- 1
- A i haere ano a Mohi, i korero atu i enei kupu ki a Iharaira katoa.
- 2
- I mea ki a ratou, Ka kotahi rau ka rua tekau nga tau o toku whanautanga ka tae mai ki tenei ra; e kore ahau e ahei ano te kopiko atu te kopiko mai: a, kua mea mai ano a Ihowa ki a au, E kore koe e whiti i tenei Horano.
- 3
- Ko Ihowa ko tou Atua, ko ia te whiti atu ana ki mua i a koe, mana e whakangaro enei iwi i mua atu i a koe, a ka riro mai ratou i a koe: ko Hohua hoki, ko ia te whiti atu i mua i a koe; ka rite ki ta Ihowa i korero ai.
- 4
- A ka rite ta Ihowa e mea ai ki a ratou ki tana i mea ai ki a Hihona raua ko Oka, ki nga kingi o nga Amori, ki te whenua hoki o te hunga i hunā e ia.
- 5
- A ka homai ratou e Ihowa ki to koutou aroaro, a ka rite ta koutou meatanga i a ratou ki nga whakahaunga katoa i whakahau ai ahau ki a koutou.
- 6
- Kia maia, kia toa, kaua e wehi, kaua e pawera i a ratou: ta te mea ko Ihowa ko tou Atua, ko ia te haere tahi ana i a koe; e kore ia e whakarere i a koe, e kore hoki e mawehe atu i a koe.
- 7
- Na, ka karanga a Mohi ki a Hohua, a, ka mea ki a ia i te tirohanga a Iharaira katoa, Kia maia, kia toa: ta te mea, ko koe te haere tahi atu ana i tenei iwi ki te whenua i oati ai a Ihowa ki o ratou matua kia homai ki a ratou; a mau ano ratou e whakawhiwhi ki taua wahi.
- 8
- Ko Ihowa hoki, ko ia te haere ana i tou aroaro; kei tou taha ia, e kore ia e whakarere i a koe, e kore hoki e mawehe atu i a koe: kaua e wehi, kaua hoki e pawera.
- 9
- A tuhituhia iho e Mohi tenei ture, hoatu ana ki nga tohunga ki nga tamariki a Riwai, ki nga kai amo i te aaka o te kawenata a Ihowa, ki nga kaumatua katoa ano hoki o Iharaira.
- 10
- A i ako ano a Mohi ki a ratou, i mea, Hei te mutunga o nga tau e whitu, hei te wa ano e rite ai te tau tukunga noatanga, i te hakari o nga whare wharau,
- 11
- I te wa e tae ai a Iharaira katoa ki te whakakite i a ratou, ki te aroaro o Ihowa o tou Atua, ki te wahi e whiriwhiri ai ia, ka korero ai koe i tenei ture ki te aroaro o Iharaira katoa, kia rongo ai ratou.
- 12
- Whakaminea te iwi, nga tane, me nga wahine, nga tamariki hoki, me to tangata iwi ke i roto i ou kuwaha, kia rongo ai ratou, kia whakaakona ai, kia wehi ai ratou i a Ihowa i to koutou Atua, kia mau ai ki te mahi i nga kupu katoa o tenei ture:
- 13
- Kia rongo ai hoki a ratou tamariki, kihai nei i mohio, kia whakaakona ai kia wehi i a Ihowa i to koutou Atua i nga ra katoa e ora ai koutou i runga i te whenua e whiti atu nei koutou i Horano ki reira ki te tango.
- 14
- Na, ka mea a Ihowa ki a Mohi, Nana, ka tata mai ou ra e mate ai: karangatia atu a Hohua, e tu hoki korua ki roto ki te tapenakara o te whakaminenga, a maku e ako atu ki a ia. Na, ka haere a Mohi raua ko Hohua, a tu ana raua i roto i te tapenakara o te whakaminenga.
- 15
- Na, ka puta mai a Ihowa ki roto ki te tapenakara, i roto ano i te pou kapua: a tu ana te pou kapua i runga i te kuwaha o te tapenakara.
- 16
- Katahi ka mea a Ihowa ki a Mohi, Nana, ka takoto koe ki ou mātua; a ka whakatika te iwi nei, ka whai ka puremu ki nga atua o te tangata ke, o te whenua e haere na ratou ki reira noho ai ki waenganui i a ratou; ka whakarere i a au, ka whakataka hoki i taku kawenata i whakaritea atu e ahau ki a ratou.
- 17
- A ka mura taku riri ki a ratou i taua ra, a ka whakarere ahau i a ratou, ka huna hoki i toku kanohi i a ratou, a ka pau ratou, ka pa mai ano hoki nga kino maha me nga matenga ki a ratou; a, ka mea ratou i taua ra, Kahore ianei enei kino i pa mai ki a tatou, no te mea kahore to tatou Atua i roto i a tatou?
- 18
- Ko au ia, ka huna rawa i toku kanohi i taua ra, mo nga kino katoa i meatia e ratou, mo ratou i tahuri ki nga atua ke.
- 19
- Na, tuhituhia ra tenei hei waiata ma korua, ka whakaako atu hoki ki nga tamariki a Iharaira: hoatu hoki ki roto ki o ratou waha, kia ai tenei waiata hei kai whakaatu moku ki nga tamariki a Iharaira.
- 20
- Ta te mea ka oti ratou te kawe e ahau ki te whenua i oati ai ahau ki o ratou mātua, e rerengia nei e te waiu, e te honi; a ka kai ratou, ka makona, ka whai kiko hoki; ko reira ratou tahuri ai ki nga atua ke, mahi ai ki a ratou, a ka whakapataritari ratou i a au, ka whakataka hoki i taku kawenata.
- 21
- A, tenei ake, kei te pānga mai o nga kino maha me nga matenga ki a ratou, na, ma tenei waiata e whakaatu ki to ratou aroaro: ta te mea e kore e mahue atu i nga waha o o ratou uri: e mohio ana hoki ahau ki a ratou whakaaro e tito nei ratou inaianei nei ano, i te mea kiano ahau i kawe noa i a ratou ki te whenua i oati ai ahau.
- 22
- Na, tuhituhia ana e Mohi tenei waiata i taua rangi ano, a whakaakona ana ki nga tamariki a Iharaira.
- 23
- A i whakahau ano ia i a Hohua i te tama a Nunu, i mea, Kia maia, kia toa: mau hoki nga tamariki a Iharaira e kawe ki te whenua i oati ai ahau ki a ratou: kei a koe ahau.
- 24
- A ka oti i a Mohi te tuhi nga kupu o tenei ture ki roto ki tetahi pukapuka, a, poto noa,
- 25
- Na, ka whakahau atu a Mohi i nga Riwaiti, i nga kai amo i te aaka o te kawenata o Ihowa, ka mea,
- 26
- Tangohia tenei pukapuka o te ture, hoatu hoki ki te taha o te aaka o te kawenata o Ihowa o to koutou Atua, a hei reira takoto ai, hei kai whakaatu ki a koe.
- 27
- Ta te mea e mohio ana ahau ki tou tutu, me to kaki maro: nana, i a au e ora nei ano i a koutou i tenei ra, e tutu ana ano koutou ki a Ihowa; a ka mate ahau, tera noa ake!
- 28
- Huihuia mai ki a au nga kaumatua katoa o o koutou iwi, me o koutou rangatira, a ka korero atu ahau i enei kupu ki o ratou taringa, ka waiho hoki i te rangi me te whenua hei kai titiro mo ratou.
- 29
- Ta te mea e mohio ana ahau, ko muri i toku matenga taka rawa ai koutou, peka ke ai koutou i te huarahi i kiia atu e ahau ki a koutou; a ka pono mai te kino ki a koutou i nga ra whakamutunga; mo koutou ka mahi i te kino ki te tirohanga a Ihowa, hei whakapataritari i a ia ki te mahi a o koutou ringa.
- 30
- A korerotia atu ana e Mohi nga kupu o tenei waiata ki nga taringa o te huihuinga katoa o Iharaira, a, poto noa.
Address: 
Phone: 
Email: