- 1
- Katahi ka huihuia mai e Horomona nga kaumatua o Iharaira, ratou ko nga upoko katoa o nga iwi, ko nga rangatira o nga matua o nga tamariki a Iharaira ki a Kingi Horomona ki Hiruharama, ki te kawe atu i te aaka o te kawenata a Ihowa i roto i te pa o Rawiri, ara, i Hiona.
- 2
- Na, ka huihui mai nga tangata katoa o Iharaira ki a Kingi Horomona i Marama Etanimi, i te hakari, ara, i te whitu o nga marama,
- 3
- A, te taenga mai o nga kaumatua katoa o Iharaira, ka mau nga tohunga ki te aaka,
- 4
- A, kawea atu ana e ratou te aaka a Ihowa, me te tapenakara o te whakaminenga, me nga oko tapu katoa i roto i te tapenakara, kawea ana aua mea e nga tohunga ratou ko nga Riwaiti ki runga.
- 5
- Na, kei te whakaeke a Kingi Horomona, ratou ko te huihui katoa o Iharaira, i huihui mai nei ki a ia ki te ritenga atu o te aaka, i nga hipi, i nga kau, kahore nei e taea te korero, te tatau ranei, i te tini.
- 6
- Na, kawea mai ana e nga tohunga te aaka o te kawenata a Ihowa ki tona wahi, ki te ahurewa o te whare, ki te wahi tino tapu, ki raro i nga parirau o nga kerupima.
- 7
- I roha mai hoki nga parirau e rua o nga kerupima ki runga ki te wahi i te aaka, a, taupokina iho a runga o te aaka me ona amo e nga kerupima.
- 8
- I whakapurerotia mai ano e ratou nga amo, kia kitea ai nga pito o nga amo i te wahi tapu i te ritenga atu o te ahurewa; otiia kihai i kitea ki waho; a, kei reira na ano aua mea a tae noa ki tenei ra.
- 9
- Kahore he mea i roto i te aaka, ko nga papa kohatu e rua anake i whaowhina nei ki reira e Mohi i Horepa i ta Ihowa whakaritenga kawenata ki nga tamariki a Iharaira i to ratou putanga mai i te whenua o Ihipa.
- 10
- A, te putanga mai o nga tohunga i roto i te wahi tapu, na, kua ki te whare o Ihowa i te kapua.
- 11
- A, kihai i ahei i nga tohunga te tu ki te mahi, na te kapua hoki: i ki tonu ra hoki te whare o Ihowa i te kororia o Ihowa.
- 12
- Katahi ka korero a Horomona, I mea a Ihowa, ka noho ia ki te pouri nui.
- 13
- Kua oti nei i a au te hanga he whare hei nohoanga mou, he kāinga pumau mou mo ake tonu atu.
- 14
- Na, ka tahuri mai te aroaro o te kingi, a, manaakitia ana e ia te huihui katoa o Iharaira, me te tu ano tera te huihui katoa o Iharaira.
- 15
- I mea ia, Kia whakapaingia a Ihowa te Atua o Iharaira, na tona mangai nei te kupu ki toku pāpā ki a Rawiri, a, kua rite nei i tona ringa; i mea hoki ia,
- 16
- Kihai i whiriwhiria e ahau he pa i roto i nga iwi katoa o Iharaira e hangā ai he whare hei waihotanga iho mo toku ingoa, no te ra iho ano o taku whakaputanga mai i toku iwi i a Iharaira i Ihipa; heoi whiriwhiria ana e ahau a Rawiri hei rangatira mo toku iwi mo Iharaira.
- 17
- Na, i whai ngakau ano toku pāpā a Rawiri ki te hanga whare mo te ingoa o Ihowa, o te Atua o Iharaira.
- 18
- Na, ko te meatanga mai a Ihowa ki a Rawiri ki toku pāpā, Taua whakaaro a tou ngakau kia hangā he whare mo toku ingoa, pai tonu tau, ara, te whakaaro a tou ngakau.
- 19
- Otiia e kore taua whare e hangā e koe: engari to tama e puta mai i tou hope, mana e hanga te whare mo toku ingoa.
- 20
- Na, kua mana nei i a Ihowa tana kupu i korero ai ia, a, kua ara tenei ahau i mea i a Rawiri i toku pāpā, a, e noho nei au i runga i te torona o Iharaira, e pera ana me ta Ihowa i korero ai, kua hangā ano e ahau he whare mo te ingoa o Ihowa, o te Atua o Iharaira.
- 21
- A, meinga ana e ahau ki reira he wahi mo te aaka mo te takotoranga o te kawenata a Ihowa i whakaritea e ia ki o tatou matua i tana whakaputanga mai i a ratou i te whenua o Ihipa.
- 22
- Na, ka tu a Horomona ki mua i te aata a Ihowa, i te aroaro o te huihui katoa o Iharaira, whewhera tonu ona ringa whaka-te-rangi.
- 23
- Na, ko tana meatanga ake, E Ihowa, e te Atua o Iharaira, kahore he Atua hei rite mou i te rangi i runga, i te whenua ranei i raro, e pupuri nei i te kawenata me te aroha ki o pononga, ina whakapaua o ratou ngakau ki te haere i tou aroaro.
- 24
- Mau tonu hoki i a koe nga mea i korerotia e koe ki to pononga ki toku pāpā ki a Rawiri, i korerotia nei e tou mangai ki a ia, a, kua rite nei i tou ringa; koia ano tenei inaianei.
- 25
- Na, kia mau, e Ihowa, e te Atua o Iharaira, aianei tau i korero ai ki to pononga ki toku pāpā ki a Rawiri, i a koe i ki ra, E kore e whakakorea he tangata mau i toku aroaro hei noho ki runga ki te torona o Iharaira; kia mahara raia o tamariki ki to ratou ara, kia haere ratou i toku aroaro, kia pera ano me koe na i haere i toku aroaro.
- 26
- Na, kia mana aianei, e te Atua o Iharaira, au kupu i korero ai koe ki to pononga ki toku pāpā ki a Rawiri.
- 27
- Otiia he pono ranei, tera ranei te Atua e noho ki runga ki te whenua? nana, kahore e nui hei nohoanga mou te rangi me te rangi o nga rangi; a, he aha ra tenei whare kua oti nei i a au te hanga.
- 28
- He aha koa ra, kia anga mai koe ki te inoi a to pononga, ki tana karanga, e Ihowa, e toku Atua, whakarongo ki te karanga, ki te inoi e inoi nei to pononga ki tou aroaro i tenei ra.
- 29
- Kia titiro mai ou kanohi ki tenei whare i te po, i te ao, ki te wahi i ki ai koe, Ko reira toku ingoa; whakarongo mai ki te inoi e inoi ai to pononga ki te ritenga mai o tenei wahi.
- 30
- Kia rongo hoki koe ki te karanga a to pononga a tou iwi hoki a Iharaira, ina inoi ki te ritenga mai o tenei wahi; na, kia rongo koe i te wahi e noho na koe i te rangi, a ka rongo, murua ta ratou kino.
- 31
- Ki te hara tetahi tangata ki tona hoa, a ka meinga he oati hei oati māna, a ka tae mai te oati ki mua i tou aata i tenei whare,
- 32
- Na, mau e whakarongo mai i te rangi, e mahi, e whakarite te whakawa a o pononga, mau e whakahe te tangata he, e mea iho tona ara ki runga ki tona mahunga, mau ano e whakatika ta te tika, e hoatu ki a ia nga mea e rite ana ki tona tika.
- 33
- Ki te patua tou iwi a Iharaira e te hoa riri, mo ratou i hara ki a koe, a ka hoki mai ki a koe, ka whakaae ki tou ingoa, ka inoi, ka karanga ki a koe i roto i tenei whare:
- 34
- Na, mau e whakarongo mai i te rangi, e muru te hara o tou iwi o Iharaira, e whakahoki mai ratou ki te whenua i hoatu e koe ki o ratou mātua.
- 35
- Ki te tutakina te rangi, a kahore he ua; mo ratou i hara ki a koe, a ka inoi ratou ki tenei wahi, ka whakaae ki tou ingoa, ka tahuri mai i to ratou hara, no ratou ka whakawhiua e koe:
- 36
- Na, mau e whakarongo mai i te rangi, e muru te hara o o pononga, o tou iwi o Iharaira, mau hoki ratou e whakaako ki te ara pai e haere ai ratou, e homai hoki he ua ki runga ki tou whenua, i homai nei e koe hei kāinga pumau mo tou iwi.
- 37
- Ki te mea he mate kai to te whenua, he mate uruta, ki te mea he ngingiotanga, he kokatanga no te kai, he mawhitiwhiti ranei, he moka ranei; ki te whakapaea ranei ratou e o ratou hoa riri ki te whenua o o ratou pa; ki te pa mai tetahi whiu, tetahi mate turoro ranei.
- 38
- Ki te mea he inoi, he karanga ranei na tetahi tangata, na tou iwi katoa ranei na Iharaira, ina mohio ratou ki te mate o tona ngakau, o tona ngakau, a ka wherahia mai ona ringa ki te ritenga mai o tenei whare:
- 39
- Na, mau e whakarongo mai i te rangi i tou wahi e noho na koe, e muru te he, e mahi, e hoatu ki nga tangata nga mea e rite ana ki nga huarahi katoa o tenei, o tenei, e mohio ana hoki koe ki tona ngakau; ko koe anake nei hoki te mohio ana ki nga ngakau o nga tamariki katoa a te tangata.
- 40
- Kia wehi ai ratou i a koe i nga ra katoa e ora ai ratou i runga i te mata o te whenua i homai nei e koe ki o matou matua.
- 41
- Na, te tangata iwi ke, ehara nei i tou iwi i a Iharaira, a ka tae mai i te whenua mamao, he whakaaro ki tou ingoa;
- 42
- (E rongo hoki ratou ki tou ingoa nui ki tou ringa kaha, ki tou tākakau kua oti te whakamaro,) a ka haere mai ka inoi ki te ritenga mai o tenei whare.
- 43
- Mau e whakarongo mai i te rangi i tou wahi e noho na koe, e mea nga mea katoa i karanga ai te tangata iwi ke ki a koe: kia mohio ai nga iwi katoa o te whenua ki tou ingoa, kia wehi ai i a koe, kia pera ai me tou iwi me Iharaira; kia mohio ai hoki kua oti tou ingoa te karanga ki runga ki tenei whare kua oti nei i a au te hanga.
- 44
- Ki te haere atu tou iwi ki te whawhai ki tona hoa riri, ki nga wahi e tonoa ai ratou e koe, a ka inoi mai ki a Ihowa ki te ritenga mai o te pa kua whiriwhiria nei e koe, o te whare ano hoki kua hangā nei e ahau mo tou ingoa:
- 45
- Na, mau e whakarongo mai i te rangi ki ta ratou inoi, ki ta ratou karanga, e whakatika hoki ta ratou.
- 46
- Ki te hara ratou ki a koe, (kahore hoki he tangata i hapa i te hara,) a ka riri koe ki a ratou, ka tuku i a ratou ki te hoa whawhai, a ka whakarautia atu e ratou hei whakarau ki te whenua o te hoa whawhai, ki te wahi tata, ki te wahi ranei e mamao atu ana;
- 47
- Na, ki te hoki ake to ratou mahara i te whenua i whakarautia atu ai ratou, a ka ripeneta ratou, ka inoi ki a koe i te whenua o o ratou kai herehere, ka mea, Kua hara matou, kua parori ke ta matou mahi, kua kino matou;
- 48
- A ka tahuri mai o ratou ngakau katoa, o ratou wairua katoa, ki a koe i te whenua o o ratou hoa riri i whakarautia atu ai ratou, a ka inoi ratou ki a koe ki te ritenga mai o to ratou nei whenua i homai e koe ki o ratou matua, ki te pai i whiriwhiria nei e koe, me tenei whare kua hangā nei e ahau mo tou ingoa:
- 49
- Na, mau e whakarongo mai i te rangi, i tou wahi e noho na koe, ki ta ratou inoi ki ta ratou karanga, mau hoki e whakatika ta ratou,
- 50
- Me muru hoki e koe te he o tou iwi i hara nei ki a koe, i a ratou mahi tutu katoa i tutu ai ratou ki a koe, meinga ano kia arohaina ratou e o ratou kai herehere, kia tohungia hoki e ratou.
- 51
- Ko tou iwi hoki ratou, me tou wahi tupu i whakaputaina mai nei e koe i Ihipa i roto i te oumu rino;
- 52
- Kia titiro mai ano ou kanohi ki te karanga a to pononga, ki te karanga ano hoki a tou iwi a Iharaira, whakarongo ki a ratou i a ratou karangatanga katoatanga ki a koe.
- 53
- Nau hoki ratou i wehe mai hei taonga tupu mou i roto i nga iwi katoa o te whenua, he kupu hoki nau, he mea whakapuaki mai na Mohi na to pononga i to whakaputanga mai i o matou mātou i Ihipa, e te Ariki, e Ihowa.
- 54
- A, te mutunga o ta Horomona inoi i tenei inoi katoa me tenei karanga ki a Ihowa, ka whakatika ake ia i mua i te aata a Ihowa i a ia ra i piko iho i runga i ona turi, tuwhera tonu ano hoki ona ringa whaka-te-rangi.
- 55
- Tu ana ia, nui atu hoki tona reo ki te manaaki i te huihui katoa o Iharaira, i mea ia,
- 56
- Kia whakapaingia a Ihowa nana nei i homai te okiokinga ki tona iwi ki a Iharaira; rite tonu tana ki nga mea katoa i korerotia e ia: hore rawa tetahi kupu i taka o ana mea pai katoa i korerotia e ia, i whakapuakina mai e tana pononga e Mohi.
- 57
- Hei hoa mo tatou a Ihowa to tatou Atua, kia pera ano me ia i o tatou matua; kaua ia e whakarere i a tatou, kaua hoki e mawehe atu i a tatou:
- 58
- Mana e whakaanga o tatou ngakau ki a ia, kia haere i ana ara katoa, kia pupuri i ana whakahaunga i ana tikanga me ana whakaritenga, i whakahaua e ia ki o tatou matua.
- 59
- Na, kia tata ki a Ihowa, ki to tatou Atua, i te ao, i te po, enei kupu aku i karanga nei ahau ki a Ihowa; kia whakatikaia ai e ia ta tana pononga, ta tona iwi ano hoki ta Iharaira e tohe ai, i nga meatanga o tenei ra, o tenei ra.
- 60
- Kia mohio ai nga iwi katoa o te whenua ki a Ihowa, ko ia te Atua, kahore ke atu.
- 61
- Na, kia tapatahi o koutou ngakau ki a Ihowa ki to tatou Atua, haere i runga i ana tikanga, puritia ana whakahaunga; kia rite ano ki to tenei ra.
- 62
- Na, patua iho e te kingi ratou tahi ko Iharaira katoa etahi patunga tapu ki te aroaro o Ihowa.
- 63
- I patua hoki e Horomona etahi patunga whakamarietanga, he mea patu nana ma Ihowa, e rua tekau ma rua mano nga kau, kotahi rau e rua tekau mano nga hipi. Na, kua taia te kawa o te whare o Ihowa e te kingi ratou ko nga tamariki katoa a Iharaira.
- 64
- I whakatapua ano hoki e te kingi i taua rangi a waenganui o te marae i mua i te whare o Ihowa: i tukua hoki e ia ki reira nga tahunga tinana, me nga whakahere toto-kore, me te ngako o nga whakamarietanga: he iti hoki no te aata parahi i te aroaro o Ihowa hei meatanga mo nga tahunga tinana, mo nga whakahere toto-kore, mo nga ngako o nga whakamarietanga.
- 65
- I whakaritea ano hoki he hakari ki te aroaro o Ihowa, o to tatou Atua, i taua wa e Horomona ratou ko Iharaira katoa, nui atu te huihui, no te haerenga atu ki Hamata tae noa ki te awa o Ihipa, e whitu nga ra, e whitu atu ano nga ra, kotahi tekau me wha aua ra.
- 66
- I te waru o nga ra ka tukua atu e ia te iwi kia haere, na, ka manaaki ratou i te kingi, a haere koa ana ki o ratou teneti, pai tonu hoki te ngakau i nga mea pai katoa i meinga e Ihowa ki a Rawiri ki tana pononga, ratou ko tona iwi ko Iharaira.
Address: 
Phone: 
Email: