- 1
- E whakangaromia atu e Ihowa e tou Atua nga iwi, no ratou nei te whenua ka homai nei e Ihowa e tou Atua ki a koe, a ka riro mai to ratou wahi i a koe, a ka noho koe ki o ratou pa, ki o ratou whare;
- 2
- Kia toru nga pa e whakamotuhaketia e koe mou i waenganui o to oneone, ka homai nei e Ihowa e tou Atua ki a koe hei kāinga pumau.
- 3
- Whakapaia he huarahi, tapahia hoki kia toru nga rohe o tou whenua, ka whakawhiwhia nei e Ihowa e tou Atua ki a koe, hei rerenga atu mo nga tangata whakamate katoa.
- 4
- A ko te mea tenei e rere ai te tangata whakamate ki reira, e ora ai hoki: Ara, ki te patua e ia tona hoa he mea urupa, a, kahore ano i kino ki a ia i mua ake;
- 5
- Me te tangata hoki, ka haere tahi raua ko tona hoa ki te ngahere ki te tapatapahi rakau, a, te akinga atu a tona ringaringa i te toki ki te tua i te rakau, na, kua maunu atu te rino i te kakau, pono tonu atu ki tona hoa, a mate iho; na, ka rere atu ia ki tetahi o aua pa, a ka ora:
- 6
- Kei whai atu te kai takitaki toto i te tangata whakamate, i te mea e pawerawera ana tona ngakau, a ka hopu i a ia, ki te roa te huarahi, ka patu hoki i a ia; a, kihai ano hoki i tika te mate mona, no te mea kahore ia i kino ki a ia i mua ake nei.
- 7
- Koia taku e whakarite atu nei ki a koe, e mea nei, Kia toru nga pa e whakamotuhake e koe.
- 8
- A, ki te whakanui a Ihowa tou Atua i to rohe, ki te rite ki tana i oati ai ki ou mātua, a ka homai e ia te whenua katoa i mea ai ia kia homai ki ou mātua;
- 9
- Ki te puritia e koe, ki te mahia enei whakahaunga katoa, e whakahau atu nei ahau ki a koe i tenei ra, ara, kia aroha ki a Ihowa ki tou Atua, kia haere hoki i ona huarahi i nga ra katoa; ko reira tangohia mai ai e koe, kia toru atu nga pa, hei tapiri mo ena pa e toru:
- 10
- Kei whakahekea te toto hara-kore ki waenganui i to whenua, ka homai nei e Ihowa e tou Atua ki a koe hei kāinga, kei whakairia hoki te toto ki runga ki a koe.
- 11
- Eaoia, ki te kino tetahi tangata ki tona hoa, a ka whanga ki a ia, ka whakatika hoki ki a ia, ka patu rawa hoki i a ia, no ka mate ia, a ka rere ia ki tetahi o aua pa:
- 12
- Katahi ka tono mai nga kaumatua o tona pa, ka tango hoki i a ia i reira, ka hoatu i a ia ki te ringaringa o te kai takitaki toto, a ka mate ia.
- 13
- Kei tohu to kanohi i a ia, engari me whakakore atu e koe te toto harakore i roto i a Iharaira, kia whiwhi ai koe ki te pai.
- 14
- Kei nekehia ketia e koe te rohe a tou hoa i rohea e nga tangata onamata ki tou kāinga, e nohoia e koe i te whenua, ka homai nei e Ihowa e tou Atua ki a koe hei kāinga.
- 15
- Kei whakatika mai ki te tangata te kai whakaatu kotahi mo te kino, mo te hara aha ranei aha ranei, mo nga hara aha noa e hara ai ia: ma te kupu a nga kai whakaatu tokorua, ma te kupu ranei a nga kai whakaatu tokotoru, e whakatikaia ai te korero.
- 16
- Ki te whakatika mai tetahi kai whakaatu teka ki te tangata, a he teka tana korero mona;
- 17
- A ka tu nga tangata tokorua, na raua nei te totohe, ki te aroaro o Ihowa, ki te aroaro hoki o nga tohunga, ratou ko nga kai whakarite whakawa e whakariterite ana i aua ra;
- 18
- Na, me whakataki marie e nga kai whakarite whakawa; a, ka kitea he kai whakaatu teka te kai whakaatu, he teka tana korero mo tona teina;
- 19
- Na, peratia ia e koutou me tana i hiahia ai kia meatia ki tona teina: penei ka whakakorea atu e koe te kino i roto i a koe.
- 20
- A ka rongo te nuinga, na, ka wehi ratou, e kore hoki e meatia he kino pera i roto i a koe i muri iho.
- 21
- Kaua ano hoki tou kanohi e tohu; to te mate utu he mate, to te kanohi he kanohi, to te niho he niho, to te ringaringa he ringaringa, to te waewae he waewae.
Address: 
Phone: 
Email: