- 1
- Na, muri iho i enei mea ka mea hariata a Apoharama mana, me etahi hoiho, me nga tangata e rima tekau hei rere i tona aroaro.
- 2
- Na, ka maranga wawe a Apoharama, a ka tu ki te taha o te huarahi, ki te kuwaha, na, ki te mea he totohe ta tetahi tangata, a ka tae mai ki te kingi kia whakaritea, ka karanga atu a Apoharama ki a ia, ka mea, No tehea pa koe? A ka mea mai tera, No tetahi o nga iwi o Iharaira to pononga.
- 3
- Na, ko te meatanga atu a Apoharama ki a ia, Nana, he pai o korero, he tika; heoi kahore he tangata a te kingi hei whakarongo ki a koe.
- 4
- I mea ano a Apoharama, Aue, me i meinga ahau hei kai whakarite whakawa mo te whenua, a ka tae mai ki a au nga tangata katoa, he totohe nei ta ratou, he whakawakanga, ina, kua whakatikaia ta ratou e ahau.
- 5
- A ka whakatata mai tetahi tangata ka piko ki a ia, na, ka totoro mai tona ringa, a ka hopu i a ia, ka kihi i a ia.
- 6
- Penei tonu te mahi a Apoharama ki a Iharaira katoa, ina haere mai ki te kingi kia whakaritea he whakawakanga; na, tahaetia ana e Apoharama nga ngakau a nga tangata o Iharaira.
- 7
- Na, i te mutunga o nga tau e wha tekau ka mea a Apoharama ki te kingi, Kia haere ahau, ne? ki te whakamana i aku kupu taurangi i puaki i a au ki a Ihowa i Heperona.
- 8
- I puaki hoki te kupu taurangi a to pononga, i a au e noho ana i Kehuru i Hiria; i mea ahau, Ki te whakahokia ahau e Ihowa ki Hiruharama, katahi ahau ka mahi ki a Ihowa.
- 9
- Na, ka mea te kingi ki a ia, Haere marie. Na, whakatika ana ia, a, haere ana ki Heperona.
- 10
- Katahi a Apoharama ka tono tangata atu puta noa i nga iwi katoa o Iharaira hei mea, E rongo koutou i te tangi o te tētere, na, ka mea koutou, Ko Apoharama te kingi, kei Heperona.
- 11
- A, e rua rau nga tangata i haere tahi i a Apoharama i roto i Hiruharama, he hunga i karangatia: otiia he haere noa ta ratou, kihai hoki i mohio ki tetahi mea.
- 12
- A, i tikina ano e Apoharama a Ahitopere Kironi te kai whakatakoto whakaaro a Rawiri i roto i tona pa i Kiroho, i a ia ano e patu ana i nga patunga tapu. Na, kua kaha te taua; i tini haere hoki nga tangata a Apoharama.
- 13
- Na, ko te taenga mai o tetahi kai korero ki a Rawiri, Tana kupu, Kei te whai i a Apoharama nga ngakau o nga tangata o Iharaira.
- 14
- Na, ka mea a Rawiri ki ana tangata katoa i tona taha i Hiruharama, Whakatika, kia rere tatou; ka kore hoki he mawhititanga atu ma tatou i te aroaro o Apoharama: hohoro te haere, kei hohoro mai ia, a ka mau tatou; na, ka akina mai e ia he kino ki a tatou, a ka tukitukia te pa ki te mata o te hoari.
- 15
- Na, ko te meatanga mai a nga tangata a te kingi, ki te kingi, Tenei o pononga hei mea i nga mea katoa e pai ai toku ariki te kingi.
- 16
- Na, haere ana te kingi ratou ko tona whare katoa e whai ana i a ia. Otiia i mahue i te kingi etahi wahine, he wahine iti nana, hei tiaki i te whare.
- 17
- Heoi haere ana te kingi ratou ko te iwi katoa e whai ana i a ia, a, noho rawa atu ki tetahi wahi i tawhiti.
- 18
- I haere atu ano hoki ana tangata katoa i tona taha; me nga Kereti katoa, ratou ko nga Pereti katoa, ko nga Kiti katoa; nga rau e ono i whai mai nei i a ia i Kata; i haere ratou i mua i te kingi.
- 19
- Na, ka mea te kingi ki a Itai Kiti, He aha ano hoki koe i haere ai tatou? hoki atu ki tou wahi, noho ai ki te kingi; he tangata ke hoki koe, he manene ano hoki.
- 20
- Nonanahi nei hoki koe i haere mai ai, a, kia mea ahau i a koe i tenei ra kia kopikopiko haere tahi tatou? Ko au ia ka haere ki taku haere noa atu. Hoki atu, whakahokia ano hoki o teina. Kia whai tahi te pono me te aroha i a koe.
- 21
- Na, ka whakahokia mai e Itai ki te kingi, ka mea, E ora ana a Ihowa, e ora ana hoki toku ariki te kingi, na, te wahi e noho ai toku ariki te kingi, ahakoa i te mate, ahakoa i te ora, ko reira ano hoki to pononga.
- 22
- Ano ra atu ko Rawiri ki a Itai, Hoatu, whiti atu. Na, whiti atu ana a Itai Kiti, ratou ko ana tangata katoa me nga tamariki katoa e noho ana ki a ia.
- 23
- Nui atu hoki te reo i tangi ai te whenua katoa. Na, ka whiti atu te iwi katoa: i whiti atu ano hoki te kingi i Awa Kitirono, me te whiti atu ano te iwi katoa, whaka-te-ara ki te koraha.
- 24
- Ko Haroko ano hoki tera, ratou tahi ko nga Riwaiti katoa, e amo ana i te aaka o te kawenata a te Atua: na, ka whakatakotoria iho e ratou te aaka a te Atua; na, ka piki atu a Apiatara, a, poto noa te iwi katoa te whiti mai i roto i te pa.
- 25
- Katahi te kingi ka mea ki a Haroko, Whakahokia te aaka a te Atua ki te pa: ki te manakohia mai ahau e Ihowa, ka whakahokia mai ahau e ia, ka whakakitea mai ano hoki taua aaka me tona nohoanga ki a au.
- 26
- A, ki te mea mai ia ki a au, Kahore ahau e pai ki a koe; tenei ahau, mana e mea ki a au te mea e pai ana ki tana titiro iho.
- 27
- I mea ano te kingi ki a Haroko tohunga, Ehara ianei koe i te matekite? hoki marie atu ki te pa, koutou ko a korua tama, ko to tama ko Ahimaata; raua ko Honatana tama a Apiatara.
- 28
- Nana, me tatari au i te mānia i te koraha, kia tae ake ra ano he korero i a korua hei whakaatu tikanga ki a au.
- 29
- Na, whakahokia ana te aaka a te Atua e Haroko raua ko Apiatara ki Hiruharama, a, noho ana ratou i reira.
- 30
- Na, piki ana a Rawiri i te pikitanga i Oriwa; me te tangi, me te piki, hipoki rawa ano hoki tona mātenga; kahore hoki ona hu i a ia e haere ana: na, nga tangata katoa i a ia, hipoki rawa te mātenga o tenei, o tenei; heoi piki ana ratou, me te tangi ano i a ratou e piki ana.
- 31
- Na, ka korero mai tetahi ki a Rawiri, ka mea, Kei roto a Ahitopere i nga kai whakatupu i te he, kei a Apoharama. Na, ka mea a Rawiri, Tena ra, e Ihowa whakakuaretia nga whakaaro a Ahitopere.
- 32
- A, te ekenga o Rawiri ki te tihi, ki te wahi e koropiko atu ai ia ki te Atua, na, ko Huhai Araki ka whakatau ki a ia, he mea haehae tona kakahu, me te oneone ano hoki i runga i tona mātenga.
- 33
- Na, ka mea a Rawiri ki a ia, Ki te haere tahi tatou, hei whakaware kau koe ki a au:
- 34
- Engari ki te hoki koe ki te pa, a ka mea ki a Apoharama, Hei pononga ahau mau, e te kingi; he pononga ahau na tou pāpā, no mua iho nei, na, aianei hei pononga ahau mau: penei mau e whakataka te whakaaro a Ahitopere.
- 35
- Ehara ianei a Haroko raua ko Apiatara nga tohunga i te hoa mou ki reira? na, nga mea katoa e rongo ai koe ki te whare o te kingi, mau e whakaatu ki a Haroko raua ko Apiatara ki nga tohunga.
- 36
- Kei reira na ano hoki kei a raua a raua tama tokorua, a Ahimaata ta Haroko, a Honatana ta Apiatara; me unga e koutou kia kawea mai e raua ki a au nga mea katoa e rongo ai koutou.
- 37
- Na, haere ana a Huhai te hoa o Rawiri ki te pa, a ka tae mai ano a Apoharama ki Hiruharama.
Address: 
Phone: 
Email: