hoki, ratou ko Penaia tama a Iehoiara. Na, haere ana ratou ki te aroaro o te kingi.
- 33
- Katahi te kingi ka mea ki a ratou, Tikina atu nga pononga a to koutou ariki hei hoa mo koutou, ka whakanoho ai i a Horomona i taku tamaiti ki runga ki toku muera, ki toku ake, ka kawe ai i a ia ki raro ki Kihiona.
- 34
- A, ma Haroko tohunga raua ko Natana poropiti ia e whakawahi ki reira hei kingi mo Iharaira; ka whakatangi ai koutou i te tētere, ka mea ai, Kia ora a Horomona te kingi.
- 35
- Na, ka piki ake koutou i muri i a ia, a ka tae mai ia, ka noho ki runga ki toku torona; a, hei kingi ia i muri i a au, he mea whakarite naku hei rangatira mo Iharaira raua ko Hura.
- 36
- Na, ka whakahokia atu e Penaia tama a Iehoiara ki ta te kingi, a ka mea, Amine: kia pena mai ano hoki te ki a Ihowa, a te Atua o toku ariki o te kingi.
- 37
- I toku ariki nei, i te kingi, a Ihowa, kia pena ano hoki ia ki a Horomona; kia whakanuia ake ano hoki tona torona ki runga ake i te torona o toku ariki o Kingi Rawiri.
- 38
- Katahi ka haere ki raro a Haroko tohunga, a Natana poropiti, a Penaia tama a Iehoiara, me nga Kereti me nga Pereti, whakanohoia ana a Horomona e ratou ki runga ki te muera o Kingi Rawiri, a, kawea ana ia ki Kihona.
- 39
- I tangohia ano hoki e Haroko tohunga te haona hinu i roto i te tapenakara, a, whakawahia ana a Horomona e ia. Katahi ka whakatangihia te tētere e ratou, a ka mea katoa te iwi, Kia ora a Kingi Horomona.
- 40
- Na, piki ake ana te iwi katoa i muri i a ia, me te whakatangi ano hoki te iwi i nga putorino; nui atu hoki te koa i koa ai ratou, pakaru ana te whenua i to ratou hamama.
- 41
- A, i rongo ano a Aronia ratou ko te hunga katoa i karangatia, ona hoa, i a ratou e whakamutu ana i ta ratou kai; a, te rongonga o Ioapa i te tangi o te tētere, ka mea ake, He aha tenei hamamatanga o te pa e ngangau mai nei?
- 42
- I a ia ano e korero ana, na, ko Honatana tama a Apiatara tohunga e haere mai ana, a ka mea a Aronia, Haere mai, he tangata maia hoki koe, a, he korero pai au.
- 43
- Na, ko te whakahokinga mai a Honatana, ka mea ki a Aronia, He mea pono rawa tenei, Kua meinga a Horomona hei kingi e to tatou ariki e Kingi Rawiri.
- 44
- A, ungā ana ia e te kingi, ratou tahi ko Haroko tohunga, ko Natana poropiti, ko Penaia tama a Iehoiara, ratou ko nga Kereti, ko nga Pereti, a, whakanohoia ana ia ki runga ki te muera o te kingi.
- 45
- Na, whakawahia ana ia hei kingi ki Kihona e Haroko tohunga, e Natana poropiti, a, piki koa ake ana ratou i reira: na, ngateri ana te pa. Ko te hamamatanga ia i rongo ra koutou.
- 46
- E noho mai nei ano hoki a Horomona i runga i te torona o te kingitanga.
- 47
- Kua tae atu ano hoki nga pononga a te kingi ki te manaaki i to tatou ariki i a Kingi Rawiri, ki te mea, Kia meinga e tou Atua te ingoa o Horomona kia pai atu i tou ingoa, kia whakanuia ake e ia tona torona i tou torona. Na, piko iho ana te kingi i runga i te moenga.
- 48
- Ko te kupu ano hoki tenei a te kingi, Kia whakapaingia a Ihowa te Atua o Iharaira, mona nei i homai i tetahi i tenei ra hei noho ki runga ki toku torona, me te titiro ano oku kanohi.
- 49
- Na, pawera noa iho te hunga katoa i karangatia, nga hoa o Aronia, a, whakatika ana haere ana i tona ara, i tona ara.
- 50
- A, i wehi ano a Aronia i a Horomona, a, whakatika ana, haere ana, hopukia ana e ia nga haona o te aata.
- 51
- Na, ka korerotia te korero ki a Horomona, Ko Aronia tera e wehi ana i a Kingi Horomona; kei te pupuri ano tera i nga haona o te aata; e mea ana, Kia oati mai a Kingi Horomona ki a au aianei, e kore e whakamatea e ia tana pononga ki te hoari.
- 52
- Na, ko te meatanga ake a Horomona, Ki te mea he tikanga pai tana, e kore e taka tetahi makawe ona ki te whenua; tera ko tenei ka mau tona he, ka mate.
- 53
- Katahi a Kingi Horomona ka tono tangata atu ki te tiki atu i a ia i runga i te aata. A, haere mai ana ia, piko iho ana ki a Kingi Horomona: a ka mea a Horomona ki a ia, Haere ki tou whare.
Address: 
Phone: 
Email: