- 1
- A i a raua e korero ana ki te iwi, ka whakaekea mai raua e nga tohunga, e te rangatira o te temepara, e nga Haruki,
- 2
- I riri hoki no te mea e ako ana raua i te iwi, mo te kauwhautanga hoki i a Ihu, i te aranga mai i te mate.
- 3
- Na, ka pa o ratou ringa ki a raua, a ka meinga kia tiakina kia ao ra ano te ra; no te mea kua ahiahi noa ake.
- 4
- Ahakoa ra he tokomaha i whakapono o te hunga i rongo i te kupu; te tokomahatanga o nga tāngata, me te mea e rima nga mano.
- 5
- Na, i te aonga ake, ka huihui o ratou rangatira, nga kaumatua, me nga Karaipi, ki Hiruharama,
- 6
- Ratou ko Anaha ko te tohunga nui, ko Kaiapa, ko Hoani, ko Arehanera, me nga whanaunga katoa o te tohunga nui.
- 7
- Ano ka whakaturia raua ki waenganui, ka ui atu, Tena koa te mana te ingoa i meatia ai tenei e korua?
- 8
- A kī tonu a Pita i te Wairua Tapu, ka mea ki a ratou, E nga rangatira o te iwi, e nga kaumatua o Iharaira,
- 9
- Ki te uia maua aianei ki te mahi pai ki te tangata ngoikore, ki te peheatanga i whakaorangia ai ia;
- 10
- Kia mohio koutou katoa, me te iwi katoa ano hoki o Iharaira, na te ingoa o Ihu Karaiti o Nahareta i ripekatia na e koutou, i whakaarahia ake ano hoki e te Atua i te mate, nāna tenei i tu ora ai i to koutou aroaro.
- 11
- Ko te kohatu tenei i whakakahoretia e koutou, e nga kai hanga, a kua meinga nei hei upoko mo te kokonga.
- 12
- Kahore hoki he oranga i tetahi ake: kahore hoki he ingoa ke atu i raro o te rangi kua homai ki nga tāngata, e ora ai tatou.
- 13
- Na, ka kite ratou i te maia o Pita raua ko Hoani, a ka mātau ehara i te hunga korero pukapuka, a he hunga ware, ka miharo ratou; ka mahara hoki he hoa raua no Ihu.
- 14
- A ka kite i te tangata i whakaorangia e tu tahi ana ratou, kahore a ratou kupu hei whakahoki atu.
- 15
- Na, ka tono ratou i a raua kia haere ki waho o te runanga, a ka korerorero ki a ratou ano,
- 16
- Ka mea, Me aha e tatou enei tāngata? ka kite katoa hoki te hunga e noho ana i Hiruharama, he merekara ingoa nui kua meinga nei e raua; e kore ano hoki e ahei te whakorekore e tatou.
- 17
- Otiia kaua e tukua kia horapa atu ki roto ki te iwi; engari kia kaha ta tatou whakawehi i a raua, kia kaua e korerotia tenei ingoa ki tetahi tangata, i nga wa e takoto ake nei.
- 18
- A karangatia ana raua e ratou, ka mea ki a raua, Kia kaua rawa e korero, kia kaua e whakaako, i runga i te ingoa o Ihu.
- 19
- Na, ko te whakahokinga atu a Pita raua ko Hoani ki a ratou, ka mea, Whakaaroa e koutou, ka tika ranei ki te aroaro o te Atua ko koutou kia whakarangona, a kaua te Atua?
- 20
- E kore hoki e ahei kia kaua e korerotia e maua nga mea i kite ai, i rongo ai matou.
- 21
- Heoi whakawehi atu ana ano hoki ratou ki a raua, a tukua ana kia haere, kihai hoki i kitea te mea e whiua ai raua, i wehi hoki i te iwi: i whakakororia katoa hoki i te Atua mo taua mea i meatia.
- 22
- No te mea kua wha tekau ke nga tau o te tangata, i meinga nei ki a ia tenei merekara whakaora.
- 23
- A ka oti raua te tuku, ka haere ki o raua hoa, a korerotia katoatia ana nga mea i korero ai nga tohunga nui me nga kaumatua ki a raua.
- 24
- A, to ratou rongonga ai, ka karanga tahi ratou ki te Atua, ka mea, E te Ariki, ko koe te Atua i hangā ai te rangi me te whenua, te moana, me o reira mea katoa:
- 25
- Nau te kupu i korerotia e te mangai o tou pononga o Rawiri, He aha ka nana ai nga tauiwi, ka whakaaro horihori ai te iwi?
- 26
- I whakatika mai nga kingi o te whenua, i huihui ngatahi nga rangatira ki te whawhai ki te Ariki raua ko tana Karaiti.
- 27
- He pono nei hoki te huihuinga o Herora, o Ponotio Pirato, o nga tauiwi, ratou ko te iwi o Iharaira, ki to Tamaiti tapu ki a Ihu i whakawahia e koe,
- 28
- Ki te mea i ta tou ringa, i ta tou whakaaro, i whakatakoto ai i mua kia meatia.
- 29
- Na, titiro iho, e te Ariki, aianei ki ā ratou kupu whakawehi: a tukua mai ki o pononga kia tino maia te korero i to kupu,
- 30
- Whakamarokia mai tou ringaringa ki te whakaora; a kia meatia nga tohu me nga mea whakamiharo, i runga i te ingoa o to Tamaiti tapu o Ihu.
- 31
- Te mutunga o ta ratou inoi, ka whakangaueuetia te wahi i whakamine ai ratou; a kī katoa ana ratou i te Wairua Tapu, na, maia noa iho ratou ki te korero i te kupu a te Atua.
- 32
- Kotahi ano ngakau, kotahi ano wairua o te mano o te hunga whakapono: kihai ano hoki tetahi i mea, māna ake tetahi o ana taonga; heoi he mea huihui noa iho a ratou mea katoa.
- 33
- A nui atu te kaha i whakapuakina ai e nga apotoro te aranga mai o te Ariki o Ihu; he nui ano hoki te aroha noa i runga i a ratou katoa.
- 34
- Kahore ano hoki tetahi o ratou i rawa-kore: ko te hunga hoki he kāinga, he whare o ratou, hokona ana e ratou, a mauria mai ana nga utu o nga mea i hokoa,
- 35
- A whakatakotoria ana ki nga waewae o nga apotoro: na, ka tuwhaina atu ma ia tangata ma ia tangata, he mea whakarite ki te mate o tetahi o tetahi.
- 36
- A ko Hohi i huaina e nga apotoro ko Panapa, (ko te tikanga tenei ina whakamaoritia, Ko te tama a te whakamarietanga,) he Riwaiti, ko Kaiperu tona kāinga,
- 37
- He wahi kāinga tona, na hokoa ana, a mauria mai ana nga moni, whakatakotoria ana ki nga waewae o nga apotoro.
Address: 
Phone: 
Email: