- 1
- Heoi, e aku teina, inoi mo matou, ara, mo te kupu a te Ariki kia rere kia whai kororia, kia pena ano me tena i a koutou:
- 2
- Kia whakaorangia hoki matou i nga tāngata poauau i nga tāngata kino: kahore hoki he whakapono i te katoa.
- 3
- Otiia e pono ano te Ariki, a māna koutou e whakau, e tiaki kei riro i te kino.
- 4
- Na, e u ana to matou whakaaro i roto i te Ariki ki a koutou, kei te mahi koutou, a ka mahia ano e koutou nga mea e whakaakona atu nei e matou ki a koutou.
- 5
- Ma te Ariki ano e whakatika o koutou ngakau ki te aroha o te Atua, ki te tatari marie atu ano hoki ki a te Karaiti.
- 6
- Na, ko ta matou ako atu tenei ki a koutou, e aku teina, i runga i te ingoa o to tatou Ariki o Ihu Karaiti, mawehe atu i nga teina katoa e hē ana te whakahaere, a kahore e rite ki ā matou whakarerenga iho i riro i a ratou.
- 7
- E mātau ana hoki koutou ki te peheatanga e tika ai to koutou whakarite ki a matou: kihai hoki i hē ta matou whakahaere i roto i a koutou;
- 8
- Kihai ano hoki matou i kai noa i ta tetahi taro; engari i mahi matou i uaua rawa, mauiui rawa i te po i te ao, kei taimaha ki tetahi o koutou:
- 9
- Ehara ra i te mea kahore he mana i a matou; engari kia waiho ai matou hei tauira ma koutou, kia rite ai ta koutou ki ta matou.
- 10
- I a matou hoki e noho ana i a koutou, i akona tenei e matou ki a koutou, ki te kore tetahi e pai ki te mahi, kei kai ia.
- 11
- Ka rongo hoki matou tera etahi e hē ana te whakahaere i roto i a koutou, kahore e mahi, heoi e pokanoa ana ki ta tera.
- 12
- Na, ko ta matou ako ko ta matou whakahau tenei ki aua tangata pera, me whakaaro ki to tatou Ariki ki a Ihu Karaiti, me mahi marie ratou, ka kai i a ratou taro ake.
- 13
- Ko koutou ia, e aku teina, kei ngakau kore ki te mahi pai.
- 14
- Na, ki te kore tetahi e ngohengohe ki ta matou kupu i tenei pukapuka, whaitohungia iho taua tangata, a kei huihui ki a ia, kia whakama ai ia.
- 15
- Otiia kaua e mea he hoa riri ia, engari whakatupatoria, ano he teina.
- 16
- Na, ma te Ariki pu o te rangimarie e hoatu te rangimarie ki a koutou, i nga wa katoa i nga mea katoa. Kia noho te Ariki ki a koutou katoa.
- 17
- Te ohatanga nei a Paora, na toku ringaringa ake, ko te tohu ia i nga pukapuka katoa; he penei taku tuhituhi.
- 18
- Kia tau te aroha noa o to tatou Ariki o Ihu Karaiti ki a koutou katoa. Amine.
Address: 
Phone: 
Email: