- 1
- Na Paora, na te Apotoro a Ihu Karaiti, ko ta te Atua hoki i pai ai, he mea e rite ana ki te oranga i whakaaria mai i roto i a Karaiti Ihu,
- 2
- Ki a Timoti, ki taku tamaiti aroha: kia tau atu te aroha noa, te mahi tohu, te rangimarie, he mea na te Atua Matua, na Karaiti Ihu hoki na to tatou Ariki.
- 3
- Whakawhetai tonu ahau ki te Atua, e mahi atu nei ahau ki a ia, he mea no oku tupuna iho, he mea hoki i runga i te hinengaro ma, no te mea kahore e mutu taku maharatanga ki a koe i aku inoinga i te po i te ao;
- 4
- Nui atu toku hiahia kia kite i a koe, i ahau e mahara ana ki ou roimata, kia kī ai ahau i te hari;
- 5
- I te mea ka hoki ake nei taku mahara ki te whakapono tinihanga kore i roto i a koe, ki tera hoki i noho i mua i tou tupuna wahine i a Roihi, i tou whaea hoki i a Uniki, a e u ana tenei toku whakaaro kei roto na ano i a koe.
- 6
- Koia ahau ka whakamahara nei i a koe, kia whakaungia te ahi, ara ta te Atua mea i hoatu na, tera i roto i a koe, he mea na te whakapanga atu o oku ringaringa.
- 7
- Ehara hoki i te wairua o te wehi ta te Atua i homai ai ki a tatou; engari to te kaha, to te aroha, to te ngakau mahara.
- 8
- Na, kei whakama koe ki te whakaaturanga i to tatou Ariki, ki a au ranei ki tona herehere: engari uru atu koe ki nga mate o te rongo pai, kia rite ki ta te Atua whakakahanga;
- 9
- Nāna nei tatou i whakaora, nāna hoki tatou i karanga, tapu tonu te karangatanga, kihai i rite ki a tatou mahi, engari ki tana ake tikanga i whakatakoto ai i mua, te aroha noa hoki i homai nei ki a tatou i roto i a Karaiti Ihu, i mua atu o te timatanga o te ao;
- 10
- A kua whakakitea mai nei inaianei i te putanga nui mai o to tatou Kai whakaora o Ihu Karaiti, i whakakahore nei i te mate, a whakakitea mai ana e ia te ora me te matenga-kore, he mea na te rongo pai:
- 11
- A meinga iho ahau hei kai kauwhau mo tenei, hei apotoro hei kai whakaako i nga tauiwi.
- 12
- Ko te mea hoki tenei i pangia ai ahau e enei mate: he ahakoa ra kahore ahau e whakama: e mātau ana hoki ahau ki taku i whakapono ai, a e u ana toku whakaaro e taea ano e ia te tiaki taku i tuku atu ai ki a ia, taea noatia taua ra.
- 13
- Kia mau ki te tauira mo nga kupu tika i rongo ra koe ki a au, puritia i runga i te whakapono, i te aroha, i tera i roto i a Karaiti Ihu.
- 14
- Te mea pai i tukua ki a koe, me tiaki e koe, ara, e te Wairua Tapu e noho ana i roto i a tatou.
- 15
- E mātau ana koe ki tenei, kua tahuri ke i a au te hunga katoa i Ahia; no ratou a Paikeru raua ko Heremokeni.
- 16
- Kia tohungia e te Ariki nga tāngata o te whare o Onehipora; he maha hoki oku oranga ngakau i a ia, kihai hoki ia i whakama ki toku mekameka.
- 17
- I a ia ano hoki i Roma, i rapua marietia ahau, a kitea noatia iho.
- 18
- Ma te Ariki e tuku ki a ia kia kite i te mahi tohu a te Ariki i taua ra: na, ana mahinga mea maku i Epeha, erangi koe e mohio ana.
Address: 
Phone: 
Email: