- 1
- I muri iho i enei mea, a ka marie iho te riri a Kingi Ahahueruha, ka mahara ia ki a Wahati, ki tana i mea ai, ki te mea hoki i whakaritea mona.
- 2
- Na, ka mea nga tangata a te kingi i mahi nei ki a ia, Kia rapua mai etahi kotiro ahua pai ma te kingi.
- 3
- Kia whakaritea hoki e te kingi etahi kai titiro puta noa i nga kawanatanga o tona kingitanga, a ma ratou e huihui mai nga kotiro ahua pai, nga wahina, ki Huhana, ki te whare kingi, ki te whare wahine, ki a Heke ki ta te kingi rangatira ruma, ko ia nei te kai tiaki o nga wahine; kia hoatu ano hoki nga mea hei tahi mo to ratou poke.
- 4
- Na, te kotiro e pai ki ta te kingi titiro, ko ia hei kuini i muri i a Wahati. Na, pai tonu taua mea ki te whakaaro a te kingi, a pera ana ano ia.
- 5
- I Huhana i te whare kingi tetahi tangata, he Hurai, tona ingoa ko Mororekai, he tama na Haira, tama a Himei, tama a Kihi, he tangata no Peniamine.
- 6
- He mea whakaheke mai i Hiruharama i roto i te whakahekenga i whakahekea mai ai a Hekonia kingi o Hura, i tera i whakahekea mai e Nepukaneha kingi o Papurona.
- 7
- Na, he mea atawhai nana a Haraha, ara, a Ehetere te tamahine a tona matua keke; no te mea kahore ona pāpā, ona whaea, a, nui atu te ataahua o taua kotiro, he pai te ahua; i te matenga hoki o tona pāpā, o tona whaea, ka tangohia ia e Mororekai hei tamahine mana.
- 8
- A ka rangona te kupu a te kingi, me tana ture, a ka maha ano nga kotiro ka huihuia ki Huhana ki te whare kingi ki te ringa o Hekai, na, ka tangohia ano hoki a Ehetere ki te whare o te kingi ki te ringa o Hekai kai tiaki wahine.
- 9
- Na, he pai taua kotiro ki tana titiro, ka atawhaitia mai ano e ia; i homai wawe mai ano hoki e ia nga mea hei tahi mo tona poke, me era atu mea ano mana, me nga kotiro tokowhitu ano i tika nei kia hoatu ki a ia, no roto ano i te whare o te kingi: i whakanohoia ano hoki ia ratou ko ana kotiro ki te wahi pai rawa o te whare wahine.
- 10
- Kihai i whakaaturia e Ehetere tona iwi me ona whanaunga; na Mororekai hoki i ako ki a ia kia kaua e whakaaturia.
- 11
- Na, i tenei ra, i tenei ra, ka haere a Mororekai ki mua i te marae o te whare wahine kia mohio ai ia kei te pai ranei a Ehetere, ko te aha hoki e meatia ki a ia.
- 12
- Ano ka rite te wa mo tenei kotiro, mo tenei kotiro, e haere ai ki a Kingi Ahahueruha i te mea ka taka ona marama kotahi tekau ma rua, ko te ritenga hoki ia mo nga wahine, (ko reira hoki rite ai nga ra mo te tahi o to ratou poke, e ono nga marama o te hinu maira, a, e ono nga marama o nga mea kakara, o era atu mea ano hoki e tahia ai te poke o nga wahine;)
- 13
- Ko te tikanga tenei mo te haerenga atu o tetahi kotiro ki te kingi; ko nga mea katoa i hiahia ai ia, i hoatu ki a ia, a ka riro atu ano i a ia i roto i te whare wahine ki te whare o te kingi.
- 14
- I haere mai ia i te ahiahi, a i te ata ka hoki ki to nga wahine whare tuarua, ki te ringa o Haahakata, o to te kingi rangatira ruma, ko ia nei te kai tiaki o nga wahine iti; heoi ano ona haerenga mai ki te kingi, kia hiahia ra ano te kingi ki a ia, kia whakahuatia ano hoki tona ingoa.
- 15
- A ka rite te wa e haere atu ai ki te kingi a Ehetere tamahine a Apihaira, a te matua kēkē o Mororekai, (he mea tango nei hoki ia na tenei hei tamahine mana,) kihai tera i mea ki tetahi mea mana, heoi ano ko ta Hekai i whakarite ai, ko ia nei to te kingi rangatira ruma, me te kai tiaki o nga wahine. Na, ahuareka rawa a Ehetere ki te titiro mai a te hunga katoa i kite i a ia.
- 16
- He mea tango atu a Ehetere ki a Kingi Ahahueruha ki tona whare kingi i te tekau o nga marama, (ko Tepete hoki taua marama,) i te whitu o nga tau o tona kingitanga.
- 17
- Na, to te kingi aroha ki a Ehetere, nui atu i tona ki nga wahine katoa, ahuareka tonu ia, manakohia rawatia ana ia e ia i nga wahina katoa, potaea ana e ia te karauna kuini ki tona mahunga, meinga ana ia e ia hei kuini i a Wahati.
- 18
- Katahi ka tukua e te kingi he hakari nui ma ana rangatira katoa ratou ko ana tangata, te hakari hoki a Ehetere; i whakangawaritia ano hoki e ia nga mea ki nga kawanatanga, a, homai ana etahi hakari e ia, he mea i rite ki ta te kingi tikanga.
- 19
- Na, i te rua o nga huihuinga mai o nga wahina, kei te noho a Mororekai i te kuwaha o te kingi.
- 20
- Kihai ano i whakaaturia e Ehetere ona whanaunga me tona iwi; ko ta Mororekai hoki tera i ako atu ai ki a ia; a, i whakarite ano a Ehetere i te kupu a Mororekai, i pera ano me ia e whakatupuria ake ana i tona whare.
- 21
- I aua ra, i te mea e noho ana a Mororekai i te kuwaha o te kingi, ka riri a Pikitana raua ko Terehe, tokorua o nga rangatira ruma o te kingi, he kai tiaki i te tatau, a ka whai kia pa te ringa ki a Kingi Ahahueruha.
- 22
- Na, kua mohiotia taua mea e Mororekai, a ka whakaaturia e ia ki a Ehetere, ki te kuini; korerotia atu ana e Ehetere ki te kingi i runga ano i te ingoa o Mororekai.
- 23
- Na, ka uiuia taua mea, a ka kitea. Katahi raua ka taronatia ki runga ki te rakau, a ka tuhituhia taua mea ki te pukapuka o nga meatanga o nga ra i te aroaro o te kingi.
Address: 
Phone: 
Email: