- 1
- Whakarongo ki tenei kupu, e nga kau o Pahana, i te maunga o Hamaria, e whakatupukino na i nga ware, mongamonga noa i a ratou nga rawa-kore, a e mea ana ki o ratou ariki, Kawea mai, kia inu ai tatou.
- 2
- Kua oatitia tona tapu e te Atua e Ihowa, nana, kei te haere mai nga ra ki a koutou, e riro ai koutou i a ia, mea rawa ki nga matau, o koutou uri ano hoki ki nga matau ika.
- 3
- Ka haere atu ano koutou na nga pakaru, na nga wahi e rite mai ana ki te aroaro o tenei, o tenei; ka akiritia ano koutou ki te whare kingi, e ai ta Ihowa.
- 4
- Haere mai ki Pete-ere, ki reira poka ke ai, ki Kirikara whakanui ai i te pokanga ketanga; kawea mai ano hoki a koutou patunga tapu i tenei ata, i tenei ata, a koutou whakatekau i te toru o nga tau.
- 5
- Tapaea atu ano hoki he whakahere whakawhetai, he mea kinaki ki te rewena, kauwhautia ano hoki, karangarangatia nga whakahere noa ake: ko ta koutou hoki tenei i pai ai, e nga tamariki a Iharaira, e ai ta te Ariki ta Ihowa.
- 6
- I tukua atu ano e ahau he kai-kore mo nga niho ki a koutou ki o koutou pa katoa, he taro-kore ano hoki ki o koutou wahi katoa; heoi kihai koutou i tahuri mai ki a au, e ai ta Ihowa.
- 7
- I kaiponuhia ano hoki e ahau te ua ki a koutou i te mea kia toru ake marama ko te kotinga witi: i meinga ano e ahau kia ua ki runga ki te kotahi, a ki tetahi pa i mea ahau kia kaua e ua: ko tetahi wahi i uaina, a, te wahi kihai i uaina, maroke noa iho.
- 8
- Na, kopiko atu ana etahi pa e rua, e toru, ki te pa kotahi ki te inu wai, a kore ake i makona: heoi kihai koutou i hoki mai ki a au, e ai ta Ihowa.
- 9
- I patua koutou e ahau ki te ngingiotanga, ki te kokatanga o te kai: nui noa a koutou kāri, a koutou māra waina, a koutou piki, a koutou oriwa, pau ake i te whangawhanga: heoi kihai ano koutou i hoki mai ki a au, e ai ta Ihowa.
- 10
- I tukua atu e ahau te mate uruta ki a koutou, he pera tonu me to Ihipa: a koutou taitamariki he mea patu naku ki te hoari, o koutou hoiho riro ana i a au, a meinga ana e ahau te piro o to koutou puni kia kake ake ki o koutou ihu; heoi kihai ano koutou i hoki mai ki a au, e ai ta Ihowa.
- 11
- I hurihia etahi o koutou e ahau ki raro, i peratia me ta te Atua hurihanga i Horoma raua ko Komora, a rite tonu koutou ki te mounga i tangohia mai i roto i te weranga: heoi kihai ano koutou i hoki mai ki a au, e ai ta Ihowa.
- 12
- Mo reira ka meatia tenei e ahau ki a koe, e Iharaira. Ka meinga nei tenei e ahau ki a koe, na, kia rite ou mea, mo te wa e tutaki ai koe ki to Atua, e Iharaira.
- 13
- No te mea, na, te kai whakaahua o nga maunga, te kai hanga o te hau, te kai whakaatu mai ki te tangata o nga mea e whakaaroa ana e ia, te kai mea i te ata hei pouritanga, a e haere ana i runga i nga wahi tiketike o te whenua, ko Ihowa, ko te Atua o nga mano tona ingoa.
Address: 
Phone: 
Email: