- 1
- Na, i Ikoniuma, ka haere tahi raua ki roto ki te whare karakia o nga Hurai, a ka korero, no ka whakapono tona tini o nga Hurai o nga Kariki.
- 2
- Na nga Hurai whakateka ia i whakaoho i whakakino nga ngakau o nga tauiwi ki nga teina.
- 3
- Na, he nui te wa i noho ai raua, i maia ai te korero i nga mea a te Ariki, me te whakaae ano ia ki te kupu a tona aroha noa, me te homai ano e ia nga tohu me nga mea whakamiharo kia meatia e o raua ringa.
- 4
- Otiia i wehewehea nga tāngata o te pa: ko etahi i u ki nga Hurai, ko etahi ki nga apotoro.
- 5
- A i nga tauiwi, ratou ko nga Hurai, ko o ratou rangatira, e huaki mai ana ki te whakatupu kino, ki te aki i a raua ki te kohatu,
- 6
- Ka tupato raua, a rere ana ki Raihitara, ki Rerepe, ki nga pa o Raikaonia, ki pahaki tata atu ano hoki:
- 7
- A kauwhautia ana e raua te rongo pai ki reira.
- 8
- A i Raihitara e noho ana tetahi tangata waewae ngoikore, he kopa no te kopu mai o tona whaea, kahore i haere i mua iho:
- 9
- I rongo tenei i a Paora e korero ana: a, te tirohanga putanga atu o tera ki a ia, ka kite he whakapono tona e ora ai;
- 10
- He nui noa atu tona reo ki te ki mai, E tu ou waewae ki runga. Na, mokowhiti ake ana ia, haere ana.
- 11
- A, te kitenga o nga tāngata i ta Paora i mea ai, ka ara o ratou reo, to Raikaonia, ka mea, Kua heke iho nga atua ki a tatou, no nga tāngata te ahua.
- 12
- A huaina ana e ratou a Panapa ko Hupita, a Paora ko Merekurai, no te mea ko ia te pu korero.
- 13
- Na, ka kawea mai e te tohunga o Hupita, o tera i te ngutu o to ratou pa, nga puru me nga tupare ki nga kuwaha, a ka mea kia patua he whakahere e ratou ko nga tāngata.
- 14
- A, te rongonga o nga apotoro, o Panapa raua ko Paora, ka haehae i o raua kakahu, a rere ana ki roto ki nga tāngata, ka karanga atu,
- 15
- Ka mea, E mara ma, he aha koutou ka mea ai i enei mea? He tāngata hoki maua e rite tahi ana ki a koutou te tu, e kauwhau ana kia tahuri ke koutou i enei mea tekateka noa ki te Atua ora, nāna nei i hanga te rangi, me te whenua, te moana, me o reira mea katoa:
- 16
- I nga whakatupuranga hoki kua pahemo atu, i tukua e ia nga iwi katoa kia haere i o ratou ara ake.
- 17
- Otiia kihai i tukua e ia kia kahore he kai whakaatu mona; i atawhai hoki, i homai ano e ia ki a tatou te ua o te rangi, me nga po hua, i makona ai o tatou ngakau i te kai, i te koa.
- 18
- A ka korerotia enei kupu, na, mutu whakauaua i a raua ta nga tāngata meatanga ki te patu whakahere ma raua.
- 19
- Na, ko te haerenga mai o etahi Hurai i Anatioka, i Ikoniuma, ka whakaki i te iwi, a akina ana a Paora ki te kohatu, toia ana ki waho o te pa, hua noa kua mate.
- 20
- Otiia, i nga akonga e tu ana i tona taha, ka whakatika ia, haere ana ki roto ki te pa: a i te aonga ake ka haere raua ko Panapa ki Rerepe.
- 21
- Ano ka kauwhau raua i te rongo pai ki taua pa, a ka tokomaha ka meinga hei akonga, na, hoki ana raua ki Raihitara, ki Ikoniuma, ki Anatioka,
- 22
- Whakau ana i nga wairua o nga akonga, whakahau ana i a ratou kia mau tonu ki te whakapono, kua takoto hoki te tikanga, me na runga i nga matenga maha te ara atu mo tatou ki te rangatiratanga o te Atua.
- 23
- I whakarite ano hoki raua i nga kaumatua mo ratou i tenei hahi i tenei hahi, me te inoi ano raua, me te noho puku, a tukua atu ana ratou ki te Ariki i whakapono nei ratou.
- 24
- Na, ka haere raua na waenganui o Pihiria, tae tonu atu ki Pamapuria.
- 25
- A ka oti te kauwhau e raua te kupu ki Pereka, ka haere ki raro ki Ataria:
- 26
- A rere atu ana i reira ki Anatioka, ki te wahi i tukua ai raua ki te aroha noa o te Atua mo te mahi ka rite nei i a raua.
- 27
- Na, ka tae atu, ka huihuia te hahi, ka korerotia nga mea i mahi tahi ai te Atua me raua, ko tana uakanga hoki i te tatau o te whakapono ki nga tauiwi.
- 28
- A kihai i iti te wa i noho ai raua i reira ki nga akonga.
Address: 
Phone: 
Email: