- 1
- Na, te taenga ake o etahi i Huria, ka whakaako i nga teina, na, Ki te kore koutou e kotia, kia rite ki ta Mohi, e kore koutou e taea te whakaora.
- 2
- Na, ka nui te whawhai te tautohetohe a Paora raua ko Panapa ki a ratou, ka whakaritea ko Paora ko Panapa ko etahi atu hoki o ratou, kia haere ki nga apotoro ki nga kaumatua ki Hiruharama, ki tenei tautohenga.
- 3
- Heoi arahina ana ratou e te hahi, haere ana ra Piniki, ra Hamaria, ka korerotia te tahuritanga o nga tauiwi: a nui atu te hari o nga teina katoa.
- 4
- A, to raua taenga atu ki Hiruharama, ka whakamanuhiritia e te hahi, e nga apotoro hoki ratou ko nga kaumatua, ka korerotia nga mea i mahi tahi ai te Atua me raua.
- 5
- Na, te whakatikanga o etahi tāngata whakapono no te titorehanga ki nga Parihi, ka mea, e tika ana kia kotia ratou, kia mea atu hoki kia whakaritea te ture a Mohi.
- 6
- Na, ka huihui nga apotoro ratou ko nga kaumatua ki te whakaaro ki tenei mea.
- 7
- A ka nui te tautohetohe, ka whakatika a Pita, ka mea ki a ratou, E hoa ma, e nga tuakana, ka mātau koutou, noku te mangai i roto i a tatou i whiriwhiria e te Atua i nga ra o mua hei mea e rongo ai nga tauiwi ki te kupu o te rongo pai, e whakapono ai hoki.
- 8
- A na te Atua, e mātau nei ki nga ngakau, i whakaae ki a ratou, i a ia i hoatu i te Wairua Tapu ki a ratou, rite tahi ki tana ki a tatou:
- 9
- A kahore i puta ke tona whakaaro ki a tatou ki a ratou, i o ratou ngakau kua ma i a ia i runga i te whakapono.
- 10
- Ko tenei, he aha koutou ka whakamatautau ai i te Atua, i te mea ka whakatakotoria he ioka ki runga ki te kakī o nga akonga, te mea kihai nei i taea te mau e o tatou mātua e tatou hoki?
- 11
- Heoi ka whakapono nei tatou, tera tatou e ora i runga i te aroha noa o te Ariki o Ihu Karaiti, pera tahi me ratou.
- 12
- Na, noho puku ana te mano katoa, whakarongo ana ki a Panapa raua ko Paora, e korero ana i nga tohu i nga mea whakamiharo, i mea ai te Atua kia mahia e raua i roto i nga tauiwi.
- 13
- A ka mutu ta raua, ka whakahokia mai e Hemi, ka mea, E hoa ma, e nga tuakana, whakarongo mai ki a au:
- 14
- Kua korerotia e Himiona ta te Atua tirohanga mai i mua, tana tangohanga i tetahi iwi i roto i nga tauiwi mo tona ingoa.
- 15
- A e rite ana ki tenei nga korero a nga poropiti; i tuhituhia hoki,
- 16
- I muri iho o enei mea ka hoki ahau, ka hangā ano e ahau te tapenakara o Rawiri, kua hinga nei; a ka hangā ano e ahau ona wahi kua horoa, a ka whakaarahia ano:
- 17
- Kia rapu ai nga toenga o nga tāngata ki te Ariki, nga tauiwi katoa hoki, i karangatia nei toku ingoa ki runga ki a ratou, e ai ta te Ariki, e mahia nei enei mea katoa.
- 18
- E mohiotia ana e te Atua ana mahi katoa no te timatanga ra ano o te ao.
- 19
- Na, ko taku whakaaro tenei, kia kaua e whakararua nga mea e tahuri ana mai ki te Atua i roto i nga tauiwi:
- 20
- Engari kia tuhituhi atu ki a ratou, kia mawehe atu i nga pokenga a nga whakapakoko, i te moe tahae, i te mea kua notia te kakī, i te toto.
- 21
- No nga whakatupuranga hoki o mua nga kai kauwhau i a Mohi i tenei pa i tenei pa, he mea korero i roto i nga whare karakia i nga hapati katoa.
- 22
- Katahi ka pai nga apotoro ratou ko nga kaumatua me te hahi katoa, kia whiriwhiria etahi tāngata i roto i a ratou, ka tono ai kia haere hei hoa mo Paora raua ko Panapa ki Anatioka; a Hura i karangatia nei ko Pahapa, raua ko Hira, he hunga ingoa nui i roto i nga teina:
- 23
- Ka tuhia hoki enei mea hei mauranga; Na nga apotoro ratou ko nga kaumatua ko nga tuakana ki nga teina i roto i nga tauiwi, i Anatioka, i Hiria, i Kirikia; tena koutou:
- 24
- Na, ka rongo nei matou, tera etahi i haere atu nei i a matou, i whakararu i a koutou ki nga korero, i whakapohehe i o koutou ngakau, i mea, Kia kotia koutou, kia whakaritea hoki te ture: kahore nei hoki matou i korero ki a ratou:
- 25
- I a matou ka huihui i runga i te ngakau tahi, i pai matou kia whiriwhiria etahi tāngata, kia tonoa ki a koutou, hei hoa mo a matou tangata e aroha nei, mo Panapa raua ko Paora,
- 26
- I tuku nei i a raua ki te mate hei mea mo te ingoa o to tatou Ariki o Ihu Karaiti.
- 27
- Na, kua tonoa nei e matou a Hura raua ko Hira, ma raua hoki e korero a kupu atu aua mea ano.
- 28
- I pai hoki ki te Wairua Tapu, ki a matou hoki, kia kaua e whakatakotoria ki a koutou tetahi atu whakataimaha, ko enei mea tika anake;
- 29
- Kia mawehe atu koutou i nga mea e patua ana ma nga whakapakoko, i te toto, i te mea kua notia te kakī, i te moe tahae: ka tiakina koutou i enei mea, ka pai ta koutou mahi. Kia ora koutou.
- 30
- A, to ratou tukunga atu, ka haere ki Anatioka: na, ka huihuia te mano, ka hoatu te pukapuka:
- 31
- A ka oti te korero, ka koa ratou mo te kupu whakahau.
- 32
- Na, he maha nga kupu a Hura raua ko Hira i whakahau ai, i whakau ai i nga teina, he poropiti hoki raua.
- 33
- A i a raua kua noho i tetahi wa, ka tukua atu raua e nga teina i runga o te rangimarie ki nga apotoro.
- 34
- Heoi i pai a Hira kia noho ki reira.
- 35
- I whakaroa hoki a Paora raua ko Panapa ki Anatioka, e whakaako ana e kauwhau ana i te kupu a te Ariki, ratou tahi ko tera hunga tokomaha.
- 36
- Na, muri iho i etahi ra ka ki atu a Paora ki a Panapa, Taua ka hoki ka tirotiro i o taua teina i nga pa katoa, i kauwhautia ai e taua te kupu a te Ariki, to ratou peheatanga.
- 37
- A whakaaro ana a Panapa kia mauria a Hoani hei hoa, e karangatia nei ko Maka.
- 38
- Otiia i mea a Paora e kore e pai kia mauria hei hoa tenei tangata, i whakarere nei i a raua i Pamapuria, kihai hoki i haere tahi me raua ki te mahi.
- 39
- Heoi, nui atu to raua ngangare, i mawehe ai raua i a raua: a mauria ana e Panapa a Maka, ka rere ki Kaiperu;
- 40
- Na, tango ana a Paora i a Hira, haere ana, i a ia kua tukua ki te aroha noa o te Atua e nga teina.
- 41
- A haere ana ia ra Hiria ra Kirikia, whakau ana i nga hahi.
Address: 
Phone: 
Email: