- 1
- E waru nga tau o Hohia i tona kingitanga ai, a, e toru tekau ma tahi nga tau i kingi ai ia ki Hiruharama. Na, te ingoa o tona whaea, ko Ierira, he tamahine na Araia, no Pohokata.
- 2
- A, tika tonu tana mahi ki te titiro iho a Ihowa: i haere hoki ia i runga i nga ara katoa o tona tupuna, o Rawiri; kihai hoki i peka atu ki matau, ki maui.
- 3
- Na, i te tekau ma waru o nga tau o kingi Hohia ka ungā atu e te kingi a Hapana tama a Ataria tama a Mehurama, te kai tuhituhi, ki te whare o Ihowa; i mea ia,
- 4
- Haere ki a Hirikia ki te tino tohunga, kia huihuia e ia te moni e kawea ana ki roto ki te whare o Ihowa, ta nga kai tiaki o te kuwaha i tango ai i te iwi,
- 5
- Ka hoatu ki nga ringa o nga kai mahi o te mahi, o nga kai tohutohu o te whare o Ihowa; a, ma ratou e hoatu ki nga kai mahi o te mahi i te whare o Ihowa, hei hanga mo nga wahi pakaru o te whare,
- 6
- Ki nga kamura, ki nga kai hanga, ki nga kai mahi kohatu; hei hoko ano hoki i nga rakau, i nga kohatu tarai, hei hanga mo te whare.
- 7
- Otiia kihai i uiuia a ratou meatanga i te moni i hoatu nei ki o ratou ringa, he pono hoki to ratou mahi.
- 8
- Na, ko te meatanga atu a Hirikia, a te tino tohunga, ki a Hapana kai tuhituhi, Kua kitea e ahau te pukapuka o te ture ki te whare o Ihowa. Katahi ka hoatu te pukapuka e Hirikia ki a Hapana, a korerotia ana e ia.
- 9
- Na, haere ana a Hapana te kai tuhituhi ki te kingi, whakahokia mai ana te korero e ia ki te kingi, ka mea, Kua ringiringitia e o pononga te moni i kitea ki te whare, a, hoatu ana e ratou ki nga ringa o nga kai mahi i te mahi, o nga kai tohutohu o te whare o Ihowa.
- 10
- Katahi ka whakaatu atu a Hapana te kai tuhituhi ki te kingi, ka mea, Kua homai e Hirikia, e te tohunga, he pukapuka ki a au. Na, korerotia ana e Hapana ki te aroaro o te kingi.
- 11
- A, te rongonga o te kingi i nga kupu o te pukapuka o te ture, na, haea ana e ia ona kakahu.
- 12
- Katahi te kingi ka whakahau atu ki te tohunga, ki a Hirikia, ratou ko Ahikama tama a Hapana, ko Akaporo tama a Mikaia, ko Hapana kai tuhituhi, ko Ahaia tangata a te kingi, ka mea,
- 13
- Haere, ui atu ki a Ihowa moku, mo tenei iwi, mo Hura katoa ano hoki, he mea hoki na nga kupu o tenei pukapuka kua kitea nei: he nui hoki te riri a Ihowa kua ngiha nei ki a tatou, no te mea kihai o tatou mātua i whakarongo ki nga kupu o tenei pukapuka, kihai i mahi i nga mea katoa i tuhituhia hei mea ma tatou.
- 14
- Na, haere ana a Hirikia te tohunga, ratou ko Ahikama, ko Akaporo, ko Hapana, ko Ahaia ki a Hurura ki te wahine poropiti, wahine a Harumu a te kai tiaki kakahu, he tama hoki tera na Tikiwa tama a Harahaha: i Hiruharama hoki taua wahine e noho ana, i te wahi tuarua. Na, korero ana ratou ki a ia.
- 15
- Na, ko tana meatanga mai ki a ratou, Ko te korero tenei a Ihowa Atua o Iharaira, Mea atu ki te tangata nana koutou i unga mai ki a au,
- 16
- Ko ta Ihowa kupu tenei, Tenei au te kawe atu nei i te kino mo tenei wahi, mo nga tangata ano hoki o konei, ara, nga kupu katoa o te pukapuka i korerotia ra e te kingi o Hura;
- 17
- Mo ratou i whakarere i a au, i tahu whakakakara ki nga atua ke, he whakapataritari hoki i a au ki nga mahi katoa a o ratou ringa; koia i ngiha ai taku riri ki tenei wahi; e kore ano e tineia.
- 18
- Na, me ki atu e koutou ki te kingi o Hura nāna nei koutou i unga mai ki te ui ki a Ihowa, Ko te kupu tenei a Ihowa Atua o Iharaira, Na, nga kupu i rongo ra koe,
- 19
- E whakaaro ana ahau e ngawari ana tou ngakau, a, kua whakaiti koe i a koe ki te aroaro o Ihowa, i a koe ka whakarongo nei ki taku i mea ai mo tenei wahi, mo ona tangata ano hoki, kia whakangaromia, kia kangā; i a koe ano hoki ka haehae i ou kakahu, ka tangi ki toku aroaro; na, kua whakarongo ano ahau, e ai ta Ihowa.
- 20
- Nana, ka huihuia atu koe e ahau ki ou mātua, ka huihuia atu ano koe ki tou tanumanga i runga i te rangimarie, e kore ano hoki ou kanohi e kite i nga kino katoa e kawea mai e ahau ki tenei wahi. Na, whakahokia ana te korero e ratou ki te kingi.
Address: 
Phone: 
Email: