- 1
- Na ka haere a Rehopoama ki Hekeme: kua tae mai hoki a Iharaira katoa ki Hekeme ki te whakakingi i a ia.
- 2
- A, te rongonga o Ieropoama tama a Nepata; i Ihipa na ano hoki ia, (i rere hoki ia ki reira i te aroaro o Kingi Horomona,) na, hoki mai ana a Ieropoama i Ihipa;
- 3
- Na, ka tono tangata atu ratou ki te tiki i a ia. A ka haere a Ieropoama ratou ko Iharaira katoa, ka korero ki a Rehopoama, ka mea,
- 4
- He pakeke te ioka i meatia e to pāpā ki a matou: na, mau e whakamāmā ake te mahi pakeke a tou pāpā, me tana ioka taimaha i meatia e ia ki a matou, a ka mahi matou ki a koe.
- 5
- Na, ko tana meatanga atu ki a ratou, Kia toru ake ra, ka hoki mai koutou ki a au. Na, haere ana te iwi.
- 6
- Katahi ka runanga a Kingi Rehopoama ki nga kaumatua i tu i te aroaro o tona pāpā o Horomona, i a ia i te ora, ka mea, Tena koa ki ta koutou whakaaro te kupu hei whakahokinga atu maku ki tenei iwi?
- 7
- Na, ka korero mai ratou ki a ia, ka mea, Ki te mea ka pai tau ki tenei iwi, a ka whakamanawareka koe i a ratou, a ka pai nga korero e korerotia e koe ki a ratou, na, ko ratou hei pononga mau i nga ra katoa.
- 8
- Heoi whakarerea ake e ia te whakaaro i whakatakotoria mai mana e nga kaumatua, a, runanga ana ki nga taitamariki i kaumatua ngatahi nei me ia, i tu nei ki tona aroaro.
- 9
- I mea ia ki a ratou, Ki ta koutou whakaaro me pehea te kupu e whakahoki atu ai tatou ki tenei hunga i korero mai nei ki a au, i mea mai nei, Whakamāmākia ake te ioka i meatia mai e to pāpā ki a matou?
- 10
- Na, ko te meatanga atu ki a ia a nga taitamariki i kaumatua ngatahi nei me ia, ka mea atu, Kia penei to ki atu ki tenei hunga i korero mai ra ki a koe, i mea ra, I whakataimahatia e to pāpā to matou ioka, na, kia māmā mai tau ki a matou, kia penei to ki atu ki a ratou, Taku maihao iti, ka nui atu i te hope o toku pāpā.
- 11
- Na, i whakawahā e toku pāpā he ioka taimaha ki a koutou; me tapiri ia e ahau tetahi atu mea ki to koutou ioka; he wepu ta toku pāpā hei whiu mo koutou; taku ia he kopiona.
- 12
- Na, kua tae mai a Ieropoama ratou ko te iwi katoa ki a Rehopoama i te toru o nga ra; ko ta te kingi hoki tena i korero ai, i a ia ra i mea, Hoki mai ki a au i te toru o nga ra.
- 13
- A, pakeke tonu ta te kingi i whakahoki mai ai; whakarerea ake e Rehopoama te whakaaro a nga kaumatua.
- 14
- A, rite tonu ki ta nga taitamariki whakaaro tana i korero ai ki a ratou: i mea ia, I whakataimahatia to koutou ioka e toku pāpā; me tapiri atu ano ia e ahau tetahi atu wahi: he wepu ta toku pāpā hei whiu mo koutou; taku ia he kopiona.
- 15
- Heoi kihai i whakarongo te kingi ki ta te iwi; na te Atua hoki te take, kia mana ai tana kupu i korero ai a Ihowa, i whakapuakina mai nei e Ahia Hironi ki a Ieropoama tama a Nepata.
- 16
- A, te kitenga o Iharaira katoa kihai te kingi i whakarongo ki ta ratou, na, ka whakahokia mai e te iwi ki te kingi; ka mea ratou, Ko te aha ianei ta matou wahi i roto i a Rawiri? kahore nei hoki o tatou wahi tupu i roto i te tama a Hehe: ki o koutou teneti, e Iharaira! na, kia whai kanohi koe ki tau whare, e Rawiri! Na, haere ana a Iharaira katoa ki tona teneti, ki tona teneti.
- 17
- Ko nga tamariki ia a Iharaira e noho ana ki nga pa o Hura, ko Rehopoama hei kingi mo ratou.
- 18
- Na, ka tono a Kingi Rehopoama i te rangatira takoha, i a Hatorama; a, akina ana ia e nga tamariki a Iharaira ki te kohatu, a mate iho ia. Na, hohoro tonu te eke o Kingi Rehopoama ki runga ki tona hariata, a, rere ana ki Hiruharama.
- 19
- Na, whakatangata ke ana a Iharaira ki te whare o Rawiri, a taea noatia tenei ra.
Address: 
Phone: 
Email: