- 1
- Na, kua whawhai tera nga Pirihitini ki a Iharaira, a ka whati nga tangata o Iharaira i te aroaro o nga Pirihitini, a hinga ana, mate rawa, i runga i Maunga Kiripoa.
- 2
- Na, ka whaia e nga Pirihitini a Haora ratou ko ana tama, a patua iho e nga Pirihitini a Honatana ratou ko Apinarapa, ko Marikihua, nga tama a Haora.
- 3
- Na, ka nui haere te whawhai ki a Haora, a ka mau ia i nga kai kopere; nui rawa tona tūnga i nga kai kopere.
- 4
- Katahi a Haora ka mea atu ki te kai mau o ana patu, Unuhia te hoari, werohia hoki ahau; kei haere mai tenei hunga kokoti-kore, a ka wero i a au, ka whakatupukino i a au. Heoi kihai i pai te kai mau a ana patu; he nui hoki no tona hopohopo. Na, ka mau a Haora ki tana hoari, hinga iho ana ia ki runga.
- 5
- A, te kitenga o te kai mau o ana patu, kua mate a Haora, na ka hinga ano hoki ia ki runga ki tana hoari, a mate tahi ana raua.
- 6
- Heoi kotahi tonu te matenga o Haora ratou ko ana tama tokotoru, ko te kai mau o ana patu, me ana tangata katoa, i taua rangi ano.
- 7
- A, te kitenga o nga tangata o Iharaira i tera taha o te raorao, i tera taha hoki o Horano, kua whati nga tangata o Iharaira, a kua mate a Haora, ratou ko ana tama, na, whakarerea ake e ratou nga pa, a rere ana; na, ka haere mai nga Pirihitini a nohoia iho e ratou.
- 8
- A, i te aonga ake, i te haerenga mai o nga Pirihitini ki te muru i te hunga i patua, na, ka kitea e ratou a Haora ratou ko ana tama tokotoru e takoto ana i runga i Maunga Kiripoa.
- 9
- Na, tapahia ana e ratou tona upoko, a murua ana āna patu, ungā ana e ratou kia kawea puta noa i te whenua o nga Pirihitini, a tawhio noa, kia kauwhautia i roto i te whare o a ratou whakapakoko, i roto hoki i te iwi.
- 10
- I whakatakotoria ano hoki e ratou ana patu ki te whare o Ahataroto, ko tona tinana ia i titia e ratou ki te taiepa o Pete-hana.
- 11
- A, te rongonga o nga tangata o Iapehe-kireara ki ta nga Pirihitini i mea ai ki a Haora;
- 12
- Te tino whakatikanga ake o nga tangata marohirohi katoa, pau katoa taua po i a ratou e haere ana; na, tangohia iho ana e ratou te tinana o Haora, me nga tinana o ana tama i runga i te taiepa o Pete-hana, a haere mai ana ki Iapehe, tahuna ana e ratou ki reira.
- 13
- I maua atu ano hoki o ratou wheua e ratou, a tanumia ana ki raro i tetahi rakau i Iapehe, a e whitu nga ra i noho puku ai ratou.
Address: 
Phone: 
Email: