- 1
- Na, i te mea ka tangohia atu a Iraia e Ihowa ki te rangi i roto i te tukauati, ka haere mai a Iraia raua ko Eriha i Kirikara.
- 2
- Na, ko te meatanga ake a Iraia ki a Eriha, Hei konei koe noho ai, kua ungā hoki ahau e Ihowa ki Pete-ere. Ano ra ko Eriha, E ora ana a Ihowa, e ora ana hoki tou wairua, e kore ahau e whakarere i a koe. Na, haere tahi ana raua ki raro ki Pete-ere.
- 3
- Na, ka puta mai nga tama a nga poropiti i Pete-ere ki a Eriha, a ka mea ki a ia. E mohio ana ranei koe ko aianei tangohia ai tou ariki e Ihowa i runga i tou upoko? Ano ra ko ia, E mohio ana ano ahau; whakarongoa.
- 4
- Na, ka mea a Iraia ki a ia, E Eriha, hei konei koe noho ai; kua ungā hoki ahau e Ihowa ki Heriko. Ano ra ko tera, E ora ana a Ihowa, e ora ana hoki tou wairua, e kore ahau e whakarere i a koe. Heoi haere ana raua ki Heriko.
- 5
- Na, ka haere mai nga tama a nga poropiti i Heriko ki a Eriha, a ka mea ki a ia, E mohio ana ranei koe ko aianei tangohia ai e Ihowa tou ariki i runga i tou upoko? Ano ra ko ia, E mohio ana ano ahau; whakarongoa.
- 6
- Na, ka mea a Iraia ki a ia, Hei konei koe noho ai; kua ungā hoki ahau e Ihowa ki Horano. Ano ra ko tera, E ora ana a Ihowa, e ora ana hoki tou wairua, e kore ahau e whakarere i a koe. Na, haere ana raua tokorua.
- 7
- Katahi ka haere etahi tangata e rima tekau, he tamariki na nga poropiti, a, tu ana i te ritenga mai i tawhiti; me te tu ano raua tokorua ki te taha o Horano.
- 8
- Na, ka mau a Iraia ki tona koroka, whakakopaia ana e ia, patua ana e ia nga wai, a ka wehea ki tetahi taha, ki tetahi taha; a whiti ana raua tokorua i te wahi maroke.
- 9
- A, to raua whitinga atu, ka mea a Iraia ki a Eriha, Tonoa mai, ko te aha kia meatia e ahau mau i te mea kahore ano ahau kia wehea noatia atu i a koe. Ano ra ko Eriha, Kia rereruatia mai ki a au te wahi wairua i a koe na.
- 10
- Na, ko te meatanga atu a tera, He mea pakeke tau i tono mai na. Ki te kite koe i a au e tangohia atu ana i a koe, ka rite ki tau na; ki te kahore, e kore ano hoki.
- 11
- Heoi i a raua e haere ana, me te korero haere, na, ko tetahi hariata ahi me nga hoiho ahi, a, wehea ana raua tokorua. Na, kake ana a Iraia i roto i te tukauati ki runga ki te rangi.
- 12
- A, te kitenga o Eriha, na, ka karanga ia, E toku pāpā, e toku pāpā, e te hariata o Iharaira, e ona kai eke hoiho; kihai hoki ia i kite i a ia i muri iho. Na, ka mau ia ki ona kakahu ake, a, haea iho kia rua nga wahi.
- 13
- Katahi ka tangohia ake e ia te koroka o Iraia i marere i runga i a ia; a hoki ana, tu ana ki te pareparenga o Horano.
- 14
- Na, ka mau ia ki te koroka o Iraia i marere nei i runga i a ia, a, patua iho ki nga wai me te ki iho ano, Kei hea ianei a Ihowa te Atua o Iraia? Na, ka patua nei ano hoki e ia nga wai, kua wehea ki tetahi taha, ki tetahi taha, a, whiti mai ana a Eriha.
- 15
- A ka kitea mai ia e nga tama a nga poropiti i Heriko, i tu mai nei i te ritenga mai, ka mea ratou, Kua tau te wairua o Iraia ki runga ki a Eriha. Na, haere mai ana ratou ki te whakatau i a ia, piko iho ana ki tona aroaro ki te whenua.
- 16
- Na, ko to ratou meatanga mai ki a ia, Nana, tenei etahi tangata, e rima tekau, kei o pononga, he hunga marohirohi, kia haere ratou, ne? ki te rapu i tou ariki; tera pea ia kua kahakina atu e te wairua o Ihowa, kua makā ki tetahi o nga maunga, ki tetahi awaawa ranei. Na, ka ki mai ia, Kaua e ungā e koutou.
- 17
- Na, tohe ana ratou ki a ia, a whakama noa ia. Katahi ia ka ki ake, Ungā atu. Na, ungā ana e ratou, e rima tekau nga tangata: a, e toru nga ra i rapua ai ia, heoi kihai i kitea.
- 18
- Na, hoki mai ana ratou ki a ia, i Heriko hoki ia e noho ana. A ka mea ia ki a ratou, Kihai ianei ahau i mea ki a koutou, Kaua e haere?
- 19
- Na, ka mea mai nga tangata o te pa ki a Eriha, Nana, he pai te turanga o tenei pa, ka kite nei hoki toku ariki; he kino ia te wai, he titohea ano hoki te whenua.
- 20
- Na, ko tana meatanga atu, Tikina atu tetahi oko hou maku; meatia iho ano hoki tetahi tote ki roto. Na, ka kawea mai e ratou ki a ia.
- 21
- Na, haere ana ia ki te puna o te wai, a makā ana te tote ki roto; me te ki atu ano, Ko te kupu tenei a Ihowa. Kua ora tenei wai i a au; heoi ano o konei mate, o konei titohea.
- 22
- Na, ora tonu ake taua wai a mohoa noa nei, pera tonu me ta Eriha kupu i korero ai.
- 23
- Na, ka haere atu ia i reira ki Pete-ere; a, i a ia e haere ana i te ara, na, ko te putanga mai o etahi tamariki ririki i roto i te pa, ka taunu ki a ia, ka mea Pakira, haere ki runga; pakira, haere ki runga.
- 24
- Na, tahuri mai ana ia, titiro ana ki a ratou; kangā iho ratou i runga i te ingoa o Ihowa. Na, ko te putanga mai o nga pea e rua i roto i te ngahere, haea ana etahi o ratou, e wha tekau ma rua nga tamariki.
- 25
- Na, haere atu ana ia i reira ki Maunga Karamere, a, hoki ana i reira ki Hamaria.
Address: 
Phone: 
Email: