- 1
- Whaia te aroha; matenuitia nga mea wairua, te mea nui rawa kia poropiti koutou.
- 2
- Ki te mea he reo ke te korero a tetahi, ehara tana i te korero ki nga tāngata, engari ki te Atua: e kore hoki tetahi e rongo; heoi e korero ana ia, ara te wairua, i nga mea ngaro.
- 3
- Na, te tangata e poropiti ana, tana korero ki nga tāngata hei hanga i te pai, hei whakahauhau, hei whakamarie.
- 4
- He tangata korero reo ke, nona ake te pai e hangā ana e ia; ki te poropiti ia tetahi, ko te hahi tana e hanga ai.
- 5
- He pai ki a au me i korero koutou katoa i nga reo ke, erangi ia kia poropiti koutou: nui atu hoki te kai poropiti i te kai korero i nga reo ke, ki te kore ia e whakamaori, hei hanga mo te whare, ara, mo te hahi.
- 6
- Na, e aku teina, ki te haere atu ahau ki a koutou me te korero i nga reo ke, ma te aha ka whai pai ai koutou i a au, ki te mea ehara taku korero ki a koutou i te whakakite, i te matauranga, i te mahi poropiti, i te whakaako?
- 7
- Me nga mea whakatangi ano hoki, kahore nei he ora, ahakoa putorino, ahakoa hāpa, ki te kore e puta ke te tangi, me pehea ka mohiotia ai te rangi o te putorino, o te hāpa ranei?
- 8
- Ki te kahore hoki e mārama te tangi o te tetere, ko wai e takatu ki te whawhai?
- 9
- Whaihoki ko koutou, ki te kahore o koutou arero e korero i te kupu mārama, me pehea ka mohiotia ai te mea i korerotia? e korero hoki koutou ki te hau.
- 10
- Tenei ano pea kei te ao aua reo maha, heoi kahore he reo tikanga kore.
- 11
- Na, ki te kore e kitea e ahau te tikanga o te reo, hei tau tangata ahau ki te tangata e korero ana; a hei tau tangata ki a au taua tangata e korero ana.
- 12
- Me koutou ano hoki, ka matenui na ki nga mea wairua, tohea kia kake ta koutou pai hei hanga i te whare, ara, i te hahi.
- 13
- Na, te tangata e korero ana i te reo ke, me inoi ia kia taea e ia te whakamaori.
- 14
- Ki te mea hoki he reo ke toku ina inoi, ko toku wairua te inoi ana; ko toku mahara ia e hua kore ana.
- 15
- Me pehea ra? Ka inoi ahau i runga i te wairua, ka inoi ano hoki i runga i te mahara: ka waiata ahau i runga i te wairua, ka waiata ano hoki i runga i te mahara.
- 16
- Me pehea oti te tangata e noho ana i te wahi o te kuare ka mea ai, Amine, ki tau whakawhetainga, ina whakapai atu koe i runga i te wairua? e kore hoki ia e mohio ki tau e korero ai.
- 17
- E pai ana ano hoki tau whakawhetainga, otiia e kore to tera pai e hangā.
- 18
- He whakawhetai taku ki toku Atua, no te mea maha atu oku reo e korero ai i o koutou katoa:
- 19
- Ki taku ia, na, taku korero i nga kupu e rima i roto i te hahi i runga i toku mahara, hei ako mo era atu, pai atu i nga kupu kotahi tekau mano o te reo ke.
- 20
- E aku teina, aua o koutou mahara e whakatupu tamariki: he mauahara ia me whakatupu tamariki, engari ko nga mahara me whakatupu kaumatua.
- 21
- Ka oti te tuhituhi i roto i te ture, He tangata reo ke, he ngutu ke hei kai korero maku ki tenei iwi; heoi e kore ratou e whakarongo mai ki a au, e ai ta te Ariki.
- 22
- Hei tohu hoki nga, reo ke, he teka ki te hunga whakapono, engari ki te hunga whakapono kore: ko te mahi poropiti ia ehara i te mea ki te hunga whakapono kore, engari ki te hunga whakapono.
- 23
- Na, ki te huihui te hahi katoa ki te wahi kotahi, a ko te katoa kei te korero i nga reo, na kua tapoko mai ki roto te hunga kuare, te hunga whakapono kore ranei, e kore ranei ratou e mea e haurangi ana koutou?
- 24
- Tena ko tenei ka poropiti katoa a ka tapoko mai tetahi tangata whakapono kore, kuare ranei, ka mau tana hē i te katoa, ka whakawakia e te katoa:
- 25
- Ka whakakitea ano hoki nga mea, ngaro o tona ngakau; na ka takoto tapapa ia, ka koropiko ki te Atua, me tana ki ake ano, He pono kei roto i a koutou te Atua.
- 26
- A e pehea ana tena, e aku teina? Ka huihui koutou, he waiata ta tetahi o koutou, he whakaako ta tetahi, he reo ta tetahi, he whakakitenga ta tetahi, he whakamaoritanga ta tetahi. Kia meinga nga mea katoa hei hanga mo te whare.
- 27
- Ki te korero tetahi i te reo ke, kia tokorua, kei neke ake i te tokotoru, kia taki kotahi ia ki te korero; a kia kotahi hei whakamaori.
- 28
- A ki te kahore he kai whakamaori, kaua ia e korero i roto i te hahi; engari me korero ki a ia ake ano, ki te Atua ano hoki.
- 29
- Kia tokorua kia tokotoru nga poropiti hei korero, a ma etahi e hurihuri.
- 30
- Ki te whakakitea mai ia tetahi mea ki tetahi tangata e noho noa ana, kia mutu te korero a to mua.
- 31
- E ahei ano koutou katoa te poropiti taki tahi, kia ako ai te katoa, kia whakamarietia ai te katoa.
- 32
- E ngohengohe ana hoki ki nga poropiti nga wairua o nga poropiti.
- 33
- Ehara hoki ia i te Atua o te whakararuraru, engari no te rangimarie, e pera ana hoki i roto i nga hahi katoa o te hunga tapu.
- 34
- Kaua a koutou wāhine e korero i roto i nga hahi: e kore hoki ratou e tukua kia korero; engari me whakarongo marie, ko ta te ture hoki tena e mea nei.
- 35
- Ki te hiahia hoki ratou ki te ako i tetahi mea, me ui ki o ratou tahu i roto i te whare: he mea whakama hoki kia korero nga wāhine i roto i te hahi.
- 36
- I puta mai koia te kupu a te Atua i a koutou? i tae atu ranei ki a koutou anake?
- 37
- Ki te mea tetahi he poropiti ia, he tangata ranei i te Wairua, māna e whakaae ki aku e tuhituhi atu nei ki a koutou, he ture na te Ariki.
- 38
- Otira ki te kuare tetahi tangata, kia kuare ano ia.
- 39
- Na, e aku teina, matenuitia te mahi poropiti, kaua hoki e riria te korero i nga reo ke.
- 40
- Kia ahua pai kia tika te meatanga o nga mea katoa.
Address: 
Phone: 
Email: