- 1
- Muri iho i enei mea ka haere a Paora i Atene, ka tae ki Koriniti;
- 2
- Na, tona kitenga i tetahi Hurai ko Akuira te ingoa, i whanau ki Ponoto, he mea tae hou mai i Itari, raua ko tana wahine ko Pirihira; (kua ki hoki a Karauria kia haere atu nga Hurai katoa i Roma:) ka haere ia ki a raua.
- 3
- A no te mea kotahi ta ratou mahi, ka noho ia ki a raua, ka mahi: he tui whare hoki ta raua mahi.
- 4
- Na, ka korerorero ia i roto i te whare karakia i nga hapati katoa, e tohe ana ki nga Hurai ratou ko nga Kariki.
- 5
- A, te taenga mai o Hira raua ko Timoti i Makeronia, ka takare te ngakau o Paora, ka whakapuaki ki nga Hurai ko Ihu te Karaiti.
- 6
- Heoi i a ratou ka whakatika mai, ka kohukohu, ka ruia ona kakahu, ka mea atu ki a ratou, Hei runga i o koutou mātenga o koutou toto; ka ma ahau: ko tenei ka haere ahau ki nga tauiwi.
- 7
- Na, tona haerenga i reira, ka tae ki te whare o tetahi tangata, ko Hutuha te ingoa, he tangata karakia ki te Atua, ko tona whare i tata ki te whare karakia.
- 8
- Na, ka whakapono ki te Ariki a Kirihipu, te rangatira o te whare karakia, me tona whare katoa hoki; he tokomaha hoki nga Koriniti, i a ratou ka rongo, i whakapono, i iriiria hoki.
- 9
- A ka korero moemoea te Ariki ki a Paora i te po, Kaua e wehi, engari me korero, kei noho puku:
- 10
- Kei a koe hoki ahau, e kore hoki tetahi tangata e pa atu ki a koe, e hoatu i te kino ki a koe: he nui hoki oku tāngata i tenei pa.
- 11
- Na, kotahi te tau e ono marama i noho ai ia, i whakaakona ai te kupu a te Atua i roto i a ratou.
- 12
- Na, i a Kario e noho ana hei kawana mo Akaia, ka whakatika ngatahi nga Hurai ki a Paora, a kawea ana ia ki te nohoanga whakawa,
- 13
- Ka mea, E kukume ana tenei i nga tāngata ki tetahi karakia ki te Atua, e tika ke ana i ta te ture.
- 14
- A ka whano ka puaki te mangai o Paora, na, ka mea a Kario ki nga Hurai, E nga Hurai, me he mea ko tetahi hanga hē, tetahi mahi kino ranei, e tika kia ata whakarongo ahau ki a koutou:
- 15
- Ko tenei he totohe korero, he mea ki nga ingoa, ki ta koutou ture, kei a koutou te whakaaro; e kore hoki ahau e pai kia waiho ahau hei kai whakariterite mo ena mea.
- 16
- Na, peia atu ana ratou i te nohoanga whakawa.
- 17
- Na, ka mau nga Kariki katoa ki a Hotene, rangatira o te whare karakia, a whiua ana ia i mua o te nohoanga whakawa. Heoi kihai a Kario i whakaaro ki tetahi o enei mea.
- 18
- A ka maha nga ra i noho ai a Paora, ka poroporoaki ia ki nga teina, a rere ana ki Hiria, ratou ko Pirihira ko Akuira; he mea moremore tona upoko i Henekiria: he ki taurangi hoki nāna.
- 19
- Te taenga atu ki Epeha, ka mahue raua ki reira: a ko ia i tomo atu ki roto ki te whare karakia, korerorero ai ki nga Hurai.
- 20
- A ka mea ratou kia roa atu te wa e noho ai ia ki a ratou, kihai ia i whakaae;
- 21
- Heoi poroporoaki ana ia ki a ratou, i mea ia, Kua takoto rawa te tikanga kia whakarite ahau i tenei hākari ka tata nei ki Hiruharama: e hoki mai ano ia ahau ki a koutou, ki te pai te Atua. Na, rere ana ia i Epeha.
- 22
- A ka u ki Hiharia, ka haere atu, ka oha atu ki te hahi, a haere ana ki Anatioka.
- 23
- A roaroa kau iho, ka haere, a haereerea marietia ana e ia te whenua o Karatia, o Pirikia, me te whakau i nga akonga katoa.
- 24
- Heoi i haere mai tetahi Hurai ki Epeha, ko Aporo te ingoa, i whanau ki Arehanaria, he pu korero, he tangata kaha ki nga Karaipiture.
- 25
- I whakaakona tenei tangata ki te ara o te Ariki; he tangata ia e toko tonu ake ana te ngakau, ka korero ia, tika tonu hoki tana whakaako i nga mea a te Ariki; heoi ano tana i mātau ai ko te iriiringa a Hoani.
- 26
- Ka anga ano ia, ka korero nui i roto i te whare karakia: a ka rongo a Akuira raua ko Pirihira ki a ia, ka mau raua ki a ia, a ata whakaaturia atu ana e raua ki a ia te ara o te Atua.
- 27
- Ano ka mea ia kia haere atu ki Akaia, ka tuhituhi atu nga teina ki nga akonga, ka kiia atu ia hei manuwhiri ma ratou: a, tona taenga atu, ka whakakahangia e ia te hunga i meinga nei e te aroha noa kia whakapono:
- 28
- Kaha rawa hoki tana whawhati i ta nga Hurai i roto i te huihui; whakaaturia ana e ia ta nga Karaipiture mo Ihu, ko ia te Karaiti.
Address: 
Phone: 
Email: