- 1
- I taua po kihai i moe te kingi, a ka mea ia kia kawea mai te pukapuka whakamahara ki nga meatanga o nga ra. Na, ka korerotia ki te aroaro o te kingi.
- 2
- Na, ka kitea kua oti te tuhituhi ta Mororekai whakaaturanga i ta Pikitana raua ko Terehe, i ta nga rangatira ruma tokorua a te kingi; he kai tiaki enei i te tatau, a, i whai kia pa te ringa ki a kingi Ahahueruha.
- 3
- Na, ko te meatanga mai a te kingi, He aha te honore, te kororia, i whiwhi ai a Mororekai mo tenei? Ano ra ko nga tangata a te kingi i mahi nei ki a ia, Kihai tetahi mea i meatia ki a ia.
- 4
- Katahi te kingi ka mea ake, Ko wai kei te marae? Na, ko te putanga mai o Hamana ki to waho marae o te whare o te kingi, hei ki mai ki te kingi, kia taronatia a Mororekai ki runga ki te tarawa kua oti te hanga mona.
- 5
- Na, ko te meatanga mai a nga tangata a te kingi ki a ia, Ko Hamana tenei e tu nei i te marae. Ano ra ko te kingi, Kia haere mai ia.
- 6
- Te haerenga mai o Hamana, ka mea te kingi ki a ia, Ko te aha kia meatia ki ta te kingi tangata e pai ai kia whakahonoretia? Na, ko te meatanga ake a Hamana i roto i tona ngakau, Ko wai atu i a au ta te kingi e pai ai kia whakahonoretia?
- 7
- Na, ko te meatanga mai a Hamana ki te kingi, Ta te kingi tangata e pai ai kia whakahonoretia,
- 8
- Me kawe mai nga kakahu kingi, e kakahu nei te kingi, me te hoiho ano e ekengia ana e te kingi, me te karauna kingi e potaea ana ki tona mātenga;
- 9
- Katahi ka hoatu taua kakahu me te hoiho ki te ringa o tetahi o nga tino rangatira a te kingi; na, ka whakakakahuria atu e ratou ki te tangata e pai ai te kingi kia whakahonoretia, ka arahi ai i a ia i runga i te hoiho i te waharoa o te pa, ka karanga ai ki tona aroaro, Ka peneitia te tangata e pai ai te kingi kia whakahonoretia.
- 10
- Na, ko te meatanga mai a te kingi ki a Hamana, Kia hohoro to tiki i te kakahu me te hoiho, i tau i ki ra, ka pera ai ki a Mororekai ki te Hurai e noho ra i te kuwaha o te kingi. Kei taka tetahi kupu o nga mea katoa i korerotia mai e koe.
- 11
- Katahi ka tikina e Hamana te kakahu, me te hoiho, a, whakakakahuria ana e ia a Mororekai, arahina ana ia e ia i runga i te hoiho i te waharoa o te pa, me te karanga ano i tona aroaro, Ka peneitia te tangata e pai ai te kingi kia whakahonoretia.
- 12
- Na, hoki ana a Mororekai ki te kuwaha o te kingi, ko Hamana ia i hohoro ki tona whare, pouri tonu, hipoki rawa te mahunga.
- 13
- Na, ka korerotia e Hamana ki tana wahine ki a Herehe, ratou ko ona hoa katoa nga mea katoa i pa mai ki a ia. Katahi ana tangata mohio, ratou ko tana wahine ko Herehe, ka mea ki a ia, Ki te mea no nga uri o nga Hurai a Mororekai, tera kua timata na koe te hinga i tona aroaro, e kore koe e kaha i a ia, engari ka hinga rawa koe i tona aroaro.
- 14
- I a ratou ano e korero ana ki a ia, ka tae mai nga rangatira ruma o te kingi, porangi tonu, he mea kia arahina ai e ratou a Hamana ki te hakari i takā nei e Ehetere.
Address: 
Phone: 
Email: