- 1
- Na, ka titiro pu a Paora ki te runanga, a ka mea, E hoa ma, e aku tuakana, tika tonu ki taku mahara iho taku whakahaere i te aroaro o te Atua, a taea noatia tenei ra.
- 2
- Na, ka mea a Anania te tohunga nui ki te hunga e tu ana i tona taha, kia pakia tona mangai.
- 3
- Ano ra ko Paora ki a ia, Tenei ake ka papaki te Atua i a koe, e te pakitara kua oti te pani ki te paru ma: kaore, kia noho koe ki te mea ki a au i ta te ture i whakatakoto ai, heoi kapea ana e koe ta te ture, heoi kiia ana ahau e koe kia pakia?
- 4
- Na, ka mea atu te hunga e tu tata ana, E whakamanumanu ana oti koe ki te tohunga nui o te Atua?
- 5
- Ano ra ko Paora, Kihai ahau i mātau, e aku tuakana, ko ia te tohunga nui: kua oti hoki te tuhituhi, Aua e korerotia kinotia te rangatira o tou iwi.
- 6
- Ano ka kite a Paora no nga Haruki etahi, ko etahi no nga Parihi, ka karanga ia i roto i te runanga, E hoa ma, e aku tuakana, he Parihi ahau, he tama na te Parihi: ko te aranga o te hunga mate e tumanakohia atu nei, te mea e whakawakia nei ahau.
- 7
- A, tana korerotanga i tenei, ka totohe nga Parihi ki nga Haruki: a ka wehea te huihui.
- 8
- E mea ana hoki nga Haruki, kahore he aranga mai, kahore he anahera, kahore he wairua: ko nga Parihi ia e whakaae ana ki aua mea e rua.
- 9
- A ka nui te ngangare: ka whakatika nga Karaipi o to te Parihi taha, ka totohe, ka mea, Kahore ano i mau i a matou te hē o tenei tangata: engari ki te mea kua korero tetahi wairua ki a ia, tetahi anahera ranei, aua tatou e whawhai ki te Atua.
- 10
- Ano ka nui te ngangau, ka mataku te rangatira mano, kei motumotuhia a Paora e ratou, ungā ana e ia nga hoia kia heke atu, ki te tango i a ia i roto i ratou, kia arahina hoki ki te pa.
- 11
- A i taua po ano ka tu te Ariki ki tona taha, ka mea, Kia maia, e Paora: me whakaatu ano hoki e koe ki Roma, me pera ano me tau whakaaturanga i aku mea ki Hiruharama.
- 12
- Ao ake te ra, ka huihui etahi o nga Hurai, ka maka oati ki a ratou ano, ka mea, kia kaua ratou e kai, kia kaua e inu, kia whakamatea ra ano a Paora.
- 13
- A e wha tekau ngahoro nga tāngata nāna tenei oatitanga.
- 14
- Na, ka haere ratou ki nga tohunga nui ratou ko nga kaumatua, ka mea, Mau pu ta matou oati i oati ai, kia kaua e pa kai, kia mate ra ano a Paora i a matou.
- 15
- Na, ma koutou tahi ko te runanga e ki atu ki te rangatira mano kia arahina iho ia ki a koutou apopo, me ki atu e mea ana koutou kia ata mohiotia nga mea mona: ko matou ia, i te mea kiano ia i tata noa, ka whai mahara ki te whakamate i a ia.
- 16
- A, te rongonga o te iramutu o Paora ki ta ratou whakaaro whakapapa, na, ka haere ia, ka tomo atu ki roto ki te pa, ka korero ki a Paora.
- 17
- Katahi ka karangatia e Paora tetahi o nga keneturio, ka mea, Arahina atu te tamaiti nei ki te rangatira mano: he korero hoki tana ki a ia.
- 18
- Na, ka mau ia ki a ia, a arahina atu ana ki te rangatira mano, ka mea atu, I karanga te herehere a Paora i a au, i mea kia arahina tenei tamaiti ki a koe, he korero hoki tana ki a koe.
- 19
- Na, ka mau te rangatira mano ki tona ringaringa, ka haere ki tahaki, ka ui atu, He aha tau mea hei korerotanga ki a au?
- 20
- Ano ra ko tera, Kua whakatakoto whakaaro nga Hurai kia mea atu ki a koe, kia arahina iho a Paora apopo ki te runanga, ano e ata uia tetahi atu mea mona.
- 21
- Na, aua koe e rongo ki a ratou: e wha hoki tekau ngahoro o nga tāngata o ratou e whanga ana ki a ia, kua puaki ta ratou oati, kia kaua e kai, kia kaua e inu, kia mate ra ano ia i a ratou: na, kua rite tenei ratou, e tatari ana ki te kupu whakaae i a koe.
- 22
- Katahi ka tukua atu taua tamaiti e te rangatira mano, a ka mea ia, Kaua e korerotia ki tetahi to whakaaturanga mai i enei mea ki a au.
- 23
- Na, tokorua nga keneturio i karangatia e ia, ka mea atu, Kia rite mai etahi hoia kia rua rau hei haere ki Hiharia, me nga hoia eke hoiho kia whitu tekau, me te hunga mau matia kia rua rau, i te toru o nga haora o te po;
- 24
- Kia rite mai hoki nga kararehe, hei whakanohoanga iho mo Paora ki runga, kia kawea oratia ai ia ki a Pirika ki te kawana.
- 25
- I penei te pukapuka i tuhituhia e ia:
- 26
- Na Karauria Raihia ki a Pirika ki te kawana pai rawa, Tena koe.
- 27
- I hopukia tenei tangata e nga Hurai, a i a ia ka tata te whakamatea e ratou, ka puta atu ahau me nga hoia, a tangohia mai ana ia, i rongo hoki ahau no Roma ia.
- 28
- I mea ano ahau kia rongo i te take i whakawakia ai ia e ratou, a arahina atu ana ki to ratou runanga:
- 29
- Na, ka kite ahau he kupu tautohe no to ratou ture i whakawakia ai ia, kahore ano hoki ona hē i tika ai te mate, te here ranei.
- 30
- A ka korerotia mai ki a au, meake whanga nga Hurai mo tenei tangata, na, tonoa tonutia ana ki a koe, i mea hoki ahau ki ona kai whakawa, kia korerotia ki a koe nga mea mona. Hei kona ra.
- 31
- Na, ka mau nga hoia ki a Paora, ka pera hoki me te mea i korerotia ki a ratou, a arahina ana ia i te po ki Anatipatari.
- 32
- Ao ake te ra ka tukua atu nga tāngata eke hoiho hei hoa haere mona, a hoki ana ratou ki te pa:
- 33
- A, to ratou taenga atu ki Hiharia, ka hoatu te pukapuka ki te kawana, a whakaturia ana a Paora ki tona aroaro.
- 34
- A, te tirohanga iho a te kawana, ka ui atu, No tehea kawanatanga ia? A ka rongo no Kirikia;
- 35
- Ka mea ia, Ka whakarongo ahau ki a koe, ina tae mai ano hoki ou kai whakawa. I mea ano ia kia tiakina ia i roto i te whare whakawa o Herora.
Address: 
Phone: 
Email: