- 1
- Na, ka mea mai a Ihowa ki a Mohi, Haere ki a Parao; kua whakapakeke hoki ahau i tona ngakau, me te ngakau hoki o ona tangata, kia whakakite atu ai ahau i enei tohu aku ki tona aroaro;
- 2
- Kia korero ai hoki koe ki nga taringa o to tama, o te tama hoki a to tama, i nga mea i mahi ai ahau ki Ihipa, i aku tohu hoki i meatia e ahau i roto i a ratou; kia mohio ai koutou ko Ihowa ahau.
- 3
- A haere ana a Mohi raua ko Arona ki a Parao, a mea atu ana ki a ia, E penei mai ana a Ihowa, te Atua o nga Hiperu, Kia pehea te roa o to whakatuturitanga, tē whakangohengohe ai koe i a koe ki toku aroaro? Tukua mai toku iwi ki te mahi ki a au.
- 4
- Tena ko tenei, ka kore koe e rongo ki te tuku mai i toku iwi, nana, ko apopo ahau kawe mai ai i te mawhitiwhiti puta noa atu i o rohe:
- 5
- A e kapi i a ratou te mata o te whenua, a e kore e ahei te kite iho i te whenua; a e kai ratou i nga toenga i mahue, i toe ma koutou i te whatu, e kai hoki ratou i nga rakau katoa e tupu ana ma koutou i te mara:
- 6
- A e ki i a ratou ou whare, me nga whare o o tangata katoa, me nga whare o nga Ihipiana katoa; he mea kihai nei i kitea e ou mātua, e nga mātua ranei o ou mātua, o te ra iho ano i noho ai ratou ki te whenua, a, moroki noa nei. A tahuri atu ana ia, haere atu ana i a Parao.
- 7
- A ka mea nga tangata o Parao ki a ia, Kia pehea te roa o te mahangatanga a tenei tangata i a tatou? tukua atu nga tangata ki te mahi atu ki a Ihowa ki to ratou Atua: kiano koe i mohio noa kua ngaro a Ihipa?
- 8
- Na, ka whakahokia mai ano a Mohi raua ko Arona ki a Parao; a ka mea atu ia ki a raua, Haere, e mahi ki a Ihowa ki to koutou Atua: ko wai, ko wai e haere?
- 9
- A ka mea atu a Mohi, E haere ra matou me a matou taitamariki, me o matou koroheke, me a matou tama, me a matou tamahine, e haere me a matou hipi, me a matou kau; he hakari hoki ta matou ki a Ihowa.
- 10
- Na, ko tana meatanga mai ki a raua, Kia pena te noho tahi a Ihowa ki a koutou, me ahau hoki ka tuku atu nei i a koutou me a koutou potiki: ma koutou e titiro; he kino hoki kei mua i a koutou.
- 11
- Kahore ra hoki: haere koutou, e nga tane e mahi ki a Ihowa; ko ta koutou hoki tena i whai na. A peia atu ana raua i te aroaro o Parao.
- 12
- Na, ka mea a Ihowa ki a Mohi, Whatorona atu tou ringaringa ki runga ake i te whenua o Ihipa mo te mawhitiwhiti kia puta ake ki te whenua o Ihipa, ki te kai i nga otaota katoa o te whenua, i nga mea katoa i toe iho i te whatu.
- 13
- A te whatoronga atu o te tokotoko o Mohi ki runga i te whenua o Ihipa, na, whakaputaina mai ana e Ihowa tetahi hau, he marangai, ki runga ki te whenua, a, pau katoa taua rangi, pau katoa taua po; a huaki ake te ata, na, kua kawea mai nga mawhitiwhiti e te marangai:
- 14
- A puta ake ana te mawhitiwhiti ki te whenua katoa o Ihipa, a tau iho ki nga rohe katoa o Ihipa: he nanakia rawa; kahore he mawhitiwhiti o mua atu hei rite mo enei, e kore ano hoki e rite a muri ake nei.
- 15
- A ngaro ana i a ratou te mata o te whenua katoa, a pouri ana te whenua; a kainga ake e ratou nga otaota katoa o te whenua, me nga hua katoa o nga rakau i toe i te whatu: kihai i mahue tetahi tupu o nga rakau, o nga otaota ranei o te mara, puta noa i te whenua katoa o Ihipa.
- 16
- Na, ka hohoro a Parao te karanga ki a Mohi raua ko Arona; a ka mea, Kua hara ahau ki a Ihowa ki to koutou Atua, ki a korua hoki.
- 17
- Na, whakarerea noatia iho taku hara, heoi rawa ano ko to tenei taima, a, inoi atu ki a Ihowa ki to koutou. Atua, kia tangohia atu e ia tenei mate i a au, ko tenei anake.
- 18
- A mawehe atu ana ia i a Parao, inoi atu ana ki a Ihowa.
- 19
- Na, whakatakā mai ana e Ihowa he hauauru nui rawa, nana i kahaki atu nga mawhitiwhiti, i whiu atu ki te Moana Whero; kihai i toe tetahi mawhitiwhiti i roto i nga rohe katoa o Ihipa.
- 20
- Heoi whakapakeke ana a Ihowa i te ngakau o Parao, a kihai ia i tuku mai i nga tamariki a Iharaira.
- 21
- A ka mea mai a Ihowa ki a Mohi, Torona ake tou ringaringa ki te rangi, kia whai pouritanga ai ki te whenua o Ihipa, he pouritanga e hakiri mai ana ki te ringa.
- 22
- A te toronga atu o te ringaringa o Mohi whaka-te-rangi: na, kua pouri kerekere, paku noa i te whenua katoa o Ihipa, e toru nga ra:
- 23
- Kahore te tahi i kite i tetahi, kihai ano hoki i whakatika atu tetahi i tona wahi i nga ra e toru: tena ko nga tamariki a Iharaira, mārama tonu o ratou nohoanga.
- 24
- Na, ka karanga a Parao ki a Mohi, a ka mea, Haere koutou, e mahi ki a Ihowa; otiia me waiho a koutou hipi me a koutou kau: ko a koutou tamariki nonohi hoki me haere tahi i a koutou.
- 25
- A ka mea mai a Mohi, Me homai ano e koe ki a matou nga patunga tapu, me nga tahunga tinana, hei mahinga ma matou ki a Ihowa ki to matou Atua.
- 26
- Me haere ano a matou kararehe i a matou; e kore tetahi maikuku e mahue; ta te mea hoki, ka tangohia e matou etahi o ena hei mahinga ma matou ki a Ihowa ki to matou Atua; a e kore matou e mohio ki ta matou e mahi ai ki a Ihowa, kia tae atu ra ano ki reira.
- 27
- Heoi whakapakeketia ana e Ihowa te ngakau o Parao, a kihai ia i pai ki te tuku atu i a ratou.
- 28
- Na ka mea a Parao ki a ia, Mawehe atu i a au, Kia tupato kei kite mai koe i toku kanohi ki muri ake nei; ko te ra hoki e kite ai koe i toku kanohi, ka mate koe.
- 29
- Ano ra ko Mohi, Ka tika tau korero, e kore ano ahau e kite i tou kanohi ki muri ake nei.
Address: 
Phone: 
Email: