- 1
- Na, ka tae atu ia ki Rerepe ki Raihitara: na, tera tetahi akonga ko Timoti te ingoa, he tamaiti na tetahi wahine whakapono, he Hurai, ko tona pāpā he Kariki:
- 2
- I pai te korero mona a nga teina i Raihitara i Ikoniuma.
- 3
- I mea a Paora kia haere ia hei hoa mona; a tangohia ana ia, kotia ana, mo nga Hurai e noho ana i aua wahi: i mātau hoki ratou katoa he Kariki tona pāpā.
- 4
- A, to ratou haereerenga i nga pa, ka tukua ki a ratou nga ture hei tikanga, i whakaritea e nga apotoro e nga kaumatua i Hiruharama.
- 5
- Na, ka whakaukia nga hahi ki te whakapono, ka nui haere hoki i tenei ra i tenei ra.
- 6
- Na, haereere ana ratou i Pirikia, i te whenua hoki o Karatia, ka araia ratou e te Wairua Tapu kei korero i te kupu Ahia;
- 7
- Te taenga atu ki Maihia, ka whakamatauria te haere ki Pitinia: heoi kihai ratou i tukua e te Wairua.
- 8
- Na, kapea ana Maihia, ka haere ki Toroa.
- 9
- A ka kitea e Paora tetahi mea i puta mai i te po; He tangata no Makeronia e tu ana, e tohe ana ki a ia, e mea ana, Whiti mai ki Makeronia, whakaaro mai ki a matou.
- 10
- Ano ka kitea te mea i puta mai, ka mea tonu matou kia haere atu ki Makeronia, ka whakaaro nei hoki matou, na te Ariki matou i karanga ki te kauwhau i te rongo pai ki a ratou.
- 11
- Heoi, te rerenga atu i Toroa, ka tika tonu matou ki Hamotarakia, ao ake te ra ki Neapori;
- 12
- I reira ano ki Piripai, ko te pa nui ia o taua wahi o Makeronia, he koroni: a noho ana matou i taua pa i etahi ra.
- 13
- Na, i te ra hapati ka haere matou ki waho o te pa ki te awa, ki te wahi e huihuia ana ki te inoi; a ka noho matou, ka korero ki nga wāhine e huihui ana.
- 14
- Na, ka whakarongo tetahi wahine ko Riria te ingoa, he kai hoko papura, no te pa o Taiataira, he wahine karakia ki te Atua: kua whakapuaretia tona ngakau e te Ariki, i rongo ai ia ki nga mea i korerotia e Paora.
- 15
- Ano ka oti ia te iriiri, ratou ko nga mea o tona whare, ka tohe ia, ka mea, Ki te mea kua whakaaro koutou e pono au ki te Ariki, tomo mai koutou, e noho ki toku whare. Na, ka tohea matou e ia.
- 16
- Na, i a matou e haere ana ki te inoi, ka tutaki mai ki a matou tetahi kotiro, he wairua Whiro nei tona, ka nui te utu i riro i a ia mo ana rangatira, i a ia e poropiti ana:
- 17
- Ka whai ia i a matou ko Paora, ka karanga, ka mea, He pononga enei tāngata no te Atua i runga rawa, e whakapuakina ana e ratou te ara o te oranga ki a tatou.
- 18
- Na, he maha nga ra i mea ai ia i tenei. Otiia ka hoha a Paora, ka tahuri, ka mea atu ki te wairua, Ko taku kupu tenei ki a koe i runga i te ingoa o Ihu Karaiti, puta mai koe i roto i a ia. A puta mai ana i taua haora ano.
- 19
- Na, te kitenga o ana rangatira, kua kore he mahinga moni ma ratou, ka mau ki a Paora raua ko Hira, ka toia ki te kāinga hoko ki nga rangatira;
- 20
- A ka mauria raua ki nga kai whakarite whakawa, ka mea, Ka raru to tatou pa i enei tāngata, he Hurai hoki;
- 21
- E whakapuakina ana hoki e raua nga ritenga, e kore nei e tika ma tatou ma nga tāngata o Roma e tango e whakarite.
- 22
- Na, ko te whakatikanga mai o te mano ki a raua; ka haea o raua kakahu e nga kai whakarite whakawa, ka mea kia whiua ki te rakau.
- 23
- A he maha o raua whiunga, makā ki te whare herehere, ka korero atu ki te kai tiaki herehere, kia mau tana pupuri i a raua:
- 24
- Te rironga mai i a ia o taua korero, ka makā raua ki te whare herehere i roto rawa, ka whakauria o raua waewae ki te rakau.
- 25
- Na, i inoi a Paora raua ko Hira i waenganui po, i waiata atu ki te Atua; me te whakarongo ano nga herehere ki a raua.
- 26
- Na, ka pa whakarere mai he ru nui, i whakangaruetia ai nga turanga o te whare herehere: a puare tonu nga tatau katoa, whakakorokoroa ana nga herenga o nga tāngata katoa.
- 27
- A ka oho te kai tiaki herehere i te moe, tona kitenga hoki i nga tatau o te whare herehere e puare ana, ka unuhia tona hoari, ka mea kia patu i a ia ano, hua noa kua oma nga herehere.
- 28
- Na, ka nui te reo o Paora ki te karanga, ka mea, Kauaka tetahi mea kino e meatia ki a koe: tenei hoki matou katoa.
- 29
- A karangatia ana he rama, ka rere ki roto, ka haere wiri mai, ka takoto ki te aroaro o Paora raua ko Hira,
- 30
- Ka arahina hoki raua ki waho, ka mea, E hoa ma, me aha ka ora ai ahau?
- 31
- Ka mea raua, Me whakapono ki te Ariki ki a Ihu Karaiti, ka ora ai koe, koutou tahi ko tou whare.
- 32
- Na, ka korerotia te kupu a te Ariki ki a ia, ki nga tāngata katoa hoki i roto i tona whare.
- 33
- A ka mauria raua i taua haora o te po, ka horoia o raua whiunga; na, ka iriiria tonutia ia me ona tāngata katoa.
- 34
- A ka arahina raua ki tona whare, ka whakaturia he tepara kai, ka koa hoki, i a ia kua whakapono ki te Atua me tona whare katoa.
- 35
- Ka ao te ra, ka tonoa atu nga katipa e nga kai whakarite whakawa, ka mea, Tukua atu aua tāngata.
- 36
- Na, ka korerotia e te kai tiaki herehere enei kupu ki a Paora, Kua tono tangata mai nga kai whakarite whakawa, e mea ana, kia tukua atu korua: tena ra puta atu, haere i runga o te rangimarie.
- 37
- Na, ko te kianga atu a Paora ki a ratou, Kua whiua nuitia nei maua, i te mea kahore i whakawakia, he tāngata hoki no Roma, kua makā hoki ki te whare herehere; ko tenei hoki ka makā pukutia atu ki waho? Kahore ra hoki; engari ma ratou e haere mai e arahi i a maua ki waho.
- 38
- Na, ka, korerotia atu enei kupu e nga katipa ki nga kai whakarite whakawa: a ka rongo ratou no Roma raua, ka wehi.
- 39
- Katahi ka haere ratou ka tohe ki a raua, a ka arahina ki waho, ka ki marire kia haere atu i te pa.
- 40
- Na, te putanga atu i te whare herehere, ka tomo atu ki te whare o Riria: ano ka kite raua i nga teina, ka whakahau i a ratou, ka haere.
Address: 
Phone: 
Email: