- 1
- To mua korero he mea tuhituhi naku, e Tiopira, mo nga mea katoa i timata ai a Ihu te mahi, te ako,
- 2
- Taea noatia te ra i ako iho ai ia, he mea na te Wairua Tapu, ki nga apotoro i whiriwhiria e ia, a tangohia atu ana ki runga:
- 3
- He maha hoki nga tohu i whakakite ora ai ia i a ia ki a ratou, i muri iho i tona matenga; e wha tekau ano nga ra i kitea ai e ratou, i korerotia ai e ia nga mea o te rangatiratanga o te Atua:
- 4
- A ka huihui tahi ia me ratou, ka mea atu ia kia kaua ratou e haere atu i Hiruharama, otiia kia taria te mea i korerotia i mua e te Matua, i rongo ra koutou ki a au:
- 5
- I iriiri hoki a Hoani ki te wai; ko koutou ia e kore e maha ake nga ra ka iriiria ki te Wairua Tapu.
- 6
- A ka tamene mai ratou, ka ui ki a ia, ka mea, E te Ariki, ko te wa ianei tenei e whakahoki ai koe i te rangatiratanga ki a Iharaira?
- 7
- Na, ko tana meatanga ki a ratou, E kore e riro i a koutou te mohiotanga ki nga wa ki nga taima, kua waiho e te Matua māna ake te tikanga.
- 8
- Engari ka riro mai he kaha i a koutou, i te haerenga mai o te Wairua Tapu ki runga ki a koutou: a hei kai whakaatu koutou moku ki Hiruharama, ki Huria katoa, ki Hamaria hoki, a tae noa ki te pito whakamutunga o te ao.
- 9
- Ano ka mutu tana korero i enei mea, i a ratou ano e titiro ana, ka tangohia atu ia; a toremi atu i to ratou tirohanga ki roto ki te kapua.
- 10
- A i a ratou e titiro matatau atu ana ki te rangi, i a ia e haere ana, na, tokorua nga tāngata e tu ana i to ratou taha, he ma hoki nga kakahu;
- 11
- E mea mai ana, E nga tāngata o Kariri, he aha ta koutou e tu e matakitaki atu na ki te rangi? ko tena Ihu kua tangohia atu na i a koutou ki te rangi, ka pera ano tona haerenga mai me ia i tirohia atu na e koutou e haere atu ana ki te rangi.
- 12
- Na, hoki ana ratou ki Hiruharama i te maunga e karangatia nei ko Oriwa, he wahi tata ki Hiruharama, he haerenga hapati.
- 13
- A ka tomo atu ratou, ka kake atu ki tetahi ruma i runga, ki te wahi i noho ai a Pita, a Hemi, a Hoani, a Anaru, a Piripi, a Tamati, a Patoromu, a Matiu, a Hemi tama a Arapiu, a Haimona Heroti, a Hura teina o Hemi.
- 14
- Anei katoa kotahi tonu te whakaaro i u ai ki te inoi ki te karakia, me nga wāhine, me to Ihu whaea me Meri, me ona teina.
- 15
- I aua ra ka whakatika a Pita i waenganui o nga akonga, ka mea, (na, te maha o nga ingoa ki te huihuia, kotahi rau e rua tekau,)
- 16
- E hoa ma, e aku teina, i tika ano kia whakaritea tenei Karaipiture, ta te Wairua Tapu i korerotia i mua e te mangai o Rawiri mo Hura, mo te kai arahi o nga kai hopu i a Ihu.
- 17
- I huihuia tahitia hoki ia ki a tatou, i a ia ano hoki tetahi wahi o tenei mahi.
- 18
- Na, hokoa ana e taua tangata tetahi wahi ki te utu o te kino; a taka tupou iho, koara pu i waenganui, pakaru katoa ki waho ona whekau.
- 19
- I rangona ano hoki e te hunga katoa e noho ana i Hiruharama; na reira taua wahi i huaina ai, ko Akerama, he kupu no to ratou reo mo tenei, Ko te kāinga o te toto.
- 20
- Kua oti hoki te tuhituhi ki te pukapuka o nga waiata, Tukua kia ururuatia tona nohoanga, kaua hoki tetahi e noho ki reira; a, Kia riro tana mahi tirotiro i tetahi atu.
- 21
- Na, ko te tikanga tenei, ko nga tāngata i haere tahi nei tatou, i nga wa katoa i haereere mai ai i haereere atu ai a Ihu te Ariki i roto i a tatou,
- 22
- Hei te iriiringa a Hoani timata ai, a tae noa ki te ra i tangohia ake ai ia i a tatou, me waiho tetahi o era hei hoa mo tatou ki te whakaatu i tona aranga mai.
- 23
- A tokorua a ratou i whakarite ai, ko Hohepa i karangatia nei ko Pahapa, tetahi atu o ona ingoa ko Hutuha, raua ko Matiaha.
- 24
- Na, ka inoi ratou, ka mea, Ko koe, e te Ariki, te mohio ana ki nga ngakau o te katoa, mau e whakakite ko wai o tenei tokorua tau i whiriwhiri ai,
- 25
- Kia riro i a ia tetahi wahi o tenei mahi minita, o te apotorotanga, i taka nei a Hura, he mea kia haere ai ia ki tona wahi.
- 26
- Na, ka hoatu e ratou o raua rota; a ka tau te rota ki a Matiaha; a uru ana ia ki roto ki nga Apotoro tekau ma tahi.
Address: 
Phone: 
Email: