- 1
- Na, i aua ra, i te mea, ka tokomaha haere nga akonga, ka amuamu nga tāngata whaka-Kariki ki nga Hiperu, no te mea i hapa a ratou pouaru i nga mea i tuwhaina i tenei ra i tenei ra.
- 2
- Katahi ka karangatia e te tekau ma rua te mano o nga akonga, ka mea atu, E kore e pai kia whakarerea e matou te kupu a te Atua, a ko te mahi tepara ma matou.
- 3
- Na, tirohia iho, e nga teina, i roto i a koutou kia tokowhitu nga tāngata e korerotia paitia ana, e kī ana i te Wairua Tapu i te mahara, a ma matou ratou e whakarite iho mo tenei mahi.
- 4
- Ko matou ia ka u tonu ki te inoi, ki te mahi i te kupu.
- 5
- A pai katoa te mano ki taua korero: na, whiriwhiria ana e ratou a Tepene, he tangata e kī ana i te whakapono, i te Wairua Tapu, ratou ko Piripi, ko Porokoru, ko Nikanora, ko Timona, ko Paramena, ko Nikora he porohiraiti no Anatioka:
- 6
- Na, whakaturia ana ratou ki te aroaro o nga apotoro: ka inoi era, ka whakapa i nga ringaringa ki a ratou.
- 7
- Heoi tupu ana te kupu a te Atua; tino nui haere ana te tokomahatanga o nga akonga i Hiruharama; a he tokomaha nga tohunga i tahuri mai ki te whakapono.
- 8
- A kī tonu a Tepene i te whakapono i te kaha, he nui hoki nga merekara me nga tohu i meatia e ia i roto i te iwi.
- 9
- Na, ka whakatika etahi o te whakaminenga e karangatia nei, no nga Riperetini, me etahi o nga tāngata o Hairini, o Arehanaria, o te hunga hoki o Kirikia, o Ahia, totohe ai ki a Tepene.
- 10
- A kihai i tau i a ratou te whakatae ki te mohio, ki te wairua i korero ai ia.
- 11
- Na, ka whakaki ratou i tetahi tangata hei mea, I rongo matou i a ia e korero kohukohu ana mo Mohi, mo te Atua ano hoki.
- 12
- A whakaohokia ana e ratou te iwi, nga kaumatua, me nga Karaipi, na, whakaekea ana ia e ratou, hopukia ana, kawea ana ki te runanga.
- 13
- A whakaturia ana e ratou etahi kai whakapae teka hei mea, Kahore e mutu te korero a tenei tangata i nga kupu kohukohu mo tenei kāinga tapu, mo te ture:
- 14
- I rongo hoki matou ki a ia e mea ana, Ma tenei Ihu o Nahareta e pākaru te kāinga nei, e whakaputa ke nga ritenga i homai e Mohi ki a tatou.
- 15
- A ka titiro pu atu ki a ia te hunga katoa e noho ana i te runanga, ka kite i tona mata, ano he mata anahera.
Address: 
Phone: 
Email: