- 1
- A, te kitenga o Ioapa tama a Teruia e anga ana te ngakau o te kingi ki a Apoharama.
- 2
- Na, ka tono tangata atu a Ioapa ki Tekoa ki te tiki i tetahi wahine mohio i reira, a ka mea ki a ia, Kia rite koe ki te wahine e tangi tupapaku ana, me kakahu nga kakahu taua, kaua ano hoki e whakawahia ki te hinu; engari kia rite ki te wahine kua tangi noa ake ki te tupapaku.
- 3
- Katahi koe ka haere atu ki te kingi, ka korero atu i enei kupu ki a ia. Na, hoatu ana e Ioapa nga kupu ki tona mangai.
- 4
- Na, korerotia atu ana e te wahine o Tekoa ki te kingi, me te takoto tapapa iho ano ki te whenua, me te piko iho ano. I mea hoki, Whakaorangia, e te kingi.
- 5
- Na, ko te meatanga mai a te kingi ki a ia, He aha tau? a ka ki atu tera, He wahine pouaru nei ahau, kua mate hoki toku tahu.
- 6
- Na, tokorua nga tama a to pononga, heoi whawhai ana raua ki a raua i te parae, kahore ano hoki he kai wawao mo raua. Na, patua iho tetahi e tetahi, whakamatea iho.
- 7
- Na, ko te whakatikanga mai o nga whanaunga katoa ki to pononga, e mea mai ana, Homai te kai patu i tona teina kia whakamatea e matou hei utu mo te matenga o tona teina, i kohurutia nei e ia; ka hunā ano hoki e matou te tangata mona te kāinga. Na, ka keto i a ratou taku ngarahu i toe, a kahore noa iho e mahue he ingoa mo toku tahu, he toenga ranei i te mata o te oneone.
- 8
- Na, ko te meatanga mai a te kingi ki te wahine, Haere ki tou whare, a, maku nga tikanga mo to mea ra.
- 9
- Na, ka mea atu taua wahine o Tekoa ki te kingi, Hei runga i a au te kino, e toku ariki, e te kingi, hei runga ano hoki i te whare o toku pāpā: kia hara-kore ia te kingi me tona torona.
- 10
- Na, ka mea te kingi, Ki te korero tetahi ki a koe, kawea mai ki a au, a, e kore ia e pa ki a koe i muri iho.
- 11
- Katahi tera ka mea atu, Kia mahara ra te kingi ki a Ihowa ki tou Atua, kei hua te mahi huna a te kai takitaki toto, kei hunā e ratou taku tamaiti. Na, ka ki mai ia, E ora ana a Ihowa e kore tetahi huruhuru o to tamaiti e taka ki te whenua.
- 12
- Na, ko te meatanga atu a taua wahine, Tena kia korerotia atu e to pononga tetahi kupu ki toku ariki, ki te kingi. Ano ra ko ia, Korero.
- 13
- Katahi ka mea atu taua wahine, He aha ra koe i he ai ki te iwi o te Atua, i whakaaro ai i tenei mea? i te kingi hoki e korero ana i tenei mea, e rite ana ia ki te tangata kua he, i te kingi e kore nei e whakahoki mai i tana i peia atu ra.
- 14
- Mo te mate nei hoki tatou, a ka rite ki te wai i maringi ki te whenua, kahore nei e kohikohia ake; e kore ano hoki te Atua e whakapai tangata, engari e whakaaro ana ia i nga whakaaro e kore ai e peia rawatia atu i a ia te mea i peia.
- 15
- Na, ahau i haere mai ai ki te korero i tenei mea ki te kingi, ki toku ariki, i wehi ahau i ta te iwi nei; koia to pononga i mea ai, Me korero ano ahau ki te kingi; tera pea te kingi e mea i ta tana pononga e korero ai.
- 16
- Tera hoki te kingi e rongo, e whakaora i tana pononga i roto i te ringa o te tangata e hunā ai maua ko taku tamaiti i runga i to te Atua wahi tupu.
- 17
- Koia to pononga i mea ai, Akuanei he whakamarie te kupu a toku ariki a te kingi; e rite ana hoki toku ariki te kingi ki te anahera a te Atua, hei whakarongo ki te pai, ki te kino; a, hei hoa ano mou a Ihowa te Atua.
- 18
- Na, ka whakahokia mai e te kingi, a ka mea ki te wahine, Na, kaua e hunā ki a au te kupu e uia e ahau ki a koe. Katahi ka mea atu te wahine, Tena, kia korero toku ariki te kingi.
- 19
- Na, ko te meatanga mai a te kingi, Kahore ianei te ringa o Ioapa i a koe i tenei mea katoa? Ano ra ko te wahine, ka mea atu, Kia ora tou wairua, e toku ariki e te kingi, ina, kahore he tahuritanga ki matau, ki maui, i nga kupu katoa i korero ai toku ariki te kingi: na to pononga hoki, na Ioapa, nāna ahau i whakahau, nana hoki i homai enei kupu katoa ki roto ki te mangai o to pononga.
- 20
- He whakaawhio i te tikanga o tenei korero i mea ai to pononga a Ioapa i tenei mea: he mohio ano hoki toku ariki, he pera me te mohiotanga o te anahera a te Atua, he mohio ki nga mea katoa o te whenua.
- 21
- Na, ko te meatanga atu a te kingi ki a Ioapa, Na, kua meatia nei tenei mea e ahau: tikina, whakahokia mai taua tamaiti a Apoharama.
- 22
- Katahi a Ioapa ka takoto tapapa iho ki te whenua, ka piko iho, ka whakapai i te kingi: i mea ano hoki a Ioapa, No tenei ra to pononga i mohio ai, e manakohia ana ahau e koe, e toku ariki, e te kingi, no te kingi hoki ka whakamana i te kupu a tana pononga.
- 23
- Na, whakatika ana a Ioapa, a, haere ana ki Kehuru, a, kawea mai ana e ia a Apoharama ki Hiruharama.
- 24
- Na, ka mea te kingi, Kia tahuri atu ia ki tona whare, kaua hoki ia e titiro mai ki toku kanohi. Na, tahuri ana a Apoharama ki tona whare, kihai hoki i kite i te kanohi o te kingi.
- 25
- Na, kahore he rite mo Apoharama o Iharaira katoa; he ataahua, nui atu te whakamoemiti: kahore ona koha, no te kapu ano o tona waewae, a, tae noa ki tona tumuaki.
- 26
- A ka kutikutia e ia tona mātenga; (i kutikutia hoki e ia i te takanga o te tau: he taimaha hoki nona koia i kutikutia ai:) na ka pauratia e ia nga makawe o tona mātenga, e rua rau nga hekere o to te kingi pauna.
- 27
- A, tokotoru nga tamariki i whanau ma Apoharama, kotahi hoki te kotiro, tona ingoa ko Tamara. He wahine kanohi ataahua ano ia.
- 28
- Na, e rua nga tau i noho ai a Apoharama ki Hiruharama, a, kihai i kitea e ia te kanohi o te kingi.
- 29
- Katahi ka tono tangata atu a Apoharama ki a Ioapa; i mea hoki kia tonoa ia ki te kingi; heoi kihai tera i pai ki te haere mai ki a ia. Na, ka tono ano hoki ia, otiia kihai tera i pai ki te haere mai.
- 30
- Na, ko tana meatanga ki ana pononga, Nana, tata tonu ki toku to Ioapa wahi whenua he parei ano hoki tana kei reira; tikina tahuna atu ki te ahi. Na, kua tahuna e nga tangata a Apoharama ki te ahi.
- 31
- Na, ka whakatika a Ioapa, a, haere mai ana ki a Apoharama ki te whare, a ka mea ki a ia, He aha i tahuna ai toku wahi e o tangata ki te ahi?
- 32
- Na, ko te meatanga atu a Apoharama ki a Ioapa, Nana, i tono tangata ahau ki a koe, i mea, Haere mai ki konei kia tonoa ai koe e ahau ki te kingi hei mea, He aha ahau i haere mai ai i Kehuru? E pai ahau me i noho tonu ahau ki reira: ko tenei kia kite ahau i te kanohi o te kingi; a, ki te mea he kino toku, mana ahau e whakamate.
- 33
- Na, haere ana a Ioapa ki te kingi, a, korerotia ana e ia ki a ia. Katahi ka karangatia a Apoharama e ia, a, haere mai ana ia ki te kingi. Na, piko iho ana ia ki a ia, ahu ana tona mata ki te whenua i te aroaro o te kingi: a, kihitia ana a Apoharama e te kingi.
Address: 
Phone: 
Email: