- 1
- Makā to taro ki te mata o nga wai; kia maha hoki nga ra ka kitea ano e koe.
- 2
- Hoatu tetahi wahi ma te tokowhitu, ma te tokowaru ano hoki; e kore hoki koe e mohio ko tehea kino e puta mai ki runga ki te whenua.
- 3
- Ki te ki nga kapua i te ua, ka ringitia ki runga ki te whenua: ki te hinga ano te rakau ki te tonga, ki te nota ranei, te wahi e hinga ai te rakau, ko reira ano ia takoto ai.
- 4
- Te tangata e whai mahara ana ki te hau, e kore ia e rui; te tangata titiro kapua e kore ia e kokoti.
- 5
- Na, kahore koe e mohio ki te huarahi o te wairua ki te tupu ranei o nga wheua i roto i te kopu o te wahine hapu; e kore ano e mohiotia e koe te mahi a te Atua, a te kai mahi o nga mea katoa.
- 6
- I te ata ruia to purapura, i te ahiahi ano hoki kaua e kaiponuhia to ringaringa; e kore hoki koe e mohio ko tenei ranei e tika, ko tera ranei, ko raua ranei e rua ka pai ngatahi.
- 7
- Ahuareka tonu te māramatanga, pai tonu hoki ki nga kanohi te titiro atu ki te ra.
- 8
- Ki te mea he maha nga tau e ora ai te tangata, a ka koa i aua tau katoa, kia mahara ano ia ki nga ra o te pouritanga; he maha hoki. Nga mea e haere ake ana he horihori katoa.
- 9
- Kia koa, e te taitamariki, ki to taitamarikitanga, kia whakahari ano hoki to ngakau i a koe i nga ra o to taitamarikitanga, haere ano i nga ara o tou ngakau, i te tirohanga ano a ou kanohi: otiia kia mohio ano koe, he mea enei katoa e riro ai koe i te Atua ki te whakawakanga.
- 10
- Na, kia matara atu te riri i tou ngakau, whakanekehia atu ano hoki te kino i tou kikokiko: he mea horihori nei hoki te tamarikitanga, me te taitamarikitanga.
Address: 
Phone: 
Email: