- 1
- Na Paora, ratou ko Hirawanu, ko Timoti, ki te hahi o te hunga o Teharonika i roto i te Atua Matua, i te Ariki hoki i a Ihu Karaiti: Kia tau te aroha noa ki a koutou, me te rangimarie, he mea na te Atua na to tatou Matua, na te Ariki hoki na Ihu Karaiti.
- 2
- Whakawhetai tonu matou ki te Atua mo koutou katoa, maharahara tonu ki a koutou i a matou inoinga;
- 3
- Mau tonu ta matou mahara ki ta koutou mahi whakapono, ki te uaua o to koutou aroha, ki te u o te tumanako ki to tatou Ariki ki a Ihu Karaiti, i te aroaro o te Atua, ara o to tatou Matua;
- 4
- E mohio ana hoki matou, e nga teina e arohaina ana e te Atua, ki to koutou whiriwhiringa.
- 5
- Kihai hoki ta matou rongo pai i tae atu ki a koutou i runga i te kupu anake, engari i te kaha, i te Wairua Tapu hoki, nui atu hoki te u o te ngakau; e mātau ana ano hoki koutou ki to matou peheatanga i roto i a koutou, he whakaaro hoki ki a koutou.
- 6
- I whakarite ano hoki koutou ki ta matou, ki ta te Ariki ano hoki, he nui hoki te raru i te rironga atu o te kupu i a koutou, me te whakahari ano ia a te Wairua Tapu;
- 7
- No ka waiho koutou hei tauira ki te hunga whakapono katoa o Makeronia o Akaia.
- 8
- I pakū haere atu na hoki i roto i a koutou te kupu a te Ariki, ehara i te mea i Makeronia i Akaia anake, i puta atu ano hoki to koutou whakapono ki te Atua ki nga wahi katoa; a kahore he rawa e puaki ai tetahi kupu a matou.
- 9
- E korerotia nei hoki matou e ratou, to matou haerenga atu ki a koutou, ki to koutou tahuritanga mai hoki i nga whakapakoko ki te Atua, ki te mahi ki te Atua ara ki te Atua pono;
- 10
- Ki te tatari ano hoki ki tana Tama i te rangi, i whakaarahia ake nei e ia i te mate, ki a Ihu, e whakaora nei i a tatou i te riri meake nei puta.
Address: 
Phone: 
Email: