- 1
- Katahi ka mea a Horomona, I mea a Ihowa, ka noho ia ki te pouri nui.
- 2
- Kua oti nei i a au te hanga he whare hei nohoanga mou, he kāinga pumau mou mo ake tonu atu.
- 3
- Na, ka tahuri mai te aroaro o te kingi, a, manaakitia ana e ia te huihui katoa o Iharaira, me te tu ano tera te huihui katoa o Iharaira.
- 4
- I mea ia, Kia whakapaingia a Ihowa te Atua o Iharaira, na tona mangai nei te kupu ki toku pāpā, ki a Rawiri, a, kua rite nei i tona ringa; i mea hoki ia,
- 5
- Kihai i whiriwhiria e ahau he pa i roto i nga iwi katoa o Iharaira e hangā ai he whare hei waihotanga iho mo toku ingoa, no te ra iho ano o taku whakaputanga mai i toku iwi i te whenua o Ihipa; kihai ano i whiriwhiria e ahau tetahi tangata hei rangatira mo toku iwi mo Iharaira:
- 6
- Heoi kua whiriwhiria nei e ahau a Hiruharama hei waihotanga iho mo toku ingoa; kua whiriwhiria ano e ahau a Rawiri hei rangatira mo toku iwi, mo Iharaira.
- 7
- Na, i whai ngakau ano toku pāpā a Rawiri ki te hanga whare mo te ingoa o Ihowa, o te Atua o Iharaira.
- 8
- Na, ko te meatanga mai a Ihowa ki a Rawiri ki toku pāpā, Taua whakaaro a tou ngakau kia hangā he whare mo toku ingoa, pai tonu tau, ara, te whakaaro a tou ngakau.
- 9
- Otiia e kore taua whare e hangā e koe: engari to tama e puta mai i tou hope, mana e hanga te whare mo toku ingoa.
- 10
- Na, kua mana nei i a Ihowa tana kupu i korero ai ia; a, kua ara tenei ahau i muri i a Rawiri, i toku pāpā, a, noho ana i runga i te torona o Iharaira, pera ana me ta Ihowa i korero ai, a, hangā ana e ahau he whare mo te ingoa o Ihowa, o te Atua o Iharaira.
- 11
- A, whakatakotoria ana e ahau ki reira te aaka i te kawenata a Ihowa, i whakaritea e ia ki nga tamariki a Iharaira.
- 12
- Na, ka tu ia ki mua i te aata a Ihowa, i te aroaro o te huihui katoa o Iharaira, a, wherahia atu ana ona ringa.
- 13
- I hangā hoki e Horomona he turanga parahi, e rima nga whatianga te roa, a, e rima nga whatianga te whanui, e toru nga whatianga te tiketike, a, whakaturia ana ki waenganui o te marae. Tu ana ia ki runga ki taua mea, na, kua tuturu ona turi i te aroaro o te whakaminenga katoa o Iharaira, wherahia atu ana ona ringa whaka-te-rangi.
- 14
- Na, ko tana meatanga ake, E Ihowa, e te Atua o Iharaira, kahore he Atua hei rite mou i te rangi, i te whenua; e pupuri nei i te kawenata me te aroha ki o pononga, ina whakapaua o ratou ngakau ki te haere i tou aroaro.
- 15
- Mau tonu hoki i a koe nga mea i korerotia e koe ki to pononga ki toku pāpā ki a Rawiri; i korerotia nei e tou mangai ki a ia, a, kua rite nei i tou ringa; koia ano tenei inaianei.
- 16
- Na, kia mau, e Ihowa, e te Atua o Iharaira, aianei tau i korero ai ki to pononga ki toku pāpā, ki a Rawiri, i a koe i ki ra, E kore e whakakorea he tangata māu i toku aroaro hei noho ki runga ki te torona o Iharaira; ki te mahara raia o tamariki ki to ratou ara, ki te haere ratou i runga i taku ture, ki te pera ano me koe na i haere i toku aroaro.
- 17
- Na, kia mana aianei, e Ihowa, e te Atua o Iharaira, au kupu i korero ai koe ki to pononga, ki a Rawiri.
- 18
- Otiia he pono ranei, tera ranei te Atua e noho ki nga tangata ki runga ki te whenua? nana, kahore e nui hei nohoanga mou te rangi me te rangi o nga rangi; a, he aha ra tenei whare kua oti nei i a au te hanga?
- 19
- He aha koa ra, kia anga mai koe ki te inoi a to pononga, ki tana karanga, e Ihowa, e toku Atua, whakarongo ki te karanga, ki te inoi e inoi atu nei to pononga ki tou aroaro.
- 20
- Kia titiro mai ou kanohi ki tenei whare i te po, i te ao, ki te wahi i ki ai koe, Ko reira hei waihotanga iho mo tou ingoa; whakarongo hoki ki te inoi e inoi ai to pononga ki te ritenga mai o tenei wahi.
- 21
- Kia rongo hoki koe ki nga karanga a to pononga, a tou iwi hoki a Iharaira, ina inoi ki te ritenga mai o tenei wahi; na, kia rongo koe i te wahi e noho na koe, i te rangi, a ka rongo, murua ta ratou kino.
- 22
- Ki te hara tetahi tangata ki tona hoa, a ka meinga he oati hei oati māna, a ka tae mai te oati ki mua i tou aata i tenei whare,
- 23
- Na, mau e whakarongo mai i te rangi, e mahi, e whakarite te whakawa a o pononga, mau e utu te tangata he, e mea iho tona ara ki runga ki tona mahunga, mau ano e whakatika ta te tika, e hoatu ki a ia nga mea e rite ana ki tona tika.
- 24
- Ki te patua ano hoki tou iwi a Iharaira e te hoa riri, mo ratou i hara ki a koe, a ka hoki mai ki a koe, ka whakaae ki tou ingoa, ka inoi, ka karanga ki tou aroaro i roto i tenei whare:
- 25
- Na, mau e whakarongo mai i nga rangi, e muru te hara o tou iwi o Iharaira, e whakahoki mai ano ratou ki te whenua i hoatu e koe ki a ratou ko o ratou mātua.
- 26
- Ki te tutakina te rangi, a kahore he ua; mo ratou i hara ki a koe, a ka inoi ratou ki te ritenga mai o tenei wahi, ka whakaae ki tou ingoa, ka tahuri mai i to ratou hara, no ratou ka whakawhiua e koe:
- 27
- Na, mau e whakarongo mai i te rangi, e muru te hara o o pononga, o tou iwi hoki o Iharaira, mau hoki ratou e whakaako ki te ara pai e haere ai ratou, e homai ano hoki he ua ki tou whenua i homai nei e koe hei kāinga pumau mo tou iwi.
- 28
- Ki te mea he mate-kai to te whenua, he mate uruta, ki te mea he ngingiotanga, he kokatanga no te kai, he mawhitiwhiti ranei, he whe ranei; ki te whakapaea ranei ratou e o ratou hoa riri ki te whenua i o ratou kuwaha; ki te pa mai tetahi whiu, tetahi mate turoro ranei:
- 29
- Ki te mea he inoi, he karanga ranei na tetahi tangata, na tou iwi katoa ranei, na Iharaira, ina mohio tenei tangata, tenei tangata, ki tona pouri, ki tona whiu, a ka wherahia mai ona ringa ki te ritenga mai o tenei whare:
- 30
- Na, mau e whakarongo mai i te rangi i tou nohoanga, e muru te he, e hoatu ki nga tangata nga mea e rite ana ki nga huarahi katoa o tenei, o tenei; e mohio ana hoki koe ki tona ngakau; (ko koe anake nei hoki te mohio ana ki nga ngakau o nga tamariki a te tangata:)
- 31
- Kia wehi ai ratou i a koe, kia haere ai i ou huarahi i nga ra katoa e ora ai ratou i runga i te mata o te whenua i homai nei e koe ki o matou mātua.
- 32
- Na, te tangata iwi ke, ehara nei i tou iwi i a Iharaira, a ka tae mai i te whenua mamao, he whakaaro ki tou ingoa nui, ki tou ringa kaha, ki tou tākakau kua oti te whakamaro, a ka haere mai, ka inoi ki te ritenga mai o tenei whare;
- 33
- Mau e whakarongo mai i nga rangi i tou wahi e noho na koe, e mea nga mea katoa i karanga ai te tangata iwi ke ki a koe: kia mohio ai nga iwi katoa o te whenua ki tou ingoa, kia wehi ai i a koe, kia pera ai me tou iwi me Iharaira; kia mohio ai hoki kua oti tou ingoa te karanga ki runga ki tenei whare kua oti nei i a au te hanga.
- 34
- Ki te haere atu tou iwi ki te whawhai ki ona hoa riri i te ara e tonoa ai ratou e koe, a ka inoi mai ki a koe ki te ritenga mai o tenei pa kua whiriwhiria nei e koe, o te whare ano hoki kua hangā nei e ahau mo tou ingoa:
- 35
- Na, mau e whakarongo mai i nga rangi ki ta ratou inoi, ki ta ratou karanga, e whakatika hoki ta ratou.
- 36
- Ki te hara ratou ki a koe, (kahore hoki he tangata i hapa i te hara,) a ka riri koe ki a ratou, ka tuku i a ratou ki te hoa whawhai, a ka whakarautia atu ratou hei whakarau ki tetahi whenua e mamao atu ana, e tata ana ranei;
- 37
- Na, ki te hoki ake to ratou mahara i te whenua i whakarautia atu ai ratou, a ka ripeneta ratou, ka inoi ki a koe i te whenua i whakarautia atu ai, ka mea, Kua hara matou, kua parori ke ta matou mahi, kua kino matou;
- 38
- A ka tahuri mai o ratou ngakau katoa, o ratou wairua katoa, ki a koe i te whenua o to ratou whakaraunga i whakarautia atu ai ratou, a ka inoi mai ratou ki te ritenga mai o to ratou nei whenua i homai e koe ki o ratou mātua, o te pa ano hoki i whiriwhiria nei e koe, o tenei whare ano i hangā nei e ahau mo tou ingoa:
- 39
- Na, mau e whakarongo mai i nga rangi, i tou wahi e noho na koe, ki ta ratou inoi, ki a ratou karanga, mau hoki e whakatika ta ratou, me muru hoki e koe te he o tou iwi i hara nei ki a koe.
- 40
- Na, e taku Atua, kia titiro mai ra ou kanohi, kia whakarongo mai ou taringa ki te inoi e inoia ana i tenei wahi.
- 41
- Na, e ara, e Ihowa, e te Atua, ki roto ki tou okiokinga, a koe ano, me te aaka o tou kaha: kia whakakakahuria o tohunga, e Ihowa, e te Atua, ki te whakaoranga; kia koa ano hoki to hunga tapu ki te pai.
- 42
- E Ihowa, e te Atua, kaua e whakahokia te kanohi o tau i whakawahi ai; maharatia nga mahi atawhai i to pononga i a Rawiri.
Address: 
Phone: 
Email: