- 1
- A, te rongonga o te Kuini o Hepa ki te rongo o Horomona, ka haere mai ia ki te whakamatau i a Horomona ki nga kupu pakeke ki Hiruharama. Nui atu hoki te tira, he kamera ano hoki e waha ana i nga mea kakara, i tona nui o te koura, i te kohatu utu nui. A, tona taenga mai ki a Horomona, ka korerotia e ia ki a ia nga mea katoa i roto i tona ngakau.
- 2
- A, whakaaturia ana e Horomona ki a ia te tikanga o ana kupu katoa, kahore he kupu i ngaro i a Horomona, i kore te whakaatu ki a ia.
- 3
- A, te kitenga o te Kuini o Hepa i te mohiotanga o Horomona, i te whare ano hoki i hangā e ia,
- 4
- I te kai o tana tepu, i te nohoanga iho o ana tangata, i te turanga o ana kai mahi, i o ratou kakahu, i ona kai riringi waina, me o ratou kakahu, i tona pikitanga i piki atu ai ia ki te whare o Ihowa, na, kore ake he wairua i roto i a ia.
- 5
- Na, ko tana meatanga atu ki te kingi, pono tonu nga mea i rongo ai ahau i toku whenua mo au korero, mo tou mohiotanga.
- 6
- Heoi kihai ahau i whakapono ki ā ratou korero, a tae noa mai ahau, kite noa oku kanohi. Nana, kihai te hawhe o te nui o tou mohiotanga i korerotia mai ki a au: nui atu tau i te rongo i rongo ai ahau.
- 7
- Ano te hari o o tangata, te hari o o pononga nei e tu tonu nei i tou aroaro, e whakarongo nei ki tou mohiotanga!
- 8
- Kia whakapaingia a Ihowa tou Atua i whakaahureka mai nei ki a koe, i homai nei i a koe ki runga ki tona torona, hei kingi ma Ihowa, ma tou Atua; he aroha no tou Atua ki a Iharaira, he mea ano kia whakapumautia ai ratou ake ake ake, koia koe i meinga ai e ia hei kingi mo ratou, hei mahi i te whakarite whakawa, i te tika.
- 9
- Na, homai ana e ia ki te kingi kotahi rau e rua tekau nga taranata koura, tona tini ano hoki o nga mea kakara, me nga kohatu utu nui; kahore ano hoki he mea kakara hei rite mo enei i homai nei e te Kuini o Hepa ki a Kingi Horomona.
- 10
- Na, nga tangata o Hurama, ratou ko nga tangata o Horomona, i kawea mai ai te koura i Opira, i kawea mai ano e ratou nga rakau aramuka, me nga kohatu utu nui.
- 11
- Na, ka hangā aua rakau aramuka e te kingi hei huarahi ki te whare o Ihowa, ki te whare ano hoki o te kingi, hei hāpa ano hoki, hei hatere, hei mea ma nga kai waiata: kahore ano hoki i kitea he pera i mua i te whenua o Hura.
- 12
- Na, ka homai e Kingi Horomona ki te kuini o Hepa nga mea katoa i pai ai ia, ana hoki i tono ai, ki runga ake i nga mea i kawea mai e ia ki te kingi. Katahi ia ka tahuri, a, haere ana ratou ko ana tangata ki tona whenua.
- 13
- Na, te taimaha o te koura i tae mai ki a Horomona i te tau kotahi, e ono rau e ono tekau ma ono nga taranata koura.
- 14
- Tera ano etahi atu, ko nga mea i kawea mai e nga kai rapu taonga, e nga kai hokohoko. I kawea mai ano he koura, he hiriwa, e nga kingi katoa o Arapia, e nga kawana o te whenua, ki a Horomona.
- 15
- Ka hangā e Kingi Horomona etahi pukupuku, e rua nga rau, he mea patu te koura; e ono rau nga hekere o te koura patu i meatia ki te pukupuku kotahi.
- 16
- Me etahi pukupuku iti iho, e toru nga rau, he mea patu ano te koura: e toru rau nga hekere koura i meatia ki te pukupuku kotahi: a, whakatakotoria ana aua mea e te kingi ki te whare o te ngahere o Repanona.
- 17
- I hangā ano hoki e te kingi tetahi torona nui ki te rei, whakakikoruatia iho e ia ki te koura para-kore.
- 18
- A, e ono nga kaupae ki te torona, me te turanga waewae ano, he mea koura, he mea hono ki te torona, me nga okiokinga ano i te wahi e nohoia ana, i tetahi taha, i tetahi taha, a, e rua nga raiona e tu ana i te taha o nga okiokinga.
- 19
- Kotahi tekau ma rua hoki nga raiona i reira e tu ana i tetahi taha, i tetahi taha, i runga i nga kaupae e ono. Kahore he mea pera i hangā i tetahi atu rangatiratanga.
- 20
- Na, nga oko inu katoa a Kingi Horomona, he koura kau; me nga oko katoa o te whare o te ngahere o Repanona, he koura para-kore; kahore he mea hiriwa; kihai tera i kiia he mea nui i nga ra o Horomona.
- 21
- I rere hoki nga kaipuke a te kingi ki Tarahihi i roto i o nga tangata a Hurama: kotahi te ūnga mai i nga tau e toru o nga kaipuke o Tarahihi, hei kawe mai i te koura, i te hiriwa, i te rei, i nga api, me nga pikoki.
- 22
- Na, nui atu a Kingi Horomona i nga kingi katoa o te whenua, te whai taonga, te mohio.
- 23
- I whaia mai ano a Horomona e nga kingi katoa o te whenua, kia rongo ai ratou i tona mohiotanga i homai nei e te Atua ki tona ngakau;
- 24
- Me te kawe mai ano ratou i tana hakari, i tana hakari, i nga oko hiriwa, i nga oko koura, i nga kakahu, i nga mea mo te whawhai, i nga mea kakara, i nga hoiho, i nga muera, he mea tatau a tau tonu.
- 25
- Na, e wha mano nga turanga a Horomona mo nga hoiho, mo nga hariata, tekau ma rua mano ano hoki nga kai noho hoiho, waiho ana e ia ki nga pa hariata, ki te kingi ano hoki ki Hiruharama.
- 26
- Na, ko ia hei kingi mo nga kingi katoa, o te awa atu, a tae noa ki te whenua o nga Pirihitini, ki te rohe ra ano ki Ihipa.
- 27
- Na, meinga ana te hiriwa o Hiruharama e te kingi kia rite ki nga kohatu; i meinga ano hoki e ia nga hita kia rite ki nga hikamora i te raorao te tini.
- 28
- A, i kawea mai ano he hoiho mo Horomona i Ihipa, i nga whenua katoa ano hoki.
- 29
- Na, era atu meatanga a Horomona, o mua, o muri, kahore ianei i tuhituhia ki te pukapuka a Natana poropiti, ki te poropitanga ano hoki a Ahia Hironi, ki nga kitenga ano o Iro matakite i nga mea me Ieropoama tama a Nepata?
- 30
- Na, te kingitanga o Horomona ki Hiruharama, ki a Iharaira katoa ano hoki, e wha tekau nga tau.
- 31
- Na, kua moe a Horomona ki ona mātua, a, tanumia ana ki te pa o tona pāpā o Rawiri, a, ko tana tama ko Rehopoama hei kingi i muri i a ia.
Address: 
Phone: 
Email: