- 1
- Tenei ano nga tikanga me nga whakariteritenga, hei puritanga ma koutou hei mahinga ki te whenua e homai ana e Ihowa e te Atua o ou mātua ki a koe kia nohoia, i nga ra katoa e ora ai koutou ki runga ki te whenua.
- 2
- Whakamotitia rawatia nga wahi katoa i mahi ai nga iwi, ka riro mai nei i a koutou, ki o ratou atua, i runga i nga maunga teitei, i nga pukepuke hoki, i raro hoki i nga rakau kouru nui katoa:
- 3
- Pakarua o ratou aata, wahia hoki o ratou pou, ko o ratou motu rakau tahuna e koutou ki te ahi; me nga whakapakoko hoki o o ratou atua tuakina iho, a whakangaromia rawatia atu o ratou ingoa i taua wahi.
- 4
- Aua koutou e pena ki a Ihowa ki to koutou Atua.
- 5
- Engari, me whai ki tona nohoanga, ki te wahi e whiriwhiri ai a Ihowa to koutou Atua i roto i o koutou iwi katoa, kia waiho tona ingoa ki reira, me haere mai ano koutou ki reira.
- 6
- Me kawe mai ano hoki ki reira a koutou tahunga tinana, me a koutou patunga tapu, me a koutou whakatekau, me nga whakahere e hapahapainga ana e o koutou ringa, me a koutou ki taurangi, me a koutou whakahere tuku noa, me nga whanau matamua o a koutou kau, o a koutou hipi:
- 7
- A ko reira koutou kai ai, ko te aroaro o Ihowa o to koutou Atua, a ka koa ki nga mea katoa e toro atu ai o koutou ringaringa, a koutou, me nga tangata o o koutou whare, ki nga manaakitanga a Ihowa a tou Atua i a koe.
- 8
- Kei rite to koutou mahi ki tetahi o nga mahi e mahia nei e tatou i konei i tenei ra; kei mahi tera tangata, tera tangata i nga mea e tika ana ki tana titiro ake.
- 9
- Kahore nei hoki koutou kia tae noa ki te okiokinga, ki te kāinga tupu e homai ana e Ihowa e tou Atua ki a koe.
- 10
- Eaoia, ka whiti koutou i Horano, ka noho ki te whenua e homai ana e Ihowa e to koutou Atua hei kāinga tupu mo koutou, a ka meinga koutou e ia kia okioki i o koutou hoa whawhai katoa i tetahi taha i tetahi taha, a ka noho koutou i runga i te whenua rangatira;
- 11
- Katahi ka ai he wahi, ki ta Ihowa ki ta to koutou Atua e whiriwhiri ai, hei nohoanga mo tona ingoa; me mau mai e koutou ki reira nga mea katoa e whakahau atu nei ahau ki a koutou, a koutou tahunga tinana, me a koutou patunga tapu, me a koutou whakatekau, me nga whakahere hapahapai a o koutou ringaringa, me nga mea katoa i whiriwhiria i roto i a koutou ki taurangi i kiia taurangitia e koutou ma Ihowa.
- 12
- A, ka koa koutou ki te aroaro o Ihowa o to koutou Atua, a koutou, me a koutou tamariki, me a koutou tamahine, a koutou pononga tane, me a koutou pononga wahine, me te Riwaiti i roto mai i o koutou tatau; kahore hoki ia i rato tahi koutou i tetahi wahi, i tetahi kāinga tupu ranei mona.
- 13
- Kia mahara koe kei tukua mai e koe o tahunga tinana ki nga wahi katoa e kite ai koe.
- 14
- Engari, hei te wahi e whiriwhiri ai a Ihowa i roto i tetahi o o iwi, hei reira tuku ai koe i o tahunga tinana, hei reira hoki koe mea ai i nga mea katoa e whakahau atu nei ahau ki a koe.
- 15
- Otiia, ki te hiahia tou ngakau ki tetahi mea, patua, kainga hoki he kikokiko i roto i o tatau, kia rite ki ta Ihowa ki ta to Atua manaakitanga i homai e ia ki a koe: me kai te tangata poke raua ko te tangata poke kore, i tena mea, kia rite ki te aneterope me te hata e kainga ana.
- 16
- Raia, kaua e kainga te toto; ringitia atu ki te whenua, ano he wai.
- 17
- E kore koe e tukua kia kai i roto i o tatau i nga whakatekau o to witi, o to waina ranei, o to hinu ranei, i nga matamua ranei o o kau, o o hipi ranei, i tetahi ranei o o ki taurangi e kiia taurangitia e koe, i o whakahere tuku noa ranei, i nga whakahere hapahapai ranei a to ringa:
- 18
- Engari, hei te aroaro o Ihowa o tou Atua koe kai ai i ena mea, hei te wahi e whiriwhiri ai a Ihowa tou Atua, a koe, me to tamaiti, me to tamahine, me to pononga tane, me to pononga wahine, me te Riwaiti hoki i roto i o tatau: a ka koa koe ki te aroaro o Ihowa o tou Atua ki nga mea katoa e totoro atu ai o ringa.
- 19
- Kia tupato kei mahue te Riwaiti i a koe i nga ra katoa e ora ai koe i runga i te whenua.
- 20
- E whakanui a Ihowa tou Atua i to rohe, e pera me tana i korero ai ki a koe, a ka mea koe, ka kai kikokiko ahau, (e hiahia ana hoki toku ngakau ki te kai kikokiko,) e kai koe i te kikokiko, i nga mea katoa e hiahia ai tou ngakau.
- 21
- Ki te mamao atu i a koe te wahi e whiriwhiri ai a Ihowa tou Atua kia waiho tona ingoa ki reira, na, me patu e koe tetahi o o kau, o o hipi ranei, e homai e Ihowa ki a koe, kia rite ki taku i whakahau ai ki a koe, a ka kai i roto i o tatau i nga mea katoa e hiahia ai tou ngakau.
- 22
- Ka kainga ena mea e koe, peratia me te aneterope raua ko te hāta e kainga ana; ko te tangata poke raua ko te tangata poke-kore, me kai tahi raua.
- 23
- Raia, kia tino u koe kei kai koe i te toto: ta te mea ko te toto te oranga; kaua hoki e kainga ngatahitia e koe te toto me te kikokiko.
- 24
- Kaua tena mea e kainga e koe; ringitia atu ki te whenua, peratia me te wai.
- 25
- Kei kainga tena mea e koe; kia whiwhi ai koe ki te pai, koutou, ko o tamariki i muri i a koe, mou i mahi i te mea e tika ana ki ta Ihowa titiro.
- 26
- Ko o mea tapu ia, e mea ai koe, me o ki taurangi, me tango e koe, a ka haere ki te wahi e whiriwhiri ai a Ihowa:
- 27
- Na, ka tuku mai koe i o tahunga tinana, i te kikokiko me te toto ki runga ki te aata o Ihowa o tou Atua: ko te toto hoki o o patunga tapu me riringi ki runga ki te aata a Ihowa a tou Atua, ko te kikokiko ia mau e kai.
- 28
- Maharatia, whakarangona hoki enei kupu katoa e whakahau atu nei ahau ki a koe, kia whiwhi ai koe ki te pai, koutou, ko o tamariki i muri i a koe, ake tonu atu, mo to mahinga i te mea e pai ana, e tika ana i te tirohanga a Ihowa a tou Atua.
- 29
- E hunā iho e Ihowa e tou Atua i tou aroaro nga iwi, e haere atu nei koe ki reira ki te tango i to ratou whenua, a ka riro mai ratou i a koe, a ka noho koe ki to ratou whenua;
- 30
- Kia tupato ki a koe, kei mahangatia koe, kei whai atu ki muri i a ratou, ina whakangaromia atu ratou i tou aroaro, kei ui atu ano hoki koe ki o ratou atua, kei mea, I pehea te mahi a enei iwi ki o ratou atua? ka pena ano hoki ahau.
- 31
- Kei pera to mahi ki a Ihowa ki tou Atua: ta te mea ko nga mea katoa e whakarihariha ai a Ihowa, e kino ai, ko ia ta ratou i mahi ai ki o ratou atua; na, ko a ratou tamariki nei ano, me a ratou tamahine, i tahuna e ratou ki te ahi ma o ratou atua.
- 32
- Ko nga mea katoa e whakahau ai ahau ki a koutou, ko ena ta koutou e mahara ai kia mahia: kaua e tapiritia ki etahi atu, kaua ano hoki e kinitia atu tetahi wahi o aua kupu.
Address: 
Phone: 
Email: