- 1
- Na, ka haereere raua i Amapipori, i Aporonia, ka tae ki Teharonika, kei reira te whare karakia o nga Hurai:
- 2
- Ka tomo atu hoki a Paora ki a ratou, ko tona ritenga hoki, a e toru nga hapati i korerorero ai ki a ratou i roto i nga Karaipiture,
- 3
- E whakapuaki ana, e korero ana, kua takoto te tikanga kia mamae a te Karaiti, kia ara mai hoki i te mate; a ko tenei hoki te Karaiti, ko Ihu e kauwhautia nei e ahau ki a koutou.
- 4
- Na, ka whakapono etahi o ratou, ka piri atu hoki ki a Paora raua ko Hira; tokomaha hoki o nga Kariki karakia, kihai hoki i ruarua nga wāhine rangatira.
- 5
- Heoi ka hae nga Hurai whakateka, a ka tango ki a ratou i etahi tāngata kino o te hunga mangere, ka huihuia nga tāngata, ka whakaoho i te pa; na, ko te huakanga ki te whare o Hahona, ka mea kia kawea raua ki te iwi ra.
- 6
- A, tē kitea raua, ka toia a Hahona ratou ko etahi teina ki nga rangatira o te pa, ka karanga, Kua tae mai ki konei nga tāngata i whakatutungia ai te ao;
- 7
- Kua puritia hoki e Hahona: tika ke nga mahi a tenei hunga katoa i nga ture a Hiha, e mea ana, tera atu tetahi kingi, ko Ihu.
- 8
- Na, ka rongo te mano ratou ko nga rangatira o te pa ki enei mea, ka raru.
- 9
- A tangohia ana tetahi mea i a Hahona, i ona hoa hoki, ka tukua ratou.
- 10
- Na, ka tono tonu nga teina i a Paora raua ko Hira i te po ki Peria: to raua taenga atu, ka haere ki te whare karakia o nga Hurai.
- 11
- Engari enei i nui atu te ahua rangatira i to nga tāngata o Teharonika, i hohoro tonu ratou te tango i te kupu, a i tenei ra i tenei ra i rapu i roto i nga Karaipiture i te tikanga o enei mea.
- 12
- Na, tokomaha o ratou i whakapono; kihai hoki i ruarua nga wāhine rangatira o nga Kariki, me nga tāngata hoki.
- 13
- Heoi ka mātau nga Hurai o Teharonika, tera te kupu a te Atua te kauwhautia ana e Paora ki Peria, ka haere hoki ratou ki reira ki te whakaoho i te iwi.
- 14
- Katahi ka tono atu nga teina i a Paora kia haere, me te mea ko te moana: ko Hira ia raua ko Timoti i noho ki reira.
- 15
- Na, ka kawea a Paora e ona kai arahi ki Atene: a ka riro mai he kupu ki a Hira raua ko Timoti kia hohoro te haere ki a ia, ka hoki ratou.
- 16
- Na, i a Paora e tatari ana ki a raua i Atene, ka oho tona wairua i roto i a ia, i tona kitenga i te pa e kī ana i te whakapakoko.
- 17
- Koia ia i totohe ai i roto i te whare karakia ki nga Hurai, ratou ko nga tāngata karakia, i te kāinga hoko hoki ki nga tāngata noho noa iho i nga ra katoa.
- 18
- A ka ngangare ki a ia etahi tohunga o nga Epikureana o nga Toika. Na etahi i mea, He aha ta tenei tangata korerorero e mea nei? i mea etahi, Me te mea he kai whakapuaki i etahi atua tauhou: i kauwhautia hoki e ia ki a ratou a Ihu me te aranga.
- 19
- Na, ka mau ratou ki a ia, ka kawea ki Areopaka, ka mea, Kia mohio matou, he aha ranei tenei akoranga hou e korerotia nei e koe?
- 20
- Ka mauria mai hoki e koe ki o matou taringa nga mea hou: koia matou i mea ai kia mohio, he aha enei mea.
- 21
- (Heoi hoki ta nga tāngata katoa o Atene, ratou ko nga manuhiri e noho ana i reira, e whakapau ai i nga ra, ko te korero ranei ko te whakarongo ranei i tetahi mea hou.)
- 22
- Na, ka tu a Paora i waenganui o Areopaka, ka mea, E nga tāngata o Atene, ko nga mea katoa hei whakaatu ki a au ka nui ke ta koutou wehi ki nga atua maori.
- 23
- I a au hoki e haereere ana, e matakitaki ana i nga mea e karakia nei koutou, ka kitea e ahau he āta i tuhituhia nei a runga, MO TE ATUA NGARO. Heoi ko ta koutou e karakia kuare nei, ko ia taku e whakaatu nei ki a koutou.
- 24
- Te Atua nāna i hanga te ao me nga mea katoa i roto, ko ia nei te Ariki o te rangi o te whenua, e kore ia e noho ki nga whare i hangā nei e te ringaringa;
- 25
- E kore ano hoki e mahia he mea māna e te ringa tangata, me te mea he mate nona ki tetahi aha ranei, ko ia hoki hei homai i te ora, i te manawa, me nga mea katoa, ki nga tāngata katoa;
- 26
- Kotahi ano te toto i hangā e ia nga iwi katoa o nga tāngata, hei noho i te mate katoa o te whenua, nāna hoki i tohutohu nga wa i whakaritea i mua, me nga kaha o to ratou nohoanga;
- 27
- Kia rapu ai ratou ki te Ariki, me kore ratou e whawha, e kite hoki i a ia, ahakoa ra kahore ia i matara atu i a tatou katoa:
- 28
- Nāna hoki tatou i ora ai, i korikori ai, i noho ai; i pera hoki te korero a etahi o o koutou kai tito, Ko tatou hoki tona uri.
- 29
- Na, he uri nei tatou no te Atua, e kore e tika kia mea tatou, kei te rite te atuatanga ki te koura, ki te hiriwa, ki te kohatu, ki te mea i whakairoa e te mohio e te whakaaro o te tangata.
- 30
- Na, kahore i whakaaroa e te Atua nga wa o te kuaretanga; ko tenei ka whakahau nei ia i nga tāngata katoa o nga wahi katoa kia ripeneta:
- 31
- Kua rite hoki i a ia he ra, e whakawa ai ia i te ao i runga o te tikanga, ara ma te tangata kua whakaritea nei e ia; kua tukua nei hoki he tohu ki nga tāngata katoa, i tana whakaarahanga i a ia i te mate.
- 32
- Na, ka rangona e ratou te aranga mai o te hunga mate, ka tawai etahi; ko etahi i mea, Taihoa matou e whakarongo ki tenei mea i a koe.
- 33
- Heoi puta atu ana a Paora i waenganui i a ratou.
- 34
- Ko etahi tāngata ia i piri ki a ia, i whakapono: i roto i a ratou a Rionaihia no Areopaka, ko tetahi wahine ko Ramari te ingoa, ratou ko etahi atu.
Address: 
Phone: 
Email: