- 1
- Na, muri iho ka ui a Rawiri ki a Ihowa, ka mea, Me haere ranei ahau ki runga ki tetahi o nga pa o Hura? A ka mea mai a Ihowa ki a ia, Haere ki runga. Ano ra ko Rawiri, Me haere ahau ki hea? A ka mea mai ia, Ki Heperona.
- 2
- Na, haere ana a Rawiri ki reira, ratou tahi ano ko ana wahine tokorua, ko Ahinoama o Ietereere, raua ko Apikaira ko te wahine a Napara Karameri.
- 3
- A, i kawea ano e Rawiri ona hoa ki runga, ratou ko te whare ano o tenei, o tenei; a noho ana ratou ki nga pa o Heperona.
- 4
- Katahi ka haere mai nga tangata o Hura, a whakawahia ana a Rawiri e ratou ki reira hei kingi mo te whare o Hura. A ka korerotia mai ki a Rawiri te korero mo nga tangata o Iapehe-kireara na ratou i tanu a Haora.
- 5
- Na, ka ungā atu e Rawiri etahi tangata ki nga tangata o Iapehe-kireara hei mea ki a ratou, Kia manaakitia koutou e Ihowa mo tenei aroha i whakaputaina e koutou ki to koutou ariki ki a Haora, mo ta koutou tanumanga i a ia.
- 6
- Na, kia whakaputaina mai e Ihowa he aroha, he pono, ki a koutou; ka utua ano hoki koutou e ahau mo tenei mahi pai, mo koutou i mea i tenei mea.
- 7
- Na, kia kaha o koutou ringa aianei, kia maia hoki; kua mate hoki to koutou ariki a Haora, kua oti ano hoki ahau te whakawahi e te whare o Hura hei kingi mo ratou.
- 8
- Na, ka mau a Apanere tama a Nere te rangatira o te ope a Haora ki a Ihi-pohete tama a Haora, a kawea ana e ia ki tawahi ki Mahanaimi.
- 9
- A, meinga ana e ia hei kingi mo Kireara, mo nga Ahuri, mo Ietereere, mo Eperaima, mo Peniamine, mo Iharaira katoa.
- 10
- E wha tekau nga tau o Ihi-pohete tama a Haora, i a ia ka meinga hei kingi mo Iharaira, a e rua nga tau i kingi ai: ko te whare ia o Hura i whai i a Rawiri.
- 11
- Na, te maha o nga ra i noho ai a Rawiri ki Heperona hei kingi mo te whare o Hura, e whitu nga tau e ono nga marama.
- 12
- Katahi ka haere atu a Apanere tama a Nere ratou ko nga tangata a Ihi-pohete tama a Haora i Mahanaimi ki Kipeono.
- 13
- Na, ka puta mai ano a Ioapa tama a Teruia, ratou ko nga tangata a Rawiri, a ka tutataki ngatahi ratou ki te poka wai i Kipeono: na, noho ana enei i tenei taha o te poka, me era hoki i tera taha o te poka.
- 14
- Na, ko te meatanga mai a Apanere ki a Ioapa, Tena, kia whakatika nga tamariki ki te takaro ki to taua aroaro. Ano ra atu ko Ioapa, Me whakatika.
- 15
- Katahi ka whakatika, ka haere mai etahi o nga Peniamini kotahi tekau ma rua te tokomaha, no roto i o Ihi-pohete tama a Haora; kotahi tekau ma rua ano hoki nga tangata a Rawiri.
- 16
- Na, hopukia ana e ratou te mātenga o tāna tangata, o tāna tangata, werohia ana a ratou hoari ki te kaokao o tāna tangata, o tāna tangata; na hinga ngatahi ana ratou: koia i karangatia ai te ingoa o taua wahi, ko Herekataha-turimi; koia tera i Kipeono.
- 17
- Na, nui whakaharahara te whawhai i taua ra, a patua iho a Apanere ratou ko nga tangata o Iharaira e nga tangata a Rawiri.
- 18
- A, tokotoru nga tama a Teruia i reira, Ko Ioapa, ko Apihai, ko Atahere, a, he wae māmā a Atahere, koia ano kei tetahi aneterope o te koraha.
- 19
- Na, ka whai a Atahere i a Apanere; kihai hoki i peka atu, kihai i haere atu ki matau, ki maui, i a ia e whai ana i a Apanere.
- 20
- Na, ka tahuri mai a Apanere, a ka mea, Ko Atahere ianei koe? A ka mea atu ia, Tenei au.
- 21
- Na, ko te meatanga a Apanere ki a ia, Peka atu ki tou matau ranei, ki tou maui, hopu ai i tetahi o nga tamariki māu, ka tango ai i ona hei taonga parakete māu. Heoi kihai a Atahere i pai ki te peka ke atu i te whai i a ia.
- 22
- Na, ka mea mai ano hoki a Apanere ki a Atahere, Peka atu i te whai i a au: Kia patua koe e ahau ki te whenua hei aha? me pehea hoki e ara ake ai toku mata ki tou tuakana ki Ioapa?
- 23
- A, tē pai ia ki te peka atu: na, werohia iho ia e Apanere ki te take o te tao ki te rara tuarima, a puta tonu mai te tao ki tenei taha ona; na, hinga ia i reira, a, mate ake i taua wahi ano: a, tu katoa te hunga i haere mai ki te wahi i hinga ai a Atahere, i mate ai.
- 24
- Na, ka whai a Ioapa raua ko Apihai i a Apanere: a i rere te ra i to raua taenga ki Puke Amaha, ki tera i te ritenga atu o Kia i te huarahi ki te koraha i Kipeono.
- 25
- Na, ka huihui atu nga tamariki a Peniamine ki a Apanere, a kotahi tonu to ratou ngohi, a, tu ana ratou i runga i te pukepuke kotahi.
- 26
- Na, ko te karangatanga mai a Apanere ki a Ioapa, te meatanga mai, Me kai tonu koia te hoari? Kahore ano koe kia mohio he ketekete te tukunga iho? a, ahea ra koe mea ai ki te iwi ra kia hoki atu i te whai i o ratou teina?
- 27
- Katahi a Ioapa ka mea atu, E ora ana te Atua, me i kahore koe te ki mai na, ina ko a te ata ano te iwi hoki ai i te whai i tona teina, i tona teina.
- 28
- Na, whakatangihia ana te tētere e Ioapa, a tu katoa ana te iwi, kihai ano hoki i mea ki te whai ano i a Iharaira, mutu ake ano hoki ta ratou whawhai.
- 29
- Na, haere ana a Apanere ratou ko ana tangata i te mānia, a pau katoa taua po, a, whiti ana i Horano, haere ana a puta tonu i Pitirono, tae tonu atu ki Mahanaimi.
- 30
- Na, hoki ana a Ioapa i te whai i a Apanere: a ka huihuia e te iwi katoa, na, kotahi tekau ma iwa o nga tangata a Rawiri i kore, me Atahere ano hoki.
- 31
- A, e toru rau e ono tekau nga tangata o Peniamine, ara, o nga tangata a Apanere, i patua e nga tangata a Rawiri, mate rawa.
- 32
- Na, ka mau ratou ki a Atahere, a tanumia iho ki te tanumanga o tona pāpā ki Pete-rehema. Na, haere ana a Ioapa ratou ko ana tangata, a, pau katoa taua po, a, mārama rawa ake, i Heperona ratou.
Address: 
Phone: 
Email: