- 1
- Heoi ka motu ke atu matou i a ratou, ka rere, a tika tonu atu, taea noatia a Koha, ao ake te ra, kei Roro, ā Patara:
- 2
- Na, ka rokohanga atu tetahi kaipuke e whakawhiti atu ana ki Piniki, a eke ana matou ki runga, rere ana.
- 3
- A ka kitea atu Kaiperu, ka mahue atu i te taha ki maui, a rere ana ki Hiria, u noa ki Taira: e waiho ana hoki e te kaipuke tona utanga ki reira.
- 4
- A ka kitea nga akonga, e whitu nga ra i noho ai matou ki reira: a ka korero mai ratou ki a Paora, he mea ki mai na te Wairua, kia kaua ia e haere atu ki Hiruharama.
- 5
- A ka rite aua ra o matou, ka puta atu matou, ka haere; me te kawe ano ratou katoa, nga wāhine, nga tamariki, i a matou a waho ra ano o te pa: na, ka tukua o matou turi ki te tahatai, ka inoi.
- 6
- Katahi ka awhi matou tetahi ki tetahi, a eke ana ki te kaipuke; ko ratou i hoki ki o ratou kāinga,
- 7
- A, te mutunga o to matou rerenga mai i Taira, ka tae ki Toromai, na, ka oha atu ki nga teina, a kotahi te ra i noho ai ki a ratou.
- 8
- I te aonga ake ka turia atu e matou ko Paora ma, ka haere ki Hiharia: a tomo atu ana ki te whare o Piripi kai kauwhau, ko ia nei tetahi o nga tokowhitu; a noho ana i a ia.
- 9
- Na, tokowha ana tamahine, he wahina, he poropiti.
- 10
- A ka maha o matou ra i noho ai, ka haere mai tetahi poropiti i Huria, ko Akapu te ingoa.
- 11
- A, te taenga mai ki a matou, ka mau ki te whitiki o Paora, herea iho e ia ona ake ringaringa me ona waewae, ka mea, Ko ta te Wairua Tapu korero tenei, E peneitia te here o te tangata nona tenei whitiki e nga Hurai i Hiruharama, e tukua atu ano ia ki nga ringaringa o nga tauiwi.
- 12
- Heoi, to matou rongonga i enei mea, ka tohe matou ko nga tāngata o taua kāinga, kia kaua ia e haere atu ki Hiruharama.
- 13
- Na, ko te whakahokinga mai a Paora, He aha ta koutou e tangi, e whakangakau-kore nei i a au? ehara hoki i te mea ko te here anake taku e pai ai, engari ko te mate ano hoki ki Hiruharama, mo te ingoa o te Ariki o Ihu.
- 14
- A, te rongo ia, ka mutu ta matou, ka mea, Kia meatia ta te Atua e pai ai.
- 15
- A ka pahemo enei ra, ka takai matou i a matou mea, a haere ana ki Hiruharama.
- 16
- I haere tahi ano i a matou etahi o nga akonga o Hiharia, me te kawe ano i a Nahona o Kaiperu, he akonga tawhito, hei tukunga mo matou.
- 17
- A, to matou taenga atu ki Hiruharama, na, koa noa iho nga teina ki a matou hei hoa mo ratou.
- 18
- I te aonga ake ka haere tahi matou ko Paora ki a Hemi: i reira ano hoki nga kaumatua katoa.
- 19
- Na, ka oha atu ia ki a ratou, ka korerotia takitahitia atu nga mea i mea ai te Atua kia meatia e ia i roto i nga tauiwi.
- 20
- Na, to ratou rongonga ai, ka whakakororia i te Ariki, ka mea atu ki a ia, Kua kite koe, e to matou teina, i nga mano tini o nga Hurai kua whakapono nei; a e uaua katoa ana ki te ture:
- 21
- Kua rongo ano hoki ratou ki a koe, e whakaako ana i nga Hurai katoa i roto i nga tauiwi, kia whakarerea a Mohi, e mea ana kia kaua ratou e kokoti i nga tamariki, kia kaua ano hoki e haere i runga i nga ritenga o mua.
- 22
- Na, me pehea? tera e rupeke mai te huihui: e rongo hoki ratou ki tou taenga mai.
- 23
- Na, me mea e koe tenei e korerotia atu nei e matou ki a koe: Tokowha o matou tāngata, he kupu taurangi ta ratou;
- 24
- Tangohia enei, kia purea ngatahitia koutou, mau ano e utu a ratou mea, kia waruhia ai o ratou mātenga: a ka kite katoa ratou he teka noa nga mea i korerotia mou; engari e tika ana tou haere, a kei te whakarite ano koe i te ture.
- 25
- Ko nga tauiwi ia kua whakapono, kua tuhituhi atu matou, kua whakatakoto i te tikanga kia kaua tenei e meatia e ratou, ko tenei anake, kia tupato ratou i nga mea e patua ana ma nga whakapakoko, i te toto, i te mea kua notia te kakī, me te moe tahae.
- 26
- Na, ka mau a Paora ki aua tāngata, a i te aonga ake ka pure tahi ka haere tahi ratou ki roto ki te temepara, hei whakaatu ka whakaritea nga ra mo te purenga, kia whakaherea ra ano he whakahere mo tetahi mo tetahi o ratou.
- 27
- Heoi ka tata nga ra e whitu te taka, ka kitea ia i roto i te temepara e etahi Hurai o Ahia, na ratou i whakaoho te mano katoa, a ka pa o ratou ringaringa ki a ia,
- 28
- Ka karanga, E nga tāngata o Iharaira, awhinatia mai: Ko te tangata tenei e whakaako nei i nga tāngata katoa o nga wahi katoa ki nga mea whakahe mo te iwi, mo te ture, mo tenei kāinga: kua kawea ano hoki e ia etahi Kariki ki roto ki te temepara, a ka noa nei i a ia tenei wahi tapu.
- 29
- (I kite hoki ratou i mua he hoa nona i roto i te pa a Toropimu o Epeha; a tohu noa ratou, kua kawea ia e Paora ki roto ki te temepara.)
- 30
- Na, ka oho te pa katoa, ka oma mai nga tāngata: a ka mau ki a Paora, toia ana ia ki waho o te temepara: a uakina tonutia atu ana nga tatau.
- 31
- Na, i a ratou e whai ana kia patua ia, ka tae te rongo ki te rangatira mano o te hapu hoia, ka tutū te puehu i Hiruharama katoa.
- 32
- Na, hohoro tonu tana mau ki etahi hoia me nga keneturio, a oma iho ana ki a ratou: a, to ratou kitenga i te rangatira mano me nga hoia, ka mutu te patu i a Paora.
- 33
- Na, ka whakatata atu te rangatira mano, ka tango i a ia, ka mea kia herea ki nga mekameka e rua; a ka ui atu ko wai ia, i aha hoki ia.
- 34
- He kupu ano ta tetahi, he kupu ano ta tetahi, i roto i te mano: a, tē rongo ia ki te tikanga i te ngangau, ka mea kia arahina ia ki te pa.
- 35
- Na, te taenga atu ki te pikitanga, ka hikitia ia e nga hoia i te taututetutenga hoki a te tangata.
- 36
- I aru mai hoki te huihuinga o te iwi, me te karanga, Whakamatea ia.
- 37
- Ano ka whano a Paora te kawea ki roto ki te pa, ka mea ki te rangatira mano, E pai ranei kia korero atu ahau i tetahi kupu ki a koe? Ka mea ia, E mātau ana ranei koe ki te reo Kariki?
- 38
- Ehara oti koe i taua Ihipi i whakatupu i te tutū i mua i enei ra, a kawea ana e ia nga tāngata kohuru e wha mano ki te koraha?
- 39
- Ka mea atu a Paora, He tangata ahau no nga Hurai no Tarahu o Kirikia, he tangata tupu no tera pa, ehara ano hoki i te pa ingoa kore: na, ko taku inoi tenei ki a koe, tukua ahau kia korero ki te iwi.
- 40
- Na, tukua ana e ia, a tu ana a Paora ki runga ki te pikitanga, ka tawhiri tona ringaringa ki te iwi. Na, mutu pu te turituri, ka korero atu ia, no nga Hiperu te reo, ka mea,
Address: 
Phone: 
Email: